ວັດປ່າພູເຂົາຄວາຍ ອີກໜຶ່ງສະຖານທີ່ສັກສິດທີ່ປະຊາຊົນລາວໄປກາບໄວ້
ວັດປ່າພຣະບາດພູເຂົາຄວາຍ ດິນແດນແຫ່ງອະຣິຍະທຳ ແລະ ທຳມະຊາດທີ່ລໍ້າຄ່າ.
ວັດປ່າພູເຂົາຄວາຍແມ່ນວັດ ແລະ ສະຖານທີສັກສິດແຫ່ງໜຶ່ງທີ່ປະຊາຊົນບັນດາເຜົ່າມັກໄປສັກຄະລະບູຊາເຫລື້ອມໃສ່, ເຊິງໃນແຕ່ລະປີຈະມີບັນດາຍາດໂຍມຜູ້ມີໃຈບູນ ເຫລື້ອມໃສໃນສາສະໜາເຂົ້າມາກາບໄວ້ຂໍພອນເປັນປະຈຳ, ວັດປ່າພູເຂົາຄວາຍ ແມ່ນຄົ້ນພົບຮອຍພະບາດ ໃນປີ 1991 ຈາກນັ້ນຕໍ່ມາໃນປີ 1997 ໄດ້ຮັບ ການສ້າງຕັ້ງຂຶ້ນ ແລະ ພັດທະນາຕະຫລອດມາ ຮອດປັດຈຸບັນນີ້.
ວັດແຫ່ງນີ້ ຕັ້ງຢູ່ບ້ານນາຍາງ ເມືອງທຸລະຄົມ ແຂວງວຽງຈັນ, ການເດີນທາງຈາກ ນະຄອນຫຼວງວຽງຈັນ ແມ່ນໄປຕາມທາງເລກ 10 ປະມານ 25 ກິໂລແມັດ ລ້ຽວຂວາ ເຂົ້າໄປຜ່ານບ້ານນານົກຂຸ້ມ ແລະ ບ້ານນາຍາງ ຕື່ມປະມານ 3 ກິໂລແມັດເຫັນປະຕູໂຂງໃຫຍ່, ເຊິງວັດແຫ່ງນີ້ໄດ້ປັບປຸງ ແລະ ສ້າງເສັ້ນທາງອຳນວຍຄວາມສະດວກໃຫ້ແກ່ປະຊາຊົນທີ່ເດີນທາງໄປມາຂົງເຂດນີ້.
ເມື່ອຜ່ານປະຕູໂຂງວັດລ້ຽວຊ້າຍເຂົ້າໄປທາງໃນ ຈະເຫັນອົງພະທາດ ກວມຮອຍພະບາດ, ພະທາດໜ່ວຍນີ້ ເປັນ ຮູບຈຳລອງບ່ອນພະພຸດທະອົງ ຊົງຕັດສະຣູ້, ຕໍ່ດ້ວຍທາດນ້ອຍ4 ໜ່ວຍຢູ່ແຈ ສູງ 7 ແມັດ ທີ່ມີຮູບຊົງລວດລາຍ ແບບປານີດ ວິຈິດບັນຈົງ ແລະ ງົດງາມ, ມີສາລາໂຮງທຳຕັ້ງຢູ່ເທິງແຜ່ນຫີນດານໃຫຍ່, ມີສະຖານທີ່ຈຳລອງທີ່ພະພຸດທະອົງ ຊົງປະຣິນິບພານ, ມີພະພຸດທະຮູບໃຫຍ່ປາງໃສຍາດ, ມີສວນລຸມພິນີ ຈຳລອງວັນທີ່ພະພຸດທະອົງຊົງປະສູດ, ມີຮູບປັ່ນສັດໃນປ່າຫິມະພານ ແລະ ອື່ນໆ.
ຕາມການຊາລືກັນວ່າ ມີຄັ້ງໜຶ່ງຫລວງພໍ່ຄູນເຄີຍມານັງສະມາທິຢູ່ບໍລິເວນພູເຂົາຄວາຍແຫ່ງນີ້ ແລະ ໄດ້ປາບບັນດາປີສາດ ຫລື ສິ່ງຊົວຮ້າຍທີ່ມາລົບກວນຢາພໍ່ ແລະ ໄດ້ສະແດງອິດທິລິດຢູ່ນີ້.
ນອກຈາກນີ້ ວັດດັ່ງກ່າວ ຍັງອ້ອມຮອບດ້ວຍທຳມະຊາດ, ປ່າຕຶບດົງໜາ, ແມ່ນໍ້າລຳທານ, ຖໍ້າ, ສັດປ່ານາໆພັນ ແລະ ເປັນເຂດຮັກສາຕົ້ນໄມ້ເຄືອເຂົາທີ່ເປັນຢາອີກດ້ວຍ.
ສະຖານທີ່ສັກສິດດັ່ງກ່າວ ເປັນບ່ອນປະຕິບັດທຳທາງພຸດທະສາສະໜາ ເປັນພຸດທະບູຊາ ທຳມະບູຊາ ສັງຄະບູຊາ ແລະ ມໍລະດົກອັນລໍ້າຄ່າຂອງຊາວພຸດ ໂດຍສະເພາະຊາວລາວເຮົາ.
ຫາກວ່າທ່ານຍັງບໍ່ທັນໄດ້ໄປກາບໄວ້ ຕ້ອງໄດ້ຫາເວລາໄປຈະໄດ້ສຳພັດເຖິງບັນຍາກາດ ແລະ ອາດກາດທີ່ສົດຊື່ນ, ອົບອຸ່ນທາງຈິດໃຈ.
ຂອບໃຈແຫລ່ງທີ່ມາ: ອີນໄຊລາວ.