ເລື່ອງເລົ່າ ວັດອິນແປງ ສະຖານທີ່ທ່ອງທ່ຽວວັດທະນະທຳຂອງລາວ.
ມາຮູ້ຈັກກັບ ວັດອິນແປງ ສະຖານທີ່ທ່ອງທ່ຽວ ດ້ານປະຫວັດສາດ ແລະ ວັດທະນະທໍາ.
ຕາມການເລົ່າຂານສືບທອດຕໍ່ກັນມາວ່າ ໃນໄລຍະການກໍ່ສ້າງວັດ ອິນແປງນີ້, ໄດ້ມີພະຍາອິນ ແປງກາຍເປັນຜູ້ເຖົ້າມາຊ່ວຍເຫລືອ ແລະ ແນະນຳໃນການ ກໍ່ສ້າງວັດ ແລະ ຫລັງຈາກນັ້ນພະຍາອິນກໍຍັງໄດ້ແປງກາຍເປັນຄູບາເຖົ້າອົງໜຶ່ງເພື່ອມາຊ່ວຍສ້າງພຣະພຸດທະຮູບອິນແປງ ອີກດ້ວຍ ຈຶ່ງເປັນທີ່ມາຂອງຊື່ວັດອິນແປງ ຈົນເທົ່າທຸກມື້ນີ້, ວັດອິນແປງ ເປັນສະຖານທີ່ທ່ອງທ່ຽວ ທາງດ້ານປະຫວັດສາດ ແລະ ວັດທະນະທຳ ເຊິ່ງຕັ້ງຢູ່ໃຈກາງເທດສະບານຂອງ ນະຄອນຫລວງວຽງຈັນ.
ວັດນີ້ຖືໄດ້ວ່າເປັນບູຮານສະຖານທີ່ເກົ່າແກ່ແຫ່ງໜຶ່ງໃນປະເທດລາວ ຄ້າຍຄືກັນກັບ ວັດອົງຕື້, ວັດສີເມືອງ, ວັດສີສະເກດ ແລະ ຫໍພຣະແກ້ວ. ປະຊາຊົນລາວ ໃນນະຄອນຫລວງວຽງຈັນ ລວມທັງນັກທ່ອງທ່ຽວທີ່ມາຈາກທ້ອງຖິ່ນອື່ນໄດ້ໃຫ້ຄວາມເຄົາລົບ ແລະ ສັດທາວັດນີ້ຫລາຍເນື່ອງຈາກວ່າເປັນສະຖານທີ່ບັນຈຸວັດຖຸບູຮານອັນມີຄ່າ ແລະ ສຳຄັນທາງສາດສະໜາພຸດ ເປັນຕົ້ນແມ່ນ:
ພຣະພຸດທະຮູບອິນແປງ,ພຣະພຸດທະຮູບອິນທາທິຣາດ (ໃນຫໍອູບມຸງ), ຮູບປັ່ນໂຕມອມ (ສີງເທບ) ຮູບປັ່ນມະເຫສີເຈົ້າພຣະເຈົ້າໄຊຍະເຊດຖາ – ຮູບປັ່ນມະເຫສີພຣະເຈົ້າບຸເລງນອງ ແລະ ພຣະທາດເກົ່າແກ່ສະໄໝບູຮານ .
ຮູບປັ້ນມະເຫສີພຣະເຈົ້າໄຊຍະເຊດຖາ, ຮູບປັ້ນມະເຫສີພຣະເຈົ້າບຸເລງນອງ ແລະ ຮູບປັ້ນໂຕມອມສັນນິຖານວ່າ ສ້າງຂື້ນໃນສະໄໝພຣະເຈົ້າໄຊເຊດຖາທະລາດ ໂດຍຊ່າງຊາວ ພະມ້າ ທີ່ເຂົ້າມາປິດລ້ອມວຽງຈັນ ໂດຍມີເລື່ຶອງເລົ່າຕໍ່ໆກັນມາວ່າ: ພຣະເຈົ້າໄຊເສດຖາທິຣາດ ບູລະນະສ້ອມແປງ ວັດອິນແປງ ແລ້ວພຣະອົງກໍ່ອາໃສລານວັດອິນແປງນັ້ນ ເພື່ອດຳເນີນການສ້າງວັດອົງຕື້ ຊຶ່ງພຣະອົງໄດ້ສ້າງ 2 ວັດພ້ອມກັນຄື: ຫໍພຣະແກ້ວ ແລະ ວັດອົງຕື້.
ໃນຂະນະກຳລັງສ້າງສານັ້ນ ທະຫານພະມ້າກໍ່ເຂົ້າມາປິດລ້ອມວຽງຈັນ ແມ່ທັບພະມ້າໄດ້ຊາບວ່າພຣະອົງກໍາລັງວຸ້ນຢູ່ກັບການສ້າງວັດວາອາຮາມ ຈຶ່ງແຕ່ງທູດນຳເອົາສານທ້າຮົບມາມອບໃຫ້ພຣະອົງ. ພຣະເຈົ້າໄຊເສດຖາອ່ານສານນັ້ນແລ້ວຈຶ່ງບໍ່ຄິດອັນໃດ ຂຽນສານຕອບໄປວ່າ “ເຮົາກຳລັງສ້າງພຣະໃຫຍ່ອົງສຳຄັນ ເພື່ອເປັນບຸນເປັນກຸສົນ ຈຶ່ງຂໍເຊີນມາຮ່ວມນຳ” ດ້ວຍຄວາມທີ່ພະມ້າກໍເປັນຊາວພຸດຄືກັນ ແມ່ທັບໃຫຍ່ພະມ້າ ກໍ່ແຕ່ງທູດເຂົ້າມາຮ່ວມໃນງານເທທອງສໍາຣິດ ໃສ່ເບົ້າພຣະໃຫຍ່ອົງຕື້.
ພໍແຕ່ໝໍ້ຕົ້ມທອງສຳລິດຝົດເດືອດແລ້ວ ພຣະເຈົ້າໄຊເສດຖາ ກໍ່ໃຊ້ສອງມືອຸ້ມໂຈມເອົາໝໍ້ສໍາຣິດນັ້ນໄປເທໃສ່ເບົ້າ ທູດພະມ້າແນມເຫັນກໍ່ຕົກສະເງີ້ ເພາະ ບໍ່ເຫັນມືຂອງພຣະເຈົ້າໄຊເສດຖາ ປູດໂພງໄໝ້ພອງ ແຕ່ປະການໃດ ຈຶ່ງນຳຄວາມໄປເລົ່າສູ່ແມ່ທັບໃຫຍ່ຟັງ ແມ່ທັບໃຫຍ່ພະມ້າຈຶ່ງບໍ່ຕັດສິນໃຈໄດ້ເທື່ອວ່າ ຈະຕີ ຫຼື ຈະຖອຍ?
ພໍຕົກທ່ຽງຄືນພຣະເຈົ້າໄຊເສດຖາ ໄດ້ນໍາພາອົງຄະລັກ 8 ຄົນ ໄປຢາມທັບພະມ້າ ກໍເຫັນທະຫານພະມ້ານອນຍາຍກັນຢູ່ ເພາະອິດເມື່ອຍຈາກການເດີນທາງ. ອົງຄະລັກ ເຫັນວ່າເປັນໂອກາດດີ ຈຶ່ງຖອດດາບອອກຈະຕັດຄໍ ທະຫານພະມ້າ ແຕ່ພຣະເຈົ້າໄຊເສດຖາ ຫ້າມເອົາໄວ້ ແລ້ວເອົາປູນຂາວມາປ້າຍຄໍທະຫານພະມ້າແທນ.
ຕື່ນເຊົ້າມາທະຫານພະມ້າກໍຕົກໃຈ ແລະ ທັງເກງກົວທັງເຫຼື້ອມໃສໃນນ້ຳໃຈຂອງພຣະອົງ ຖ້າພຣະອົງຈະຕັດຄໍກໍ່ຈະຕັດໄປແລ້ວ ຈຶ່ງພາກັນມາຄາຣະວະພຣະອົງ ແລະ ຂໍເຂົ້າຮ່ວມພິທີສ້າງພຣະອົງຕື້ ທັງຂໍເອົາຫີນມາຄວັດເປັນຮູບປັ້ນມະເຫສີເຈົ້າພຣະເຈົ້າໄຊຍະເຊດຖາ ເພື່ອເປັນອະນຸສອນ ແລະ ພຣະເຈົ້າໄຊຍະເຊດຖາກໍໄດ້ຂໍຄວັນຮູບປັ້ນມະເຫສີພຣະເຈົ້າບຸເລັງນອງ ອີກອົງໜື່ງ ເພື່ອໄວ້ຄູ່ກັນ. ສະແດງເຖິງສັນຍາຂອງສໍາພັນໄມຕີ ຄັ້ງປະຫວັດສາດ ພ້ອມນີ້ຍັງໄດ້ຄວັດ ຮູບປັ້ນໂຕມອມ (ໂຕສິງເທບ) ສອງໂຕເປັນທີ່ລະນຶກໄວ້ ທີ່ ວັດອິນແປງຕາບເທົ່າເຖິງປັດຈຸບັນ
ຫໍອູບມຸງ ເປັນບ່ອນປະດິດສະຖານ ພຣະພຸດທະຮູບອິນທາທິຣາດ ຕັ້ງຢູ່ດ້ານທິດເໜຶອຂອງວັດ ພຣະພຸດທະຮູບອົງນີ້ສັກສິດຫລາຍ ເພາະມີເຫດການ ສັກສິດທີ່ເລົ່າຕໍ່ໆກັນມາວ່າ:
ເມື່ອປີ ຄ.ສ 1960 ກ່ອນຈະມີການລັດຖະປະຫານຂອງຮ້ອຍເອກກອງແລນັ້ນ ພຣະເຈົ້າອິນທາທິຣາດ ໄດ້ບັງເກີດມີເຫື່ອໄຫຼໄຄຍ້ອຍ ຈາກອົງພຣະ ເຮັດໃຫ້ປະຊາຊົນ ທັງຄົນລາວ ຈີນ ຫວຽດ ໄດ້ພາກັນເອົາຜ້າ ເອົາສຳລີ ໄປຊັບ ແລະ ເຊັດເອົານ້ຳທີ່ໄຫລອອກຈາກພຣະອົງນີ້ເພື່ອໄປເປັນສິຣິມຸງຄຸນໃນຄອບຄົວ ຕໍ່ຈາກນັ້ນ ປະມານ 2 ເດືອນ ກໍ່ໄດ້ເກີດມີການລັດຖະປະຫານກອງແລ ສະພາບການບ້ານເມືອງໃນຄາວນັ້ນສັບສົນວຸ້ນວາຍ ມີການສູ້ຮົບກັນ ລູກປືນໃຫຍ່ນ້ອຍຕົກມາໃສ່ວັດອິນແປງບໍລິເວນໃກ້ຄຽງພຣະເຈົ້າອິນທາທິຣາດ ແຕ່ກໍ່ບໍ່ແຕກ ແຕ່ຕົກໃສ່ບ້ານເຮືອນຂ້າງວັດ ພັດແຕກ ແລະ ເກີດໄຟໄໝ້.
ພຣະທາດເກົ່າແກ່ສະໄໝບູຮານ ເຊິ່ງລັກສະນະຂອງທາດ ແມ່ນເປັນຊົງແປດຫຼຽມ ເປັນສິລະປະລ້ານຊ້າງສັນນິຖານວ່າ ສ້າງຂື້ນຫຼັງຈາກທີ່ ສ້າງພຣະພຸດທະຮູບອິນແປງ ສໍາເລັດ ໂດຍປະຊາຊົນທີ່ເດີນທາງມາຈາກທ້ອງຖີ່ນອື່ນ ທີ່ຈະເດີນທາງມາຮ່ວມສ້າງ ແຕ່ມາບໍ່ທັນ ຈຶ່ງໄດ້ສ້າງພຣະທາດຂື້ນແທນ ເພື່ອເປັນການສັກກະລະບູຊາ ປະຈຸບັນ ພຣະທາດ ມີຈໍານວນ 4 ທາດ ໃນນັ້ນ ມີ 3 ທາດນ້ອຍ ແລະ 1 ທາດໃຫ່ຍທີ່ສ້າງຈາກເສດຊາກຂອງພຣະທາດນ້ອຍຫຼາຍທາດ ທີ່ໄດ້ພັງທະລາຍລົງ
ຫໍພຣະບາງ ທີ່ຕັ້ງຢູ່ ວັດອິນແປງ ນະຄອນຫລວງວຽງຈັນ ແຫ່ງນີ້ ແມ່ນຖືກສ້າງມາແຕ່ສະໄຫມເຈົ້າຟ້າງຸ່ມ ມະຫາຣາດ ເຊິ່ງຫຼົງເຫຼືອຈາກການຈູດເຜົາ ເມືອງວຽງຈັນ ໃນສະໄໝທີ່ ລາວລ້ານຊ້າງຕົກເປັນປະເທດສະຣາດແກ່ສະຫຍາມ. ຫລັງຈາກໄດ້ອັນເຊີນ ພຣະບາງໄປປະດິດສະຖານຢູ່ ທີ່ເມືອງຊຽງດົງ-ຊຽງທອງແລ້ວ ຫໍພຣະບາງແຫ່ງນີ້ ກໍ່ໄດ້ນໍາໃຊ້ເປັນຫໍພຣະໄຕປີດົກສືບຕໍ່ມາ. ຕົກມາຮອດເມື່ອປີ 1960 ທ່ານຄໍາໃບ ພິລາພັນເດດ ຜູ້ເປັນເຈົ້າມູນລະສັດທາຫລັກໃນການບູຣະນະປະຕິສັງຂອນ ຫໍພຣະບາງແຫ່ງນີ້
ຂອບໃຈແຫລ່ງທີ່ມາ: ອີນໄຊລາວ.