“ວັດເຟີດຕິກ” ສະຖາປັດຕະຍາກຳພຸດທະສາສະໜາຫວຽດນາມໃນ ສປປ ລາວ
ອີນໄຊລາວ
ສະຖາປັດຕະຍະກໍາ ພຸດທະສາສະໜາຫວຽດນາມ “ວັດເຟີດຕິກ” ໃນ ສປປ ລາວ.
ຖ້າຈະເວົ້າເຖິງ ວັດເຟີດຕິກ ແລ້ວ, ຄິດວ່າບັນດາທ່ານທີ່ເປັນຄົນມີສັນຊາດຫວຽດນາມ ຫລື ວ່າຄົນຫວຽດນາມເອງທີ່ຢູ່ໃນນະຄອນຫລວງວຽງຈັນທຸກຄົນລ້ວນແລ້ວແຕ່ຮູ້ຈັກກັນເປັນຢ່າງດີ ແລະ ສ່ວນຫລາຍກໍເຄີຍເຂົ້າໄປກາບໄວ້ແລ້ວ, ວັດເຟີດຕິກ ສ້າງຂື້ນໄດ້ຫຼາຍກວ່າ 50 ປີ ແລ້ວ ເຊິງຕັ້ງຢູ່ຖະໜົນໜອງບອນ ກົງກັນຂ້າມກັບວັດທາດຝຸ່ນ.
ວັດເຟີດຕິກໄດ້ມີການບູລະນະໃໝ່ ແລະ ໄດ້ນໍາໃຊ້ໃນປີ 2010, ເປັນວັດນ້ອຍໆ ຕັ້ງຢູ່ໃຈກາງນະຄອນຫຼວງວຽງຈັນ ແຕ່ມີການຕົບແຕ່ງທີ່ງົດງາມ ບົງບອກເຖິງຄວາມໜ້າເຄົາລົບບູຊາ ແລະ ໄດ້ສະແດງເຖິງວັດທະນະທໍາທາງພຸດທະສາສະໜາຫວຽດນາມ ຢູ່ ສປປ ລາວ.
ສະຖາປັດຕະຍະກໍາຕ້ອງບອກເລີຍວ່າ ງົດງາມຫລາຍ ພຽງແຕ່ຍ່າງຜ່ານປະຕູເຂົ້າວັດກໍຈະເຫັນ ເສົາໄມ້ໃຫຍ່ງາມຕັ້ງຢູ່ດ້ານໜ້າ ແລະ ຄຳກອນໄດ້ຂຽນໃສ ຕາມເສົາໃຫຍ່ ເຊິ່ງບໍ່ຕ່າງຫຍັງກັບວັດອື່ນໆຢູ່ ຫວຽດນາມ. ບັນດາຮູບປາງມີລັກສະນະສະເພາະຂອງວັດຫວຽດ, ແຕ່ໂດຍລວມແລ້ວວັດ ໄດ້ອອກແບບກໍ່ສ້າງຕາມແບບວັດທະນະທໍາຂອງສາສະໜາພຸດຄືກັບລາວ ເຊິ່ງບົງບອກ ເຖິງການປະສົມປະສານຢ່າງລົງຕົວລະຫວ່າງ ສອງພຸດທະສາສະໜາ ລາວ-ຫວຽດນາມ.
ຂັ້ນໄດຂຶ້ນວັດໄດ້ປະດັບປະດາ ໂຕມັງກອນທີ່ພວມ ບິນອ້ອມຂີ້ເຝື້ອ ແລະ ເມື່ອເຂົ້າເຖິງສິມໃຫຍ່ ຢູ່ສອງເບື້ອງໄດ້ຂຽນວ່າວັດເຟີດຕິກ ທີ່ມີຄວາມໝາຍວ່າ ອະໄພຍະໂທດ. ໂຕອາຄານແມ່ນມີທັງໝົດ 7 ຊັ້ນ ເຊິງແຕ່ລະຊັ້ນ ແມ່ນມີພະພຸດທະຮູບທັງໝົດ ແລະ ເມື່ອຂື້ນໄປຮອດຊັ້ນສຸດທ້າຍ ກໍຈະເຫັນວິວ ນະຄອນຫຼວງວຽງຈັນ ອີກມຸມໜື່ງທີ່ສວຍງາມ.
ຈາກຈຸດພີເສດດັ່ງກ່າວ ຈື່ງເປັນການເຊື່ອມສາຍພົວພັນ ແລະ ເສີມຂະຫຍາຍມູນເຊື້ອ ອັນດີງາມທາງ ພຸດທະສາສະໜາ ລາວ-ຫວຽດນາມ. ນອກຈາກນີ້ ຍັງໄດ້ມີການສ້າງຕັ້ງຄະນະກໍາມະການປະສານງານ ພຸດທະສາສະໜາຫວຽດນາມ ຢ່າງເປັນທາງການ ໃນວັນທີ 11 ພະຈິກ 2018 ທີ່ ວັດເຟີດຕິກ ເພື່ອເປັນການ ສະໜັບສະໜູນພຸດທະສາສະໜາຫວຽດນາມ ໃນການບໍລິຫານ, ການເຄື່ອນໄຫວ ປະຕິບັດໃຫ້ຖືກຕ້ອງຕາມຮີດຄອງປະເພນີອັນດີງາມຂອງ ພຸດທະສາສະໜາ ກໍຄືລະບຽບກົດໝາຍຂອງ ສປປ ລາວ.
ຂອບໃຈແຫລ່ງທີ່ມາ:
