ສໍາມະນາ ແລະ ປາຖະກະຖາ ມີຄວາມໝາຍຕ່າງກັນແນວໃດ?

SA Game

DooDiDo

ຄຳວ່າ ສໍາມະນາ ແລະ ປາຖະກະຖາ ມີຄວາມໝາຍຄືກັນ ແລະ ຕ່າງກັນແນວໃດ?

ເປັນອີກຄໍາສັບໜຶ່ງທີ່ຫາກບໍ່ສືກສາເບິ່ງລະອຽດແທ້ຈະເຂົ້າໃຈຄວາມໝາຍຂອງສອງຄຳນີ້ຜິດໄປ ແລະ ກໍ່ເຊືອວ່າບາງທ່ານຄົງຄິດວ່າເປັນຄວາມໝາຍອັນດຽວກັນ, ຄວາມໝາຍຂອງສອງຄຳນີ້ແມ່ນອາດເວົ້າໄດ້ວ່າມີຄວາມໝາຍຄ້າຍຄືກັນແຕ່ການນຳໄປໃຊ້ທາງດ້ານເນື້ອໃນໃຈຄວາມແມ່ນມີຄວາມແຕກຕ່າງກັນ.

ບົດຄວາມຕອນນີ້ ເຮົາຈະເວົ້າມາເຖິງຄໍາວ່າ ສໍາມະນາ ແລະ ປາຖະກະຖາ ສອງຄໍານີ້ຫຼາຍຄົນມັກຫຼົງວ່າແມ່ນຄໍາດຽວກັນ ສາມາດໃຊ້ຄໍາໃດກໍ່ໄດ້ ແຕ່ໃນຄວາມເປັນຈິງແລ້ວມັນມີຄວາໝາຍທີ່ແຕກຕ່າງກັນ. ສະນັ້ນ, ເພື່ອທໍາຄວາມເຂົ້າໃຈຢ່າງເລິກເຊິ່ງກ່ຽວກັບສອງຄໍານີ້ ເຮົາຂໍນໍາເອົາຂໍ້ມູນບາງສ່ວນຈາກວັດຈະນານຸກົມພາສາລາວ ສະບັບຄົ້ນຄວ້າ ແລະ ຮຽບຮຽງ ໂດຍ ທອງຄຳ ອ່ອນມະນີສອນ, ເພື່ອມາອະທິບາຍຄວາມໝາຍສອງຄໍາສັບດັ່ງກ່າວ ດັ່ງນີ້:

SA Game
DooDiDo
ຄຳວ່າ ສໍາມະນາ.

ສໍາມະນາ ໃຊ້ເປັນຄໍາກໍາມະ ມີຄວາມໝາຍວ່າ: ການປະຊຸມ ເພື່ອແລກປ່ຽນຄໍາຄິດເຫັນ ແລະ ຄວາມຮູ້ທາງດ້ານວິຊາການ ໂດຍມີຈຸດ ປະສົງ ແລະ ເປົ້າໝາຍອັນແນ່ນອນ, ຜົນຂອງການສໍາມະນາຖືວ່າເປັນພຽງຂໍ້ສະເໜີແນະ ຜູ້ເຂົ້າຮ່ວມທີ່ກ່ຽວຂ້ອງຈະນໍາໄປປະຕິບັດຕາມ ຫຼືບໍ່ປະຕິບັດກໍໄດ້.

ຕົວຢ່າງ:

ໃນທຸກໆເດືອນບໍລິສັດຈະຈັດການສໍາມະນາກ່ຽວກັບວິທີການເປັນຜູ້ນໍາດ້ານການຂາຍເຄື່ອງທາງອອນລາຍ.

ຄຳວ່າ ປາຖະກະຖາ.

ປາຖະກະຖາ ໃຊ້ເປັນຄໍາກໍາມະ ມີຄວາມໝາຍໝາຍວ່າ: ການບັນຍາຍ ເພື່ອເຜີຍແຜ່ຜົນຂອງກອງປະຊຸມ, ມະຕິຄໍາສັ່ງຕ່າງໆຂອງພັກ-ລັດ, ລວມເຖິງເລົ່າຫວນຄືນປະຫວັດສາທີ່ສໍາຄັນຂອງຊາດ ໃຫ້ແກ່ຜູ້ເຂົ້າຮ່ວມໄດ້ຮັບຟັງ ເພື່ອນໍາໄປຈັດຕັ້ງປະຕິບັດ ແລະ ໝູນໃຊ້ໃນຊີວິດປະຈໍາວັນ ລວມເຖິງໃນການປະບັດໜ້າທີ່ວຽກງານ.

ຕົວຢ່າງ:

ໃນໂອກາດຊົມເຊີຍວັນຊາດທີ 2 ທັນວາ, ອົງການຈັດຕັ້ງຂອງລັດໄດ້ມີການປະຖະກະຖາ
ກ່ຽວກັບວິລະກໍາການຕໍ່ສູ້ປົດປ່ອຍຊາດໃຫ້ແກ່ພະນັກງານໜຸ່ມນ້ອຍ.

ສະຫຼຸບ.

ຄໍາວ່າ ສໍາມະນາ ແລະ ປະຖະກະຖາ ໂດຍຄວາມແລ້ວມັນມີຄວາມໝາຍທີ່ແຕກຕ່າງກັນ, ຊຶ່ງຄໍາວ່າ ສໍາມະນາ ແມ່ນໝາຍເຖິງການປະຊຸມແລກປ່ຽນຄວາມຄິດເຫັນ ແລະ ຄວາມຮູ້ທາງດ້ານວິຊາການ, ສ່ວນຄໍາວ່າ ປະຖະກະຖາ ແມ່ນໝາຍເຖິງການບັນຍາຍເພື່ອເຜີຍແຜ່ຜົນຂອງກອງປະຊຸມໃດໜຶ່ງ ທີ່ສໍາຄັນຂອງພັກ-ລັດ ລວມເຖິງເຫດການສໍາຄັນຂອງຊາດ.

ຕິດຕາມ​ຂ່າວການ​ເຄືອນ​ໄຫວທັນ​​ເຫດ​ການ ເລື່ອງທຸ​ລະ​ກິດ ແລະ​ ເຫດ​ການ​ຕ່າງໆ ​ທີ່​ໜ້າ​ສົນ​ໃຈໃນ​ລາວ​ໄດ້​ທີ່​ DooDiDo