ເຊີນຊົມ! ການແຂ່ງຂັນເຮືອຊ່ວງທີ່ທ່າວັດໃຫຍ່ໄຊຍະພູມ ທີ່ນະຄອນໄກສອນ
ສະຫວັນນະເຂດ ກຽມຈັດງານປະເພນີອອກພັນສາ-ຊ່ວງເຮືອ ທີ່ທ່າວັດໃຫຍ່ໄຊຍະພູມ.
ນະຄອນໄກສອນ ພົມວິຫານ ໄດ້ມີການກະກຽມຈັດງານ ແຂ່ງຂັນເຮືອຊ່ວງ ຫລັງຈາກບໍ່ໄດ້ຈັດມາສອງສາມປີ ເນື່ອງຈາກການລະບາດຂອງພະຍາດໂຄວິດ-19, ແລະ ໃນປີນີ້ຖືວ່າມາດຕະການຄວບຄຸມໄລຍະຜ່ານມາເຮັດໃຫ້ການລະບາດຂອງພະຍາດນ້ອຍລົງ ປະຊາຊົນສາມາດມາເຄືອນໄຫວຈັດກິດຈະກຳຕາມປົກກະຕິໄດ້.
ຫລ້າສຸດໃນວັນທີ 13 ກັນຍາ 2022 ນີ້ ເຈົ້າຄອງນະຄອນໄກສອນພົມວິຫານ ແຂວງສະຫວັນນະເຂດ ແຈ້ງເຖິງບັນດາເຈົ້າເມືອງ 14 ເມືອງ, ບັນດາກຳມະການພັກຜູ້ຊີ້ນຳ 13 ກຸ່ມບ້ານທົ່ວນະຄອນ, ນາຍບ້ານທົ່ວນະຄອນ, ສະໂມສອນເຮືອຊ່ວງພາຍໃນແຂວງສະຫວັນນະເຂດ ແລະ ຕ່າງແຂວງ, ບັນດາພະແນກການກົມກອງ, ບໍລິສັດ ຫ້າງຮ້ານ ແລະ ບັນດາອົງການຈັດຕັ້ງທັງພາກລັດ-ເອກະຊົນ ທີ່ມີ
ເຮືອຊ່ວງ ເຊີນເອົາເຮືອພາຍເຂົ້າຮ່ວມແຂ່ງຂັນຊ່ວງເຮືອ ປະຈໍາປີ 2022 ທີ່ ສະໜາມທ່າວັດໃຫຍ່ໄຊຍະພູມ ເຊິ່ງຈະໄດ້ຈັດຂຶ້ນໃນລະຫວ່າງວັນທີ 01-11 ຕຸລາ 2022.
ແລະ ຂໍເຊີນຊວນໃຫ້ບັນດາພໍ່ແມ່ພີນ້ອງ ປະຊາຊົນທຸກຊັ້ນຄົນຮ່ວມກິດຈະກຳ ຮ່ວມເຊຍ ຮ່ວມຊົມໃນງານບຸນປະເພີນີ້ຄັ້ງນີ້ໃຫ້ຟົດຟື້ນຢ່າງປົກກະຕິດັ່ງທີ່ຄວນຈະເປັນກ່ອນການລະບາດຂອງພະຍາດໂຄວິດ-19 ໃນສອງສາມປີທີ່ຜ່ານມານັ້ນ.
ການແຂ່ງຂັນເຮືອຊ່ວງ ປະກອບມີການແຂ່ງຂັນເຮືອ 02 ລຸ້ນຄື: ເຮືອລຸ້ນໃຫຍ່ 41 – 55 ສີພາຍ ແລະ ເຮືອລຸ້ນກາງ 31 – 40 ສີພາຍ.
ສໍາລັບເງື່ອນໄຂ, ຂອງຂວັນລາງວັນ ພົວພັນສະໝັກໄດ້ທີ່: ຫ້ອງການສຶກສາທິການ ແລະ ກິລານະຄອນໄກ
ສອນພົມວິຫານ (ໜ່ວຍງານກິລາກາຍະກໍາ) ຂ້າງສະໂມສອນດອກປີກໄກ່ຂອງແຂວງ (ບ້ານທ່າເມືອງ) ເລີ່ມແຕ່ວັນປະກາດແຈ້ງການສະບັບນີ້ເປັນຕົ້ນໄປໃນໂມງລັດຖະການ, ປິດຮັບສະໝັກວັນທີ 06 ຕຸລາ 2022.
ວັນທີ 07 ຕຸລາ 2022, ເວລາ 08:30 ນາທີ ປະຊຸມຈັບສະຫຼາກແບ່ງສາຍ ທີ່ຫ້ອງການສຶກສາທິການ ແລະ ກິລານະຄອນ (ທີ່ໜ່ວຍງານກິລາກາຍະກຳ).
ເຮືອທີ່ເຂົ້າຮ່ວມການແຂ່ງຂັນແຕ່ລະລຸ້ນ ຂໍໃຫ້ຜູ້ຈັດການເຮືອສົ່ງລາຍຊື່ສີພາຍຂອງຕົນໃຫ້ຄະນະກໍາມະການໃນມື້ຈັບສະຫຼາກແບ່ງສາຍ ເພື່ອຄວາມເປັນລະບຽບຮຽບຮ້ອຍ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: laoedaily.com