ເກີນຄາດ! ນັກທ່ອງທ່ຽວເດີນທາງທ່ອງທ່ຽວຢູ່ຫລວງພະບາງຢ່າງຫລວງຫລາຍ
ນັກທ່ອງທ່ຽວເຂົ້າແຂວງຫລວງພະບາງຢ່າງຫລວງຫລາຍເພື່ອສະຫລອງເທສະການປີໃຫມ່ລາວ.
ນະຄອນຫລວງພະບາງຍັງຄົງຄືກຄື້ນຕາມແບບສະບັບທີ່ເຄີຍເປັນ, ໄດ້ມີນັກທ່ອງທ່ຽວພາຍໃນປະເທດ ເດີນທາງໄປທ່ອງທ່ຽວຢູ່ນະຄອນຫລວງພະບາງ ກໍຄື ແຂວງຫລວງພະບາງ ໃນໄລຍະສະເຫລີມສະຫລອງສົ່ງທ້າຍປີເກົ່າ ພສ 2564, ຕ້ອນຮັບປີໃໝ່ລາວ ພສ 2565 ເກີນຄາດໝາຍທີ່ວາງໄວ້ ເຮັດໃຫ້ມີບັນຍາກາດຟົດຟື້ນມ່ວນຊື່ນກວ່າປີທີ່ຜ່ານມາທີ່ມີການແຜລະບາດຂອງໂຄວິດ-19.
ແຕ່ອະນຸຍາດໃຫ້ຈັດຕາມຮີດຄອງປະເພນີອັນດີງາມທີ່ເຄີຍປະຕິບັດສືບທອດກັນມາຢູ່ແຕ່ລະບ້ານ ແລະ ແຕ່ລະຄອບຄົວ, ສ່ວນການຫົດສົງພະບາງ ແມ່ນໃຫ້ຫົດສົງກັບທີ່ແຕ່ບໍ່ໄດ້ມີການແຫ່ເປັນຂະບວນຄືເມື່ອກ່ອນ ເຮັດໃຫ້ອົງການປົກຄອງນະຄອນຫລວງພະບາງ ຄາດວ່າຈະມີນັກທ່ອງທ່ຽວໄປທ່ອງທ່ຽວບໍ່ຫລາຍ, ແຕ່ກົງກັນຂ້າມ ເມື່ອຮອດມື້ສະເຫລີມສະຫລອງປີໃໝ່ລາວ ແມ່ນມີນັກທ່ອງທ່ຽວໄປທ່ອງທ່ຽວຢ່າງຫລວງຫລາຍ ເຊີ່ງສ່ວນໃຫຍ່ແມ່ນນັກທ່ອງທ່ຽວພາຍໃນປະເທດ.
ເຈົ້ານະຄອນຫລວງພະບາງ ໃຫ້ຮູ້ຕື່ມວ່າ: ສາເຫດທີ່ເຮັດໃຫ້ມີນັກທ່ອງທ່ຽວໄປທ່ອງທ່ຽວຢູ່ຫລວງພະບາງ ຈໍານວນຫລວງຫລາຍໃນໂອກາດປີໃໝ່ລາວປີນີ້ ຍ້ອນຫລວງພະບາງເປັນເມືອງທ່ອງທ່ຽວ, ບວກກັບການເດີນທາງໄປຫລວງພະບາງ ມີຄວາມສະດວກສະບາຍຫລາຍ ໂດຍສະເພາະການເດີນທາງດ້ວຍລົດໄຟລາວ-ຈີນ ທີ່ພວມໄດ້ຮັບຄວາມນິຍົມສູງໃນປັດຈຸບັນນີ້.
ຢ່າງໃດກໍຕາມ ເມື່ອມີນັກທ່ອງທ່ຽວເດີນທາງໄປຫລາຍຄືດັ່ງກ່າວ, ດ້ວຍຄວາມມີໄມຕຣີຈິດ ມິດຕະພາບທີ່ດີຂອງຊາວຫລວງພະບາງ ໃນການຕ້ອນຮັບແຂກຄົນທີ່ມີມາແຕ່ດົນນານ, ຊາວຫລວງພະບາງທຸກຄົນແມ່ນຍິນດີຕ້ອນຮັບນັກທ່ອງທ່ຽວທັງໝົດ, ເຊີ່ງອົງການປົກຄອງແຂວງ ກໍຄື ອົງການປົກຄອງນະຄອນຫລວງພະບາງ ໄດ້ມອບໃຫ້ເຈົ້າໜ້າທີ່ກ່ຽວຂ້ອງຕິດຕາມ ແລະ ອໍານວຍຄວາມສະດວກໃຫ້ນັກທ່ອງທ່ຽວຢູ່ຕາມສະຖານທີ່ທ່ອງທ່ຽວຕ່າງໆ ເພື່ອຮັບປະກັນໃຫ້ມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ,
ພ້ອມທັງຮຽກຮ້ອງໃຫ້ນັກທ່ອງທ່ຽວທຸກຄົນເປັນເຈົ້າການປະຕິບັດມາດຕະການປ້ອງກັນພະຍາດໂຄວິດ-19 ຕາມທີ່ອົງການປົກຄອງແຂວງ ກໍຄື ອົງການປົກຄອງນະ ຄອນຫລວງພະບາງ ວາງອອກຮ່ວມກັນ ເພາະແນວໃດນັກທ່ອງທ່ຽວກໍ່ໄດ້ເດີນທາງໄປຫລວງພະບາງແລ້ວ ກໍ່ຢາກໃຫ້ທຸກຄົນມີຄວາມເບີກບານມ່ວນຊື່ນໃນໂອກາດປີໃໝ່ລາວ. ທັງເປັນການຟື້ນຟູການທ່ອງທ່ຽວຢູ່ຫລວງພະບາງ ໃຫ້ກັບມາຟົດຟື້ນອີກຄັ້ງ ພາຍຫລັງທີ່ງຽບເຫົງາມາດົນ ຍ້ອນການລະບາດຂອງພະຍາດໂຄວິດ-19.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: Lao Youth Radio