ແຂວງຈຳປາສັກເນັ້ນວຽກງານການທ່ອງທ່ຽວໃນການພັດທະນາເສດຖະກິດ
ພາບ: laoedaily.com.la
ໃນການພັດທະນາເສດຖະກິດຈຳປາສັກມຸ້ງໃສ່ການທ່ອງທ່ຽວເປັນຫລັກ.
ແຂວງຈຳປາສັກເປັນໜຶ່ງໃນແຂວງທີ່ມີແຫລ່ງທ່ອງທ່ຽວທີ່ສວຍງາມຫລາຍແຫ່ງ ແລະ ເປັນມໍລະດົກໂລກ, ຈາກທີ່ຜ່ານມາມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວຢ່າງຫລວງຫລາຍ ແລະ ເຮັດໃຫ້ເສດຖະກິດໃນແຂວງຈຳປາສັກດີຂື້ນເປັນລຳດັບຈົນມາເຖິງການລະບາດຂອງພະຍາດໂຄວິດ-19.
ສະພາບການລະບາດຂອງພະຍາດໂຄວິດ – 19 ໃນທົ່ວໂລກ ທີ່ແກ່ຍາວມາຫຼາຍເດືອນໄດ້ສົ່ງຜົນກະທົບຢ່າງໜັກຕໍ່ຂະແໜງອຸດສາຫະກໍາການທ່ອງທ່ຽວໃນລາວ ເວົ້າລວມ, ເວົ້າສະເພາະແຂວງຈຳປາສັກ ເພາະລາຍຮັບຂອງແຂວງສ່ວນໃຫຍ່ແມ່ນມາຈາກການທ່ອງທ່ຽວ ເຖິງວ່າລັດຖະບານກໍຄືການນຳແຂວງໄດ້ເອົາໃຈໃສ່ຊຸກຍູ້ຊ່ວຍເຫຼືອຜູ້ປະກອບການດ້ານການທ່ອງທ່ຽວ ແຕ່ກໍສາມາດຊ່ວຍໄດ້ໃນລະດັບໜຶ່ງເທົ່ານັ້ນ.
ທ່ານ ມະໄລທອງ ກົມມະສິດ ຮອງເຈົ້າແຂວງຈຳປາສັກ ໃຫ້ສຳພາດວ່າ: ຜ່ານມາການນໍາແຂວງໄດ້ພະຍາຍາມຊຸກຍູ້ປະຕິບັດຕາມຂໍ້ຕົກລົງຂອງນາຍົກລັດຖະມົນຕີ ກ່ຽວກັບນະໂຍບາຍຫຼຸດຜ່ອນຜົນກະທົບຂອງພະຍາດໂຄວິດ – 19 ຕໍ່ຂົງເຂດການທ່ອງທ່ຽວ ແຕ່ກໍເຮັດໃນຂອບທີ່ກົດໝາຍ ແລະ ລະບຽບການທີ່ໄດ້ກໍານົດເທົ່ານັ້ນ, ສ່ວນບັນຫາໜີ້ສິນແມ່ນປະຕິບັດຕາມກົນໄກຕະຫຼາດ ລະຫວ່າງ ຜູ້ປະກອບການກັບທະນາຄານ ແຕ່ພາກສ່ວນທະນາຄານເອງກໍມີ ຄວາມພະຍາຍາມໃນການຜ່ອນຜັນການຈ່າຍດອກເບ້ຍຕ່າງໆ ແຕ່ກໍບໍ່ສາມາດທົດແທນໄດ້ໝົດຕໍ່ຜົນກະທົບທີ່ເກີດຂຶ້ນໃນຄັ້ງນີ້.
ສະນັ້ນ, ເພື່ອເຮັດໃຫ້ຜູ້ປະກອບການທ່ອງທ່ຽວພາຍໃນແຂວງຢູ່ລອດ, ລັດຖະບານ ຈຶ່ງມີນະໂຍບາຍສົ່ງເສີມການທ່ອງທ່ຽວແບບລາວທ່ຽວລາວ ເພື່ອກະຕຸ້ນບັນຍາກາດການທ່ອງທ່ຽວໃຫ້ກັບມາຄຶກຄື້ນອີກຄັ້ງໜຶ່ງ ທັງເຮັດໃຫ້ຜູ້ປະກອບການ ແລະ ປະຊາຊົນໃນທ້ອງຖິ່ນມີລາຍຮັບ. ນອກນີ້, ໂຮງແຮມ, ເຮືອນພັກ, ຮ້ານອາຫານຕ່າງໆກໍຫຼຸດລາຄາລົງເຊັ່ນດຽວກັນ ເພື່ອໃຫ້ຄົນລາວສາມາດທ່ອງທ່ຽວໄດ້, ທັງເປັນການປູພື້ນຖານໃຫ້ແກ່ການຟື້ນຟູການທ່ອງທ່ຽວພາຍໃນ ພາຍຫຼັງທີ່ປະເທດອ້ອມຂ້າງປອດເຊື້ອພະຍາດໂຄວິດ – 19 ແລ້ວ.
ທ່ານ ມະໄລທອງ ກົມມະສິດ ໃຫ້ຮູ້ຕື່ມວ່າ: ສຳລັບທິດທາງໃນຕໍ່ໜ້າ ແຂວງຈຳປາສັກ ຍັງຈະຖືເອົາວຽກງານການທ່ອງທ່ຽວເປັນປາຍແຫຼມໃນການພັດທະນາເສດຖະກິດ – ສັງຄົມພາຍໃນແຂວງ ຍ້ອນມີຈຸດພິເສດ ແລະ ທ່າແຮງຫຼາຍດ້ານການທ່ອງທ່ຽວ. ດັ່ງນັ້ນ, ໃນແຜນການຈັດຕັ້ງປະຕິບັດວຽກງານ 5 ປີ ຂອງແຂວງຈຶ່ງຖືເອົາວຽກງານການທ່ອງທ່ຽວເປັນໜຶ່ງໃນ 6 ວຽກງານຈຸດສຸມຕົ້ນຕໍ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ ໂດຍ: laoedaily.com.la
