ຂ່າວດີ! ລົດໄຟລາວ-ຈີນຈະເປີດບໍລິການລົດໄຟ EMU ສອງຂະບວນຕໍ່ໃສ່ກັນ
ຈະເປີດໃຫ້ບໍລິການລົດໄຟ EMU ສອງຂະບວນຕໍ່ໃສ່ກັນເພື່ອເພີ່ມທະວີຄວາມສາມາດໃນການນຳໃຊ້
ຖືວ່າເປັນຂ່າວດີສຳລັບຜູ້ທີ່ໃຊ້ເສັ້ນທາງລົດໄຟເປັນປະຈຳ, ຫວ່າງມໍ່ໆ ມານີ້, ບໍລິສັດທາງລົດໄຟລາວ-ຈີນ ຈຳກັດ ໄດ້ສຳເລັດການທົດສອບສະຖິດສາດນຳຂະບວນລ້ານຊ້າງສອງຂະບວນຕໍ່ໃສ່ກັນ ເຊິ່ງມີແຜນຈະເປີດໃຫ້ບໍລິການໃນໄວໆ ນີ້ ເພື່ອຕອບສະໜອງຄວາມຕ້ອງການດ້ານການບໍລິການໃຫ້ແກ່ຜູ້ໂດຍສານທີ່ນໍາໃຊ້ລົດໄຟລາວ-ຈີນ.
ລົດໄຟ EMU ສອງຂະບວນຕໍ່ໃສ່ກັນແມ່ນຮູບແບບການແລ່ນລົດຮູບແບບໜຶ່ງຂອງລົດໄຟ EMU, ກໍຄືການທີ່ເອົາລົດໄຟ EMU ສອງຂະບວນມາຕໍ່ໃສ່ກັນ ເຊິ່ງຈະເຮັດໃຫ້ພາຍໃຕ້ເງື່ອນໄຂ ແລະ ເວລາດຽວກັນຄວາມສາມາດຂອງການແລ່ນລົດໄຟເພີ່ມຂຶ້ນເປັນສອງເທົ່າ. ລົດໄຟ EMU ຂະບວນທໍາອິດທີ່ແລ່ນໄປໃນທິດທາງຂ້າງໜ້າແມ່ນຮັບໜ້າທີ່ຄວບຄຸມ ເຊິ່ງລົດໄຟ EMU ສອງຂະບວນທີ່ເຊື່ອມຕໍ່ກັນ ນີ້ຈະມີຮູບພາບຄ້າຍຄືກັບລົດໄຟທີ່ກຳລັງ “ຈູບກັນ”, ອັນເປັນພາບທີ່ສວຍງາມຫຼາຍ, ເຊິ່ງມັກຈະດຶງດູດໃຫ້ຜູ້ທີ່ພົບເຫັນຖ່າຍຮູບເກັບໄວ້ຢູ່ສະເໝີ.
ວັນທີ 1 ມີນານີ້ ລົດໄຟ EMU ທີ່ໄດ້ສົ່ງໄປປະເທດຈີນເພື່ອດຳເນີນການກວດກາດ້ານເຕັກນິກ. ວັນທີ 5 ມີນາ, ໄດ້ດຳເນີນການທົດສອບສະຖິດສາດຢູ່ນະຄອນຫຼວງວຽງຈັນ, ການທົດສອບລວມມີການທົດສອບການເຊຶ່ອມຕໍ່ກັນຂອງລົດໄຟ, ການທົດສອບເບກ, ການທົດສອບການລາກດຶງ ແລະ ການທົດ ສອບຄວາມໄວ ແລະ ອື່ນໆ; ເຊິ່ງການທົດສອບທັງໝົດກໍຜ່ານມາດຕະຖານ ແລະ ບັນລຸເງື່ອນໄຂດ້ານເຕັກນິກສຳລັບການເຊື່ອມຕໍ່ກັນຂອງລົດໄຟ EMU ທັງສອງຂະບວນ, ອັນໄດ້ເປັນການວາງພື້ນຖານອັນດີສໍາລັບການນໍາໃຊ້ທີ່ມີມາດຕະຖານຂອງລົດໄຟ.
ນັບແຕ່ມື້ເປີດການນຳໃຊ້ເສັ້ນທາງລົດໄຟລາວ-ຈີນ ເປັນຕົ້ນມາ, ບໍລິສັດທາງລົດໄຟ ລາວ-ຈີນໄດ້ນໍາໃຊ້ຫຼາຍມາດຕະການເພື່ອປັບປຸງຄຸນນະພາບການບໍລິການຜູ້ໂດຍສານ ເຊັ່ນ: ເພີ່ມຖ້ຽວຂະບວນລົດໄຟ, ເພີ່ມເວລາຂາຍປີ້ລ່ວງໜ້າ, ເພິ່ມບໍລິການການຂາຍປີ້ຕ່າງສະຖານີ, ປັບປຸງຈຳນວນການຂາຍປີ້, ຕັ້ງຈຸດຂາຍປີ້ຢູ່ໃນຕົວເມືອງ ແລະ ອື່ນໆ ເພື່ອຕອບສະໜອງຄວາມຕ້ອງການຂອງຜູ້ໂດຍສານ.
ເລີ່ມແຕ່ເປີດການບໍລິການເປັນຕົ້ນມາ, ການຂົນສົ່ງຜູ້ໂດຍສານແລະສິນຄ້າຕາມເສັ້ນທາງລົດໄຟລາວ-ຈີນໄດ້ມີສະພາບການຝົດຟື້ນຂຶ້ນ, ນັບມາຮອດວັນທີ 7 ມີນານີ້, ເສັ້ນທາງລົດໄຟລາວ-ຈີນໄດ້ບໍລິການລົດໄຟຂົນສົ່ງໂດຍສານລວມໄດ້ທັງໝົດ 172 ຂະບວນໄປ-ກັບ, ໃນນັ້ນ, ຂົນສົ່ງຜູ້ໂດຍສານບັນລຸໄດ້ 175.977 ເທື່ອຄົນ, ສະເລ່ຍແລ້ວສາມາດຂົນສົ່ງຜູ້ໂດຍສານສູງສຸດບັນລຸເຖິງ 3.160 ຄົນຕໍ່ມື້ ແລະ ອັດຕາການຊົມໃຊ້ລົດໄຟສະເລ່ຍແມ່ນ 71,05%.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: Media Laos