ເມືອງເມິງ ເປີດແຫລ່ງທ່ອງທ່ຽວບໍ່ນ້ຳຮ້ອນຕ້ອນຮັບນັກທ່ອງທ່ຽວ
ເປີດແຫລ່ງທ່ອງທ່ຽວໃໝ່ບໍ່ນໍ້າຮ້ອນປຸ່ງເລາະ ເມືອງເມິງ ໃຫ້ນັກທ່ອງທ່ຽວເຂົ້າມາທ່ຽວຊົມ
ປະຕິບັດຕາມແຜນການເປີດການທ່ອງທ່ຽວ ຕາມເສັ້ນທາງທ່ອງທ່ຽວສີຂຽວ ຂອງແຂວງວາງອອກ ອົງການປົກຄອງບ້ານປຸ່ງເລາະ, ເມືອງເມິງ, ແຂວງບໍ່ແກ້ວ ໄດ້ເປີດບໍລິການໃຫ້ນັກທ່ອງທ່ຽວເຂົ້າມາທ່ຽວຊົມບໍ່ນໍ້າຮ້ອນປຸ່ງເລາະ ພາຍຫຼັງທີ່ພະຍາດໂຄວິດ -19 ໄດ້ຜ່ອນຄາຍລົງ ໃນລະຫວ່າງວັນທີ 12-13 ມີນາ 2022 ນີ້, ເຊິ່ງຈະໄດ້ເປີດຮັບນັກທ່ອງທ່ຽວທັງພາຍໃນ ແລະ ຕ່າງປະເທດ ໃນເດືອນເມສາ 2022 ຈະມາເຖິງນີ້.
ໂດຍອີງໃສ່ແຜນການຟື້ນຟູການທ່ອງທ່ຽວ ຂອງ ສປປ ລາວ, ຕາມແຜນການເປີດປະເທດ ເພື່ອຮອງຮັບນັກທ່ອງທ່ຽວຕ່າງປະເທດ ຕິດພັນກັບແຜນການຕ່າງໆ ຂອງໂຄງການລາວເຊບ ບົນພື້ນຖານຮູບແບບການທ່ອງທ່ຽວເຂດສີຂຽວ.
ດັ່ງນັ້ນ, ອົງການປົກຄອງບ້ານ ພ້ອມດ້ວຍພາກສ່ວນທີ່ກ່ຽວຂ້ອງ ຈຶ່ງໄດ້ພ້ອມກັນປັບປຸງສະຖານທີ່ແຫຼ່ງທ່ອງທ່ຽວບໍ່ນໍ້າຮ້ອນຫ້ວຍປຸ່ງເລາະ ເພື່ອກະກຽມຕ້ອນຮັບນັກທ່ອງທ່ຽວທັງພາຍໃນ ແລະ ຕ່າງປະເທດທີ່ຈະເຂົ້າມາທ່ຽວຊົມບໍ່ນໍ້າຮ້ອນປຸ່ງເລາະ ໃນຊ່ວງບຸນປີໃໝ່ລາວທີ່ຈະມາເຖິງນີ້.
ເປັນຕົ້ນແມ່ນໄດ້ປັບປຸງຕູບນັ່ງພັກເຊົາ, ປັບປຸງຫ້ອງນໍ້າ ແລະ ການບໍລິການອາ ຫານ, ເຄື່ອງດື່ມປະເພດຕ່າງໆໄວ້ຄອຍບໍລິການ ໃຫ້ແກ່ນັກທ່ອງທ່ຽວ ທີ່ຈະເຂົ້າມາທ່ອງທ່ຽວແຂວງບໍ່ແກ້ວ ກໍ່ຄືເມືອງເມິງໃຫ້ມີຄຸນນະພາບດີຂຶ້ນ ທັງນີ້ກໍ່ເພື່ອດຶງດູດນັກທ່ອງທ່ຽວ ໃຫ້ເຂົ້າມາທ່ຽວຊົມແຫຼ່ງທ່ອງທ່ຽວບໍ່ນໍ້າຮ້ອນ ກໍ່ຄືສະຖານທີ່ແຫຼ່ງທ່ອງທ່ຽວຕ່າງໆ ໃຫ້ມີຄວາມປະທັບໃຈ ແລະ ແຫຼ່ງທ່ອງທ່ຽວບໍ່ນໍ້າຮ້ອນປຸ່ງເລາະ ຈະເປີດບໍລິການໃຫ້ນັກທ່ອງທ່ຽວເຂົ້າມາທ່ຽວຊົມໃນທຸກໆມື້ ຈົນຮອດບຸນປີໃໝ່ລາວ ພສ 2565 ທີ່ຈະມາເຖິງນີ້.
ທັງນີ້ ກໍ່ເພື່ອເປັນການກະກຽມຄວາມພ້ອມ ໃຫ້ແກ່ການຮອງຮັບນັກທ່ອງທ່ຽວ ຕາມເສັ້ນທາງທ່ອງທ່ຽວສີຂຽວ ໄລຍະທີ 2 ຕາມແຜນ ຂອງກະຊວງ ກໍ່ຄືພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງບໍ່ແກ້ວວາງອອກ ໃຫ້ໄດ້ຮັບການຈັດຕັ້ງປະຕິບັດຕາມແຜນການວາງອອກ ຕິດພັນກັບການຈັດຕັ້ງປະຕິບັດບັນດາມາດຕະການປ້ອງກັນພະຍາດໂຄວິດ -19 ທີ່ທາງຄະນະສະເພາະກິດຂອງແຂວງ ກໍ່ຄືຂອງເມືອງວາງອອກຢ່າງເຂັ້ມງວດ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ໜັງສືພິມບໍ່ແກ້ວ Bokeo Newspaper