ວັດໄຕນ້ອຍ ກັບປະຕິມະກຳອັນສວຍງາມວັດວາອາຣາມໃນເຂດກຳແພງເມືອງ
ຄັງ-ສາງ Kung-Sung
ມາຮູ້ຈັກກັບ ວັດໄຕນ້ອຍ ໜຶ່ງໃນວັດວາອາຣາມໃນເຂດກຳແພງເມືອງຊັ້ນນອກນະຄອນຫລວງວຽງຈັນ.
ໃນ ສປປ ລາວ ມີຮີດຄອງປະເພນີທີ່ຫລາກຫລາຍ, ມີວັດຖະນາທຳອັນສວຍງາມ ແລະ ສ່ວນຫລາຍມີຄວາມນັບຖືໄປທາງພຸດທະສາດສະໜາ, ໂດຍໃນປະເທດລາວມີວັດວາອາຮາມຫລາຍໆແຫ່ງ ແລະ ແຕ່ລະແຫ່ງແຕ່ລະເຂດແຂວງກໍມີເອກະລັກ ແລະ ສວຍງາມແບບທີ່ເປັນຂອງຕົນເອງ, ໃນນະຄອນຫລວງວຽງຈັນເອງກໍມີວັດວາອາຮາມຈ່ຳນວນຫລວງຫລາຍເຊັ່ນກັນ ແລະ ແຕ່ລະວັດກໍມີທັງປະຫວັດຄວາມເປັນມາ ແລະ ສວຍງາມແຕກຕ່າງກັນ.
ຫາກຈະເວົ້າເຖິງວັດໄຕນ້ອຍແລ້ວ ເມື່ອກ່ອນວັດແຫ່ງນີ້, ເຄີຍເປັນວັດທີ່ເຈົ້າມະຫາອຸປະຣາຊເພັດຊະຣາຊ ເຄີຍອຸປະຖຳຄ້ຳຊູ ແລະ ຊ່ວຍເຫຼືອໃນການປະຕິສັງຂອນວັດແຫ່ງນີ້ ແລະ ທີ່ສຳຄັນ ໃນວັດໄຕນ້ອຍນີ້ ຍັງເປັນບ່ອນປະດິດສະຖານຂອງພຣະພຸດທະຮູບທອງສຳຣິດທີ່ເມື່ອກ່ອນ ປະດິດສະຖານຢູ່ໜ້າກົມມະລຽນຂອງວັດສີສະເກດ, ເຊິງປະຈຸບັນນີ້, ວັດໄຕນ້ອຍ ຣັດຕະນະມຸງຄຸນ ຕັ້ງຢູ່ ເມືອງສີໂຄດຕະບອງ ນະຄອນຫລວງວຽງຈັນ.
ພຣະທອງສຳຣິດອົງນີ້ ເມື່ອກ່ອນເປັນພຣະປະທານຂອງວັດກາງ (ບໍລິເວນໂຮງແຮມລ້ານຊ້າງປັດຈຸບັນນີ້) ເຊິ່ງວັດກາງເປັນວັດທີ່ຮຸ່ງເຮືອງເຫຼືອງເຫຼືອມຂອງພຣະພຸດທະສາສະໜາ ໃນຍຸກຂອງເຈົ້າສຸຣິຍະວົງສາ ທັມມິກກະຣາຊ ຄສ 1618-1695 ພຣະອົງນີ້ແມ່ນມີຮູບຮ່າງລັກສະນະ ທັງພຣະພັກ ຕັ້ງແຕ່ເກດຮອດພຣະບາທນັ້ນ ແມ່ນເພິ່ນຄົງຖອນແບບອອກມາຈາກ ພຣະເຈົ້າໃຫຍ່ອົງຕື້ ຂອງວັດອົງຕື້ ມະຫາວິຫາຣ ຕ່າງແຕ່ຂອງໜາດຂອງພຣະອົງນີ້ຈະນ້ອຍກວ່າພຣະເຈົ້າອົງຕື້
ເມື່ອເມືອງວຽງຈັນໄດ້ມີການບູຣະນະປະຕິສັງຂອນຈາກການທີ່ເປັນເມືອງຮ້າງຢ່າງເປັນຈິງເປັນຈັງ ເຊິ່ງບັນດາວັດວາອາຮາມໃນເຂດນອກກຳແພງເມືອງເຊັ່ນ : ວັດສີຖານ, ວັດຊຽງແວ່, ວັດຫົວເມືອງ, ວັດຂຸນຕາ, ວັດອູບມຸງ, ວັດໄຕນ້ອຍ, ວັດໄຕໃຫຍ່, ວັດໂພນໄຊ , ວັດໂພນພະເນົາ , ວັດໜອງບອນ, ວັດທາດຫລວງ ແລະ ວັດອື່ນໆອີກລວມປະມານ 40 ກວ່າວັດແມ່ນໄດ້ມີການບູຣະນະປະຕິສັງຂອນຄືນໃນປີ ຄສ 1954 ເປັນຕົ້ນມາ
ນອກຈາກນີ້, ວັດໄຕນ້ອຍ ແລະ ວັດໄຕໃຫຍ່ ກໍ່ເປັນວັດທີ່ກ່ຽວພັນກັນມາແຕ່ໃນອະດິດ ເພາະໃນຍາມຮອດບຸນນະມັດສະການພຣະທາດຫລວງ ເວລາແຫ່ຜາສາດເຜິ້ງ ທັງ 2 ວັດກໍ່ຈະມີການແຫ່ຜາສາດເຜິ້ງໄປຫາກັນ ຄ້າຍຄືວັດອົງຕື້ ກັບ ວັດອິນແປງ ແຕ່ດຽວນີ້ວັດໄຕນ້ອຍແມ່ນບໍ່ມີການແຫ່ຜາສາດເຜິ້ງ ໃນຍາມບຸນນະມັດສະການພຣະທາດຫລວງແລ້ວ
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ຄັງ-ສາງ Kung-Sung
