ວັດຊຽງຄວນພ້ອມຕ້ອນຮັບນັກທ່ອງທ່ຽວໃນປີໃໝ່ລາວ ພສ 2565
ໄລຍະປີໃໝ່ລາວສວນຊຽງຄວນ ກຽມພ້ອມຕ້ອນຮັບນັກທ່ອງທ່ຽວ100ເປີເຊັນ
ສວນວັດທະນະທໍາຊຽງຄວນ ແມ່ນມີຄວາມພ້ອມຕ້ອນຮັບບັນດານັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ມີແຜນທ່ອງທ່ຽວໃນໂອກາດ ສົ່ງທ້າຍປີເກົ່າ ພສ 2565 ແລະ ຕ້ອນຮັບປີໃໝ່ລາວ ພສ 2566 ທີ່ໃກ້ຈະມາເຖິງນີ້, ໂດຍຈະມີຫລາຍກິດຈະກຳ ທີ່ຕິດພັນກັບການຮັກສາມູນເຊື້ອວັດທະນະນຳທຳ ແລະ ຮີດຄອງປະເພນີອັນດີງາມ ຂອງຊາດ ໃຫ້ມີຄວາມຍີນຍົງ.
ທ່ານ ນາງ ສ້ອຍສຸດາ ອິນເມືອງໄຊ ປະທານບໍລິສັດ ສວນວັດທະນະທໍາຊຽງຄວນ ຈໍາກັດຜູ້ດຽວໄດ້ໃຫ້ສໍາພາດວ່າ: ໃນໂອກາດສົ່ງທ້າຍປີເກົ່າ ແລະ ຕ້ອນຮັບປີໃໝ່ ທີ່ຈະມາເຖິງນີ້, ສະຖານທີ່ທ່ອງທ່ຽວສວນຊຽງຄວນ ຈະຈັດໃຫ້ມີຫລາຍກິດຈະກໍາ ເປັນຕົ້ນ ຢູ່ຕາມຈຸດເຂົ້າ-ອອກ ຈະກະກຽມນໍ້າອົບ-ນໍ້າຫອມໄວ້ແຈກຢາຍໃຫ້ແຂກ(ບໍ່ເສຍຄ່າ), ມີພວງມາໄລ, ໝາກເບັງ, ດອກໄມ້, ທູບທຽນ ເພື່ອກຽມໄຫວ້ພະພຸດທະຮູບ
ແລະ ກ່ອນຈະເຖິງມື້ບຸນປີໃໝ່ ສະຫະພັນແມ່ຍິງນະຄອນຫລວງວຽງຈັນ ຈະຈັດງານສະເຫລີມສະຫລອງວັນແມ່ຍິງສາກົນຢ້ອນຫລັງ ແລະ ສະເຫລີມສະຫລອງວັນສົ່ງທ້າຍປີເກົ່າ ແລະຕ້ອນຮັບປີໃໝ່ ຢູ່ທີ່ສວນຊຽງຄວນແຫ່ງນີ້.
ດັ່ງນັ້ນ, ຈຶ່ງຝາກເຖິງບັນດານັກທ່ອງທ່ຽວທັງພາຍໃນ ແລະຕ່າງປະເທດ ຫລື ນິຕິບຸກຄົນ ທີ່ມີຈຸກປະສົງຢາກໄປທ່ອງທ່ຽວເມືອງຫາດຊາຍຟອງ, ສະຖານທີ່ສວນຊຽງຄວນ ແມ່ນຍິນດີຕ້ອນຮັບທຸກໆທ່ານ ເຊິ່ງສະຖານທີ່ແຫ່ງນີ້ ເປັນແຫລ່ງທ່ອງທ່ຽວທາງດ້ານມໍລະ ດົກວັດທະນະທໍາ, ເປັນມໍລະດົກແຫ່ງຊາດລະດັບທ້ອງຖິ່ນແຫ່ງທໍາອິດ ຂອງນະຄອນຫລວງວຽງຈັນ, ມາເຖິງປັດຈຸບັນ ແຂກຕ່າງປະເທດກຳລັງຫລັງໄຫລເຂົ້າໄປທ່ຽວຊົມເປັນຈໍານວນຫລາຍ ໂດຍສະເພາະ ແຂກຈີນ, ເກົາຫລີ, ຫວຽດນາມ ແລະ ຝຣັ່ງ.
ທ່ານນາງ ສ້ອຍສຸດາ ອິນເມືອງໄຊ ຍັງກ່າວອີກວ່າ: ຂ້າພະເຈົ້າ ມີຄວາມເຊື່ອໝັ້ນວ່າ ປີໃໝ່ລາວທີ່ຈະມາເຖິງນີ້, ບັນດາແຂກທັງພາຍໃນ ແລະ ຕ່າງປະເທດຈະເຂົ້າໄປທ່ຽວຊົມສວນຊຽງຄວນ ເປັນຈໍານວນຫລາຍ ເພາະສະຖານທີ່ແຫ່ງນີ້ ມີຮູບປັ້ນຫລໍ່, ມີພະພຸດທະຮູບ, ມີວັດທະນະທໍາເກົ່າແກ່ ເປັນຈໍານວນຫລາຍ ເພື່ອໃຫ້ບັນດາແຂກໄດ້ທ່ຽວຊົມ, ຫົດສົ່ງຕາມຮີດຄອງປະເພນີ ຂອງການຫລິ້ນບຸນປີໃໝ່ ລາວ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: ຂປລ.