ບ້ານຜາບັງ ເມືອງເຊໂປນ ແຂວງສະ ຫວັນນະເຂດ ໄດ້ຈັດພິທີ ມອບອະນຸສອນສະຖານ ທ່ານ ມາ ໄຂຄຳພິທູນ ໃຫ້ອຳນາດການປົກຄອງເມືອງເຊໂປນ ເປັນຜູ້ເບິ່ງແຍງ ແລະ ປົກປັກຮັກສາໃນວັນທີ 21 ເມສາ 2022 ຜ່ານ​ມານີ້, ໂດຍມີ ທ່ານ ນາງ ຫລິງທອງ ແສງຕະວັນ ຮອງເຈົ້າແຂວງສະຫວັນນະເຂດ, ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ທອງໃສ ໄຊຍະວົງຄຳດີ ຫົວໜ້າຫ້ອງວ່າການແຂວງ, ມີອຳນາດການປົກຄອງເມືອງເຊໂປນ ແລະ ພາກສ່ວນກ່ຽວຂ້ອງ ເຂົ້າຮ່ວມ

ໂອກາດນີ້, ທ່ານ ທອງສະຫວັດ ໄຂຄຳພິທູນ ອະດີດພະນັກອາວຸດໂສບຳນານ ໄດ້ກ່າວວ່າ: ຂ້າພະເຈົ້າ ລູກຫລານຕະກຸນ ໄຂຄຳພິທູນ ໄດ້ມີສັດທາສ້າງອະນຸສອນສະຖານຂອງປູ່, ຂອງພໍ່ ມາ ໄຂຄຳພິທູນ ອາດີດນັກຮົບປະຕິວັດອະວຸດໂສ ຜູ້ທີ່ມີຄຸນງາມຄວາມດີ, ທັງເປັນລູກຫລານຂອງບ້ານຜາບັງ ເພື່ອເປັນການສະແດງຄວາມເຄົ້າຄົບຮັກ ແລະ ຮູ້ບຸນ ຄຸນຕໍ່ຜູ້ເປັນປູ່, ເປັນພໍ່ ທີ່ໄດ້ເສຍສະຫລະຊີວິດ ແລະ ອຸທິດຕົນ ເພື່ອພາລະກິດປະຕິວັດຕະຫລອດມາ.

ໄລຍະ 10 ກວ່າປີທີ່ຜ່ານມາ, ລູກຫລານຕະກູນ ໄຂຄຳພິທູນ ໄດ້ມີສັດທາ ແລະ ພະ ຍາຍາມສ້າງອະນຸສອນສະຖານ ນີ້ຂຶ້ນ ໂດຍຖືເອົາຄຳປາຖະໜາຂອງເພີ່ນກ່ອນທີ່ຈະເສຍຊີວິດ ໃນວັນທີ 02/04/1994 ທີ່ວ່າ: ໃຫ້ເອົາອັດຖິຂອງເພີ່ນ ເມືອສະຖິດໄວ້ທີ່ດິນແດນບ້ານຜ້າບັງ ແລະ ມື້ນີ້, ຕາງໜ້າໃຫ້ລູກຫລານຕະກຸນ ໄຂຄຳພິທູນ ຂໍມອບຄວາມຮັບຜິດຊອບເບິ່ງແຍງ, ປົກປັກຮັກສາ ແລະ ເສີມຂະຫຍາຍຄຸນຄ່າຂອງອະນຸສອນສະຖານແຫ່ງນີ້ໃຫ້ ຄະນະພັກ- ອໍານາດການປົກຄອງເມືອງເຊໂປນ ຢ່າງເປັນທາງການ.

ທ່ານ ທອງໃສ ໄຊຍະວົງຄໍາດີ ໄດ້ກ່າວວ່າ: ອະນຸສອນສະຖານ ຂອງທ່ານ ມາ ໄຂຄຳພິທູນ ແຫ່ງນີ້ ຈະກາຍເປັນບ່ອນສັກກະລະບູຊາ, ເປັນບ່ອນສຶກສາອົບຮົມທາງດ້ານແນວຄິດການເມືອງ ແລະ ເປັນຂີດໝາຍອີກແຫ່ງໜຶ່ງທີ່ສະແດງເຖິງ ຄວາມຈົ່ງຮັກພັກດີຕໍ່ປະເທດຊາດ. ໃນນາມຕາງໜ້າໃຫ້ອຳນາດການປົກຄອງແຂວງ ກໍຄື ເມືອງເຊໂປນ ຂໍປະຕິຍານຕໍ່ການນຳພັກ-ລັດວ່າ: ຈະເອົາໃຈໃສ່ສຸດຄວາມສາມາດໃນການເບິ່ງແຍງ, ຄຸ້ມຄອງ, ປົກປັກຮັກສາ ແລະ ເສີມຂະຫຍາຍຄຸນປະໂຫຍດຂອງອະນຸສອນສະຖານ ແຫ່ງນີ້ໃຫ້ເກີດຜົນປະໂຫຍດສູງສຸດ.

ທ່ານ ມາ ໄຂຄຳພິທູນ ພະນັກງານປະຕິວັດອາວຸດໂສ ເກີດ 19.10.1909 ທີ່ບ້ານຜາບັງ ເມືອງເຊໂປນ ແຂວງສະຫວັນນະເຂດ. ນັບແຕ່ປີ 1945 ຖືກແຕ່ງຕັ້ງເປັນພະນັກ ງານຫລັກແຫລ່ງນຳພາທະຫານລາວອິດສະຫລະ ແລະ ອາສາສະໝັກຫວຽດນາມ; ປີ 1947-1949 ໄດ້ເຄື່ອນໄຫວຢູ່ແຂວງຫົວພັນ, ວັນທີ 20.01.1949 ເຂົ້າເປັນສະມາຊິກພັກກອມມູນິດອິນດູຈີນ; ປີ 1950 ໄດ້ຖືກແຕ່ງຕັ້ງເປັນກຳມະການສູນກາງແນວລາວອິດສະ ຫລະ; ປີ 1951 ຖືກແຕ່ງຕັ້ງເປັນຜູ້ແທນລັດຖະບານລາວຕໍ່ຕ້ານ ຢູ່ແຂວງພາກກາງ; ປີ 1953 ໄດ້ຮັບການແຕ່ງຕັ້ງເປັນປະທານປົກຄອງແຂວງຫົວພັນ; ປີ 1957 ລວມລາວ-ເປັນຮອງເຈົ້າແຂວງຫົວພັນ; ປີ 1958-60 ຖືກກັກຂັງພ້ອມບັນດາຜູ້ນຳ ຢູ່ຄຸກໂພນເຄັງ; ປີ 1961 ໄດ້ຖືກແຕ່ງຕັ້ງເປັນເລຂາພັກແຂວງ ແລະ ປະທານແຂວງຫົວພັນ; ປີ 1964 ໄດ້ໄປຍົກລະດັບທິດສະດີມາກ-ເລນິນ ຢູ່ຕ່າງປະເທດ; ປີ 1971 ໄດ້ຮັບການເລືອກຕັ້ງໃຫ້ເປັນເລຂາພັກແຂວງຫົວພັນ; ປີ 1972 ຖືກແຕ່ງຕັ້ງເປັນກຳມະການສູນກາງພັກ; ປີ 1975 ຖືກແຕ່ງຕັ້ງເປັນປະທານກຳມາທິການແຜນການແຫ່ງລັດ, ຖືກມອບໝາຍຈາກລັດຖະບານ ເປັນຫົວໜ້າຄະນະຂີດເສັ້ນຊາຍແດນ ລາວ-ຫວຽດນາມ; ປີ 1981 ຖືກແຕ່ງຕັ້ງເປັນລັດ ຖະມົນຕີ ປະຈຳສຳນັກງານນາຍຍົກລັດຖະມົນຕີ ຮັບຜິດຊອບການຂຸດຄົ້ນແຮ່ທາດຢູ່ແຂວງສະຫວັນນະເຂດ; ປີ 1982 ໃນກອງປະຊຸມໃຫຍ່ ຄັ້ງທີ III ໄດ້ຖືກແຕ່ງຕັ້ງຄືນໃໝ່ເປັນກຳມະການສູນກາງພັກ; ປີ 1989 ໄດ້ອະນຸມັດໃຫ້ພັກການຮັບບຳນານ. ມາຮອດວັນທີ 02 ເມສາ ປີ 1994 ທ່ານ ມາ ໄຂຄຳພິທູນ ໄດ້ເສຍຊີວິດລວມ ອາຍຸ 85 ປີ.

ຕິດຕາມ​ຂ່າວການ​ເຄືອນ​ໄຫວທັນ​​ເຫດ​ການ ເລື່ອງທຸ​ລະ​ກິດ ແລະ​ ເຫດ​ການ​ຕ່າງໆ ​ທີ່​ໜ້າ​ສົນ​ໃຈໃນ​ລາວ​ໄດ້​ທີ່​ DooDiDo

ຂອບ​ໃຈແຫລ່ງ​ທີ່​ມາ​: ຂ​ປ​ລ.