ເມືອງເຟືອງ ແຂວງວຽງຈັນ ເຂດທ່ອງທ່ຽວທີ່ກໍາລັງໄດ້ຮັບຄວາມນິຍົມຈາກນັກທ່ອງທ່ຽວ

ຫາກທ່ານຍັງບໍ່ທັນໄດ້ໄປທ່ຽວເມືອງເຟືອງເທືອ ທ່ານຕ້ອງຍາດເວລາໄປໃຫ້ໄດ້, ເຊິງປະຈຸບັນເມືອງເຟືອງພວມເອົາໃຈໃສ່ຈັດສັນ ຄຸ້ມຄອງສະຖານທີ່ທ່ອງທ່ຽວແຫ່ງຕ່າງໆ ພາຍໃນເມືອງໃຫ້ເຂົ້າສູ່ຄວາມເປັນລະບຽບ ສວຍງາມ ສາມາດດຶງດູດນັກທ່ອງທ່ຽວທັງພາຍໃນແລະຕ່າງປະເທດ ໃຫ້ເຂົ້າໄປທ່ອງທ່ຽວນັບມື້ນັບຫລາຍ ສາມາດສ້າງວຽກເຮັດງານທໍາ ກໍຄືສ້າງລາຍຮັບໃຫ້ປະຊາຊົນພາຍໃນເມືອງໃຫ້ນັບມື້ນັບຫລາຍ.

ທ່ານນາງ ສົມຄິດ ຈິດດາວົງ ຫົວໜ້າຫ້ອງການ ຖະແຫລງຂ່າວ ວັດທະນະທໍາ ແລະທ່ອງທ່ຽວ ເມືອງເຟືອງ ແຂວງວຽງຈັນໃຫ້ຮູ້ວ່າ:

ເມືອງເຟືອງມີແຫຼ່ງທ່ອງທ່ຽວທາງດ້ານທໍາມະຊາດ, ປະຫວັດສາດ ແລະວັດທະນະທໍາທີ່ໄດ້ຮັບຄວາມນິຍົມຫລາຍແຫ່ງ, ສະເພາະແຫລ່ງທ່ອງທ່ຽວດ້ານທໍາມະຊາດປະກອບມີ:

ຫາດຜາຕັ້ງ, ຫາດດອນກາງໃຫຍ່, ຫາດດອນກາງນ້ອຍນໍ້າສາມຄອນ, ແຫ່ລງທ່ອງທ່ຽວດ້ານປະຫວັດສາດປະກອບມີຫໍສີລາຈາລຶກ, ຫໍມູນເຊື້ອຕົ້ນແຕ້ຈາລຶກຄວາມແຄ້ນຂອງຊາວເມືອງເຟືອງ, ສະຖານທີ່ທ່ອງທ່ຽວດ້ານ ວັດທະນະທຳ ແມ່ນວັດສິນໄຊຍະຣາມ ບ້ານໂນນຫີນແຮ່ ທີ່ຕິດພັນກັບຕຳນານນິທານເລື່ອງສັງສິນໄຊ, ວັດບ້ານຜາສັງ, ວັດບ້ານນາເມືອງ ແລະແຫ່ງອື່ນໆອີກ

ນອກນີ້ ຍັງມີສະຖານທີ່ຫລາຍແຫ່ງ ທີ່ສາມາດພັດທະນາໃຫ້ເປັນແຫຼ່ງທ່ອງທ່ຽວໃນຕໍ່ໜ້າໄດ້ອີກ ປະຈຸບັນມີນັກທ່ອງທ່ຽວທັງໃນລະຕ່າງປະເທດ ເຂົ້າໄປທ່ຽວ ເມືອງເຟືອງປະມານ 1.400 ຫາ 1.600 ຄົນຕໍ່ເດືອນ.

ທ່ານນາງ ສົມຄິດ ຈິດດາວົງ ໃຫ້ຮູ້ອີກວ່າ: ຍ້ອນວຽກງານທ່ອງທ່ຽວຢູ່ເມືອງເຟືອງໄດ້ມີການຂະຫຍາຍຕົວຢ່າງວ່ອງໄວ ແບບກ້າວກະໂດດ ໂດຍຫ້ອງການ ຖວທ ເມືອງ ໄດ້ຊຸກຍູ້ຜູ້ປະກອບກິດຈະການ ດ້ານການບໍລິການທ່ອງທ່ຽວ ໃຫ້ເອົາໃສ່ປະຕິບັດຕາມລະບຽບ, ກົດໝາຍ, ແຈ້ງການ, ຄຳສັ່ງແນະນໍາຕ່າງໆ , ເພື່ອ ຮັກສາໄດ້ດ້ານວັດທະນະທຳ ຮີດຄອງປະເພນີ, ຄວາມປອດໄພຂອງນັກທ່ອງທ່ຽວ, ຮັກສາທຳມະຊາດ, ສິ່ງແວດລ້ອມ, ແລະໃຫ້ບໍລິການທີ່ດີແກ່ນັກທ່ອງທ່ຽວ.

ປະຈຸບັນຢູ່ເມືອງເຟືອງມີເຮືອນພັກ ແລະລີສອດທັງໝົດ 32 ແຫ່ງ, ເປັນຕົ້ນ: ເຮືອນພັກຊົງລາວ ບ້ານເມືອງເຟືອງ, ເຮືອນພັກແຄນລາວ, ເຮືອນພັກວັງນໍ້າທິບ, ເຮືອນພັກບ້ານສາມໝື່ນວີວໂຮມສະເຕ, ລີສອດເພັດມັງກອນ, ລີສອດອ່າງນໍ້າຕົງ; ນອກນີ້ ກໍມີຮ້ານອາຫານ ຮ້ານກິນດື່ມ, ເຮືອນພັກແບບຄອບຄົວຈຳນວນໜື່ງ ພ້ອມໃຫ້ບໍລິການແກ່ນັກທ່ອງທ່ຽວ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບ​ໃຈແຫຼ່ງຂໍ້ມູນຈາກ:  Lao National Radio