ມາຮູ້ຈັກ! ປະເພນີບຸນປີໃໝ່ຂອງຊົນເຜົ່າອາຄາໃນ ສປປ ລາວ ນຳກັນ
ປະເພນີບຸນປີໃໝ່ທີ່ມີການສະຫລອງແບບແຕກຕ່າງກັບປີໃໝ່ອື່ນໆຂອງຊົນເຜົ່າອາຄາ.
ແນນອນວ່າຫລາຍໆທ່ານຄົງຈະຮູ້ຈັກດີຖ້າເວົ້າເຖິງບຸນປີໃໝ່ລາວ, ສາກົນ ແລະ ອື່ນໆ ແຕ່ທ່ານອາດຍັງຄົງບໍ່ຮູ້ວ່າຍັງມີຫລາຍໆຊົນເຜົ່າທີ່ມີປີໃໝ່ຂອງເຜົ່າຂອງຕົນເອງ ແລະ ຕອນນີ້ຈະຍົກເອົາປີໃໝ່ຂອງເຜົ່າອາຄາມາໃຫ້ຮູ້ນຳກັນ.
ເຜົ່າອາຄາມີປະເພນີ ບຸນປີໃໝ່ ຫລື ບຸນກິນຈຽງ ຫຼື ບຸນປີໃໝ່ເປັນຂອງຕົນເອງເຊັນດຽວກັນກັບເຜົ່າອື່ນໆໃນ ສປປ ລາວ ແລະ ກໍມີການຈັດງານບຸນປະເພນີສະເຫລີມສະຫລອງມາທຸກປີໃນບ້ານຂອງເຂົາເຈົ້າເອງ, ເຊິ່ງບຸນປີໃໝ່ຂອງເຜົ່າອາຄາຈະຈັດຂຶ້ນທຸກໆປີໃນຊ່ວງເດືອນທັນວາ ຫາ ເດືອນມັງກອນ. ຕາມທໍາມະດາແລ້ວບຸນປີໃໝ່ຂອງເຜົ່າອາຄາຈະຈັດຂຶ້ນ 3 ມື້ ເຊິ່ງແຕ່ມື້ຈະມີພິທີກຳທາງສາສະໜາ ແລະ ກິດຈະກຳສະເຫຼີມສະຫຼອງທີ່ແຕກຕ່າງກັນຄື:
ມື້ທີໜຶ່ງ: ເປັນມື້ກະກຽມສະເຫຼີມສະຫຼອງປີໃໝ່, ໃນແຕ່ລະຄອບຄົວໂດຍສະເພາະຫົວໜ້າຄອບຄົວ ຈະຕ້ອງກະກຽມໄກ່, ເຂົ້າປະປາ ແລະ ເຫຼົ້າຢາປາແປ້ງຕ່າງໆ ເພື່ອທຳພິທີກຳຖວາຍບັນພະບູລຸດ. ເລີ່ມຕັ້ງແຕ່ 12 ໂມງ ກໍ່ຈະມີການຕຳເຂົ້າປະປາ ແລ້ວກໍ່ຈະຂ້າໄກ່ 1 ໂຕ ເອົາໄປຕົ້ມເພື່ອຖວາຍຜີເຮືອນ (ຫິ້ງບູຊາຂອງບັນພະບູລຸດ) ເພາະມີຄວາມເຊື່ອວ່າ ການຖວາຍຂອງເສັ່ນໄຫວ້ເຫຼົ່ານີ້ ຈະເຮັດພວກເຂົາໄດ້ຮັບໂຊກລາບ, ເສດຖະກິດ ແລະ ຜົນຜະລິດທີ່ດີຂຶ້ນໃນປີໃໝ່. ເມື່ອສຳເລັດພິທີດັ່ງກ່າວແລ້ວ, ບັນດາຜູ້ຊາຍເຜົ່າອາຄາຈະຕັດໄມ້ມາເຮັດໝາກຂ່າງເພື່ອກະກຽມເອົາໄປຫຼິ້ນຕີໝາກຂ່າງໃນມື້ຕໍ່ໄປ. ການເຮັດໝາກຂ່າງນັ້ນແມ່ນນັບຕາມຈຳນວນຜູ້ຊາຍທີ່ມີຢູ່ໃນຄອບຄົວຕົນເອງ ມີຈັກຄົນກໍ່ເຮັດເທົ່ານັ້ນໜ່ວຍ. ຕາມຮີດຄອງແລ້ວ, ໝາກຂ່າງຈະເປັນຂອງຫຼິ້ນສະເພາະຜູ້ຊາຍເທົ່ານັ້ນ ສ່ວນແມ່ຍິງແມ່ນຈະບໍ່ໃຫ້ຫຼິ້ນ, ຫຼັງຈາກແລ້ວປີໃໝ່ພວກເຂົາຈະເອົາໝາກຂ່າງໄປຖິ້ມ ຫາກສະເຫຼີມສະຫຼອງປີໃໝ່ປີຕໍ່ໄປກໍຈະເຮັດຂຶ້ນມາໃໝ່ທຸກໆປີ.
ມື້ທີສອງ: ຫຼັງຈາກເສັດສິ້ນພິທີກໍາທາງສາສະໜາໃນມື້ທໍາອິດແລ້ວ, ມື້ທີສອງຈະເປັນການສະເຫຼີມສະຫຼອງງານບຸນປີໃໝ່ຢ່າງຄຶກຄື້ນມ່ວນຊື່ນ. ຜູ້ຊາຍກໍ່ພາກັນຫຼິ້ນໝາກຂ່າງ ສ່ວນຜູ້ແສ້ຜູ້ສາວກໍ່ພາກັນແຕ່ງອົງຊົງເຄື່ອງໃນຊຸດຊົນເຜົ່າຂອງຕົນຢ່າງຈົບງາມເພື່ອມາຟ້ອນລຳທຳເພງ ຫຼືລຳວົງເປັນໝູ່ຮ່ວມກັບຊາຍໜຸ່ມ ທ່າມກາງການຮັບຊົມຂອງເຖົ້າແກ່ແນວໂຮມ, ພໍ່ແມ່ປະຊາຊົນພາຍໃນບ້ານ ຫຼືຜູ້ຄົນຕ່າງບ້ານທີ່ເຂົ້າມາທ່ຽວຫຼິ້ນ. ນອກນັ້ນ, ກໍ່ຈະມີການກິນເຂົ້າສາມັກຄີຊຸມແຊວກັນໃນແຕ່ລະຄອບຄົວ.
ມື້ທີສາມ: ເປັນມື້ຕ້ອນຮັບແຂກມາຢ້ຽມຢາມ ບໍ່ວ່າຈະເປັນເຜົ່າອາຄານຳກັນ ຫຼືແຂກກາຍໄທມາແຕ່ບ້ານອື່ນເມືອງອື່ນ ຊາວອາຄາກໍຈະຕ້ອນຮັບຂັບສູ່ເປັນຢ່າງດີ ໂດຍການຈັດພາເຂົ້າສາມັກຄີ. ອາຫານສ່ວນຫຼາຍກໍແມ່ນລາບຊີ້ນຄວາຍ (ຄວາຍໃນບ້ານທີ່ເອົາມາຂ້າແລ້ວແບ່ງພູດກັນໄປປະກອບອາຫານ), ແກງຜັກກາດ, ລວກຜັກ-ແຈ່ວໝາກກອກ, ແຈ່ວໝາກແຂ່ນ ແລະເຫຼົ້າຢາ ທີ່ສຳຄັນ ແລະຂາດບໍ່ໄດ້ກໍແມ່ນເຂົ້າປາປາເຊິ່ງເປັນອາຫານປະຈຳບຸນປີໃໝ່ຂອງຊາວອາຄາ. ນອກນັ້ນ, ກໍ່ມີການຄົບງັນມ່ວນຊື່ນໄປນຳກັນ ສ່ວນຕອນແລງຈະມີການສະແດງສິລະປະເຜົ່າອາຄາທີ່ຫຼາກຫຼາຍໃຫ້ຊົມ ເພື່ອສະເຫຼີມສະຫຼອງງານບຸນຢ່າງຟົດຟື້ນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ອິນໄຊລາວ.