ກວດການບັນດາຕະຫລາດບັນຫາການສວຍໂອກາດຂື້ນລາຄາສິນຄ້າ
ເຈົ້າໜ້າທີ່ການຄ້າກວດກາ 7 ຕະຫຼາດປ້ອງໃນຊ່ວງໂຄວິດ-19 ແພ່ລະບາດ.
ການແພ່ລະບາດຂອງໂຄວິດ-19 ໃນຊ່ວງນີ້ເຮັດໃຫ້ກຳແພງນະຄອນວຽງຈັນ ລວມທັງອີກຫລາຍໆແຂວງເກືອບທຸກແຂວງໄດ້ມີການລັອກດາວ ຫລື ປິດການເຂົ້າອອກເມືອງເຊິງແນນອນຕ້ອງມີຜົນກະທົບເຖິງຄວາມເປັນຢູ່ຂອງພໍ່ແມ່ປະຊາຊົນທັງຫລາຍ ແລະ ອາດເຮັດໃຫ້ມີຜູ່ສວຍໃຊ້ໂອກາດນີ້ໃນການປັບລາຄາສິນຄ້າໂດຍຕົວເອງ.
ເນື່ອງຈາກທຸກເຂດແຂວງແມ່ນມີການປິດການເຂົ້າ-ອອກ ບ້ານ-ເມືອງ ການຂົນສົ່ງສິນຄ້າກໍ່ຫຍຸ້ງຍາກຂຶ້ນຖ້າທຽບໃສ່ກ່ອນໜ້ານັ້ນ ແຕ່ເພື່ອປ້ອງກັນບໍ່ໃຫ້ພໍ່ແມ່ປະຊາຊົນອຶດຢາກຈາກເຂົ້າປາອາຫານອັນເປັນປັດໃຈສຳຄັນໃນການດຳລົງຊີວິດ ທາງການແມ່ນຍັງອະນຸຍາດໃຫ້ເປີດຕະຫຼາດການຊື້-ຂາຍຕາມປົກກະຕິ ພ້ອມບໍ່ໃຫ້ມີການສວຍໂອກາດຂຶ້ນລາຄາສິນຄ້າຕາມລຳພັງໃຈ ແລະບໍ່ແມ່ນແຈ້ງການຢ່າງດຽວ ພະແນກອຸດສາຫະກຳ ແລະການຄ້າໄດ້ຈັດທີມງານລົງກວດກາສະພາບການຕົວຈີງ ໃຫ້ຮັບປະກັນບາຄາສິນຄ້າຢູ່ໃນເກນປົກກະຕິອິກດ້ວຍ.
ດ້ວຍເຫດນີ້ເມື່ອເຈົ້າໜ້າທີ່ໄດ້ຮັບລາຍງານຂອງສັງຄົມວ່າມີການຂຶ້ນລາຄາໄຂ່ໄກ່ ແລະ ຊີ້ນໝູຢູ່ຕະຫຼາດຫ້ວຍຫົງ ແລະ ຕະຫຼາດໂພນສະຫວ່າງ, ເຈົ້າໜ້າທີ່ ປກສ ນະຄອນຫຼວງວຽງຈັນແມ່ນບໍ່ໄດ້ນິ້ງເສຍ ຮີບຮ້ອນມອບໝາຍໃຫ້ພະແນກຕຳຫຼວດປ້ອງກັນເສດຖະກິດ ຫ້ອງຕຳຫຼວດ ປສກ ນວ ປະສານສົມທົບກັບພະແນກອຸດສາຫະກຳ ແລະ ການຄ້າ ນວ ສືບຕໍ່ຈັດຕັ້ງປະຕິບັດກວດກາລາຄາສິນຄ້າຢູ່ຕະຫຼາດ ນັບແຕ່ເວລາ 8:00ໂມງ ຫາ 17:00ໂມງ ຂອງວັນທີ 25 ເມສາ 2021.
ໃນນັ້ນໄດ້ກວດກາທັງໝົດ 7 ແຫ່ງຄື: 1 ຕະຫຼາດສວນມອນ, 2 ຕະຫຼາດທົ່ງພານທອງ, 3 ຕະຫຼາດໜອງຈັນ, 4 ຕະຫຼາດສີຂຽວ, 5 ຕະຫຼາດອົດຊີ, 6 ຕະຫຼາດຫ້ວຍຫົງ, 7 ຕະຫຼາດໂພນສະຫວ່າງ ຜ່ານການກວດກາເຫັນວ່າ ບໍ່ມີຄວາມຈິງ ແລະ ຕະຫຼາດອື່ນໆ ກໍ່ຍັງຂາຍລາຄາໃນເກນປົກກະຕິ.
ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງເຈົ້າຂອງກິດຈະການ, ຫົວໜ່ວຍທຸລະກິດຕ່າງໆ ໃຫ້ປະຕິບັດຕາມສັ່ງຂອງນາຍົກລັດຖະມົນຕີ ເລກທີ 15/ນຍ ທີ່ລະບຸໄວ້ໃນ ຂໍ້ທີ 6 ຫ້າມສວຍໂອກາດກັກຕຸນ ແລະ ຂຶ້ນລາຄາສິນຄ້າ ອຸປະໂພກ ແລະ ບໍລິໂພກຕ່າງໆຢ່າງເຂັ້ມງວດ ເພື່ອພ້ອມກັນຜ່ານຜ່າວິກິດໂຄວິດ-19ໄປພ້ອມໆກັນ.
ກໍລະນີພໍ່ແມ່ປະຊາຊົນພົບເຫັນແມ່ຄ້າຊາວຂາຍສວຍໂອກາດຂຶ້ນລາຄາສິນຄ້າ ໃຫ້ແຈ້ງເບີວອດແອັບ 02028899774 ແລະ ແຈ້ງຜ່ານທາງຊ່ອງທາງເຟສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ປ້ອງກັນຄວາມສະຫງົບນະຄອນຫຼວງວຽງຈັນ.