ເມືອງໄຊບູລີ ແຂວງສະຫວັນນະເຂດຄົ້ນພົບວັດຖຸມີຄ່າຫຼາຍລາຍການ
ພົບວັດຖຸບູຮານທີ່ມີຄ່າຫຼາຍລາຍການຢູ່ບ້ານໜອງເຮືອທອງ ເມືອງໄຊບູລີ ແຂວງສະຫວັນນະເຂດ
ປະເທດລາວຖືວ່າເປັນເມືອງທີ່ເຄີຍມີປະຫວັດສາດອັນຈະເລີນຮຸ່ງເຮືອນມາຕັ້ງແຕ່ບູຮານນະການມາແລ້ວ ແລະ ຫລາຍໆຢ່າງທີ່ຍັງສາມາດເປັນຫລັກຖານໄດ້ຈາກການທີ່ຄົ້ນພົບຫລັກຖານຕ່າງໆທີ່ເປັນວັດຖຸຂອງຄົນສະໄໝນັ້ນ, ລ້າສຸດໃນຕົ້ນປີນີ້ ໄດ້ມີການຄົ້ນພົບຂໍ້ມູນຫຼັກຖານໃໝ່ ຢູ່ບ້ານໜອງເຮືອທອງ ເມືອງໄຊບູລີ ແຂວງສະຫວັນນະເຂດ ຄາດວ່າຈະເປັນເມືອງເກົ່າ ໃນສະໄໝບູຮານ
ທ່ານບຸນເລິງ ອິນທິສັກ ຮອງຫົວໜ້າຂະແໜງວັດທະນະທຳ ແຂວງສະຫວັນນະເຂດ ທີ່ເຂົ້າ ຮ່ວມໃນການສຳຫຼວດຂຸດຄົ້ນ ຮ່ວມກັບກົມມໍລະດົກກະຊວງ ຖວທ ແລະຊ່ຽວຊານຈາກສະຖາບັນຝຣັ່ງແຫ່ງພາກຕາເວັນອອກໄກ ໃຫ້ຮູ້ວ່າ :
ແຫຼ່ງບູຮານວິທະຍາ ໜອງເຮືອທອງ ເຊິ່ງກ່ອນໜ້ານີ້ ຄື ໃນປີ 2008 ປະຊາຊົນໄດ້ຂຸດຄົ້ນ ພົບວັດຖຸມີຄ່າຫຼາຍລາຍການ, ປັດຈຸບັນແຂວງສະຫວັນນະເຂດ ເປັນຜູ້ເກັບຮັກສາໄວ້, ຈາກການສໍາຫຼວດເກັບກຳຂໍ້ມູນໃນເບື້ອງຕົ້ນ ບໍລິເວນນີ້ຄາດວ່າຈະເປັນຕົວເມືອງເກົ່າໃນສະໄໝບູຮານ ດັ່ງນັ້ນທາງກະຊວງ ຖວທ ຮ່ວມ ກັບສະຖາບັນຝຣັ່ງແຫ່ງພາກ ຕາເວັນອອກໄກ ຈຶ່ງໄດ້ລົງເກັບກຳຂໍ້ມູນຄືນໃໝ່ ແລະສໍາຫຼວດຂຸດຄົ້ນບາງຈຸດຕາມບໍລິເວນທີ່ ຄາດວ່າຈະແມ່ນຄູເມືອງ ແລະຈຸດທີ່ພົບວັດຖຸມີຄ່າກ່ອນໜ້ານີ້ ໂດຍການສຳຫຼວດເລີ່ມແຕ່ວັນທີ 01 ກຸມພາ 2023 ເປັນຕົ້ນມາ ແລະຮອດປະຈຸບັນໄດ້ຂຸດເພື່ອສໍາຫຼວດເບິ່ງ ຊັ້ນດິນທັງໝົດ 13 ຈຸດ,
ມີບາງຈຸດໄດ້ພົບຫຼັກຖານທີ່ຈະນຳໄປສູ່ການກຳນົດອາຍຸຂອງສະຖານທີ່ ແລະທີ່ເດັ່ນກວ່າໝູ່ແມ່ນ ບໍລິເວນດອນສິມ ໄດ້ພົບດິນຈີ່ເກົ່າແກ່ໂຄງສ້າງອາຄານ ຄາດວ່າຈະມີອາຍຸກວ່າ 2,000 ປີ ແຕ່ການສໍາຫຼວດນີ້ ຈະດຳເນີນໄປຮອດ ວັນທີ 02 ມີນາ 2023 ຈຶ່ງຈະໄດ້ຢຸດລົງ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: