ມາຮູ້ຈັກກັບ ວັດມະຫັນທະນາຣາມ ບ້ານດອນຄອນໃຕ້ ເມືອງໂຂງ ແຂວງຈຳປາສັກ.

ຖ້າຈະເວົ້າເຖິງວັດທະນາທຳຮີດຄອງປະເພນີຂອງ ສປປ ລາວ ແລ້ວ, ວັດວາອາຮາມຖືວ່າເປັນຈຸດເດັ່ນອັນໜຶ່ງຂອງປະຊາຊົນຊາວລາວທົ່ວປະເທດກໍວ່າໄດ້, ມີສະຖານທີ່ວັດອັນສັກສິດຫລາຍແຫ່ງໃນຂອບເຂດທົ່ວປະເທດ, ແລະ ວັດມະຫັນທະນາຣາມ ບ້ານດອນຄອນໃຕ້ກໍເປັນອີກວັດສັກສິດໜຶ່ງ, ວັດແຫ່ງນີ້ສົມເດັດພຣະຍອດແກ້ວຣາຊຄຣູຫລວງ ໂພນສະເມັກ ຫຼື ຍາຄຣູຂີ້ຫອມ ( ນົກຂຸ້ມ ວຽງຈັນທນ໌ ) ຕັ້ງຢູ່ບໍ່ໄກຈາກ ວັດພຣະມະຫາປາສະມັນຕະເຖຣະ ( ພຣະອາຈາຣຍ໌ຂອງເຈົ້າຟ້າງຸ່ມ ມະຫາຣາຊ )

ພຣະຄຣູຂີ້ຫອມ ພ້ອມດ້ວຍຄະນະ ໄດ້ມີການຍົກຍ້າຍຈາກເມືອງຊຽງແຕງ ຈົນມາຮອດບ້ານດອນຄອນໃຕ້ ເຊິ່ງຢູ່ໃກ້ກັບແກ້ງຫລີຜີ ປະມານ 1 ກິໂລແມັດ ເພິ່ນເຫັນສະຖານທີແຫ່ງນີ້ເໝາະສົມດີ ຈຶ່ງມີການກໍ່ສ້າງທາຕຸ 1 ໜ່ວຍ ດ້ວຍຫີນສູງ 1 ສອກ ແລະສ້າງວິຫາຣ ຂຶ້ນອີກ 1 ຫລັງ ເພິ່ນຍັງສ້າງອາຮາມ ແລະພຣະທາຕຸກວມໂຮງອະໂຣຄະຍາ ຂອງສາສະໜາອິນດູ ທີ່ເປັນພະລານຫີນໃຫຍ່ ລວມທັງສືວະລຶງ ກໍ່ຍັງພົບເຫັນມາຮອດທຸກມື້ນີ້

ການສ້າງພຣະທາຕຸກວມເສົາເສມາຮິນດູ ສິລະປະທະວາຣະດີ ພຣະທາຕຸນີ້ມີທາງເຂົ້າຫລັງເສມາພໍຫລົມຕົວຄົນເຮົາ ມີເສມາດ້ານທາງເຂົ້າ ສາມາດຍ່າງຫຸ້ມລອດພຣະທາຕຸນັ້ນໄດ້ ແຕ່ເປັນທີ່ຫນ້າເສຍດາຍທີ່ສຸດພຣະທາຕຸສ່ວນເທິງໂຢດລົງມາທັບທາງເຂົ້າ ສາມາດສ່ອງເບິ່ງໄດ້ ຕາມຄວາມເຊື່ອຖືຂອງຊາວບ້ານແຖວນີ້ເຊື່ອວ່າ ພຣະທາຕຸອົງນີ້ສັກສິດຫລາຍອີຫລີ

ພຣະທາຕຸອົງນີ້ ແມ່ນມີການບູຣະນະມາແລ້ວ 2 ຄັ້ງ ຄື :

ຄັ້ງທີ 1 ບູຣະນະປະຕິສັງຂອນເມື່ອປີ ຄສ 1939 ໂດຍແມ່ນມູນລະສັດທາຂອງທ່ານເຈັກຊູ.
ຄັ້ງທີ 2 ບູຣະນະປະຕິສັງຂອນເມື່ອປີ ຄສ 1957 ( ເຄິ່ງພຸທທະສັງກຣາດ ) ໂດຍມູນລະສັດທາຂອງຊາວບ້ານຮ່ວມກັນ