ພຣະອາຈາຣຍ໌ໃຫຍ່ ມະຫາບົວຄຳ ສາຣິບຸດ

ເກີດເມື່ອວັນທີ 15 ກຸມພາ 1933 ທີ່ບ້ານຍາງສາວ (ແຄມຫ້ວຍຂະໜວນ) ເມືອງສຸຂຸມາ ແຂວງຈຳປາສັກ

ມໍຣະນະພາບ ໃນເວລາປະມານ 4 ໂມງເຊົ້າ ຂອງວັນທີ 22 ກັນຍາ 2022

ບິດາຂອງເພິ່ນຊື່ວ່າ : ທ້າວດີ ສາຣິບຸດ ມີອາຊິບຄ້າຂາຍ ຈົນໄດ້ມີຕຳແຫນ່ງເປັນ ນາຍຮ້ອຍຄວາຍ ນາຍຮ້ອຍດີ ຈົນເຮັດໃຫ້ສະເດັດເຈົ້າບຸນອ້ອມ ນະຈຳປາສັກ ໃຫ້ຄວາມສຳຄັນໃນການປືກສາບາງເຫດການຂອງວຽກງານຕ່າງໆ.

ມານດາຂອງເພິ່ນຊື່ : ນາງມຽງ ສາຣິບຸດ ເປັນຄົນມີສິນມີທັມ ແລະເຊື່ອໝັ້ນຕໍ່ພຣະພຸດທະສາສະໜາ

ປະຖົມໄວ ທ້າວບົວຄຳ ສາຣິບຸດ ໄດ້ອາຍຸ 3 ປິ ພໍ່ລຸງຈານບຸນ ໂຄຕະມີ ແລະແມ່ປ້າດວງຈັນ ໂຄຕະມີ ໄດ້ມາຂໍນຳເອົາທ້າວບົວຄຳ ຈາກບິດາແລະມານດາຂອງເພິ່ນໄປລ້ຽງເປັນລູກ ( ຍ້ອນເພິ່ນບໍ່ມີລູກ ) ລ້ຽງດູ ແລະສົ່ງເສີມໃຫ້ເຕີບໃຫຍ່ ແລະເຂົ້າຮ່ຳຮຽນ

ປີ 1940 ຮຽນຈົບຊັ້ນປະຖົມປີທີ່ 4 ທີ່ບ້ານຍາງສາວ ເມືອງສຸຂຸມາ ແຂວງຈຳປາສັກ.

ປີ 1949 ອາຍຸໄດ້ 16 ປີ ພໍ່-ແມ່ ຢາກໃຫ້ຜູ້ບ່າວແວງ (ບ່າວນ້ອຍ ບົວຄຳ ສາຣິບຸດ) ສ້າງຄອບຄົວ ແຕ່ທັງສອງຝ່າຍຕົກລົງກັນບໍ່ໄດ້ໃນເລື່ອງວ່າ ຈະມາຢູ່ນຳຝ່າຍເຈົ້າບ່າວ ຫລືເຈົ້າສາວ ( ເພາະເຈົ້າສາວເປັນລູກສາວດຽວ ) ທາງເຈົ້າສາວກໍ່ຢາກໄດ້ເຂີຍໄປຢູ່ນຳ ຕົກລົງກັນບໍ່ໄດ້ກໍ່ເລີຍເປັນຮ້າງຂັນໝາກ

ຫລັງຈາກນັ້ນກໍ່ໄດ້ຫັນຂໍພໍ່ແມ່ເດີນຕາມເສັ້ນທາງທີ່ຕົນມັກ ກໍ່ຄືເຂົ້າບວດເປັນສາມະເນນ ເມື່ອວັນທີ 5 ກໍລະກົດ 1949 ທີ່ວັດພຣົມມະຍາຣາມ ບ້ານຍາງສາວ ເມືອງສຸຂຸມ ແຂວງຈຳປາສັກ ຈາກນັ້ນແມ່ນໄດ້ຍ້າຍໄປຈຳວັດທີ່ ວັດລະຄອນ ວະນາຣາມ ບ້ານລະຄອນ ເມືອງຈຳປາສັກ ແລະຮຽນໜັງສື ທີ່ໂຮງຮຽນປະຣິຍັດຕິທັມ ວັດເມືອງແສນ ຕາແສງພະພິີີນ ເມືອງຈຳປາສັກ ຕົກມາຮອດປີ 1952 ເຂົ້າຮຽນນັກທັມຕີ ທີ່ວັດເມືອງແສນ , ຮອດປີ 1953 ເຂົ້າຮຽນນັກທັມຊັ້ນໂທທີ່ວັດເມືອງແສນ.

ພໍອາຍຸໄດ້ 20 ປີ ບໍລິບູນ ໄດ້ອຸປະສົມບົດ ເປັນພຣະພິກຂຸສົງ ທີ່ວັດເມືອງແສນ ເມືອງຈຳປາສັກ ແຂວງຈຳປາສັກ ປີ 1954 ຮຽນນັກທັມເອກທີ່ວັດເມືອງແສນ, ແລະຕໍ່ດ້ວຍຊັ້ນປາລີໄວຍາກອນ ຈົນຈົບ ແລະຍ້າຍເຂົ້າເມືອງປາກເຊ ເພື່ອສຶບຕໍ່ຮ່ຳຮຽນທີ່ວັດຫລວງປາກເຊ ແຕ່ກໍ່ຫາບ່ອນຈຳວັດບໍ່ໄດ້ ເລີຍຕັດສິນໃຈຂຶ້ນລົດໄປສູ່ນະຄອນຫລວງວຽງຈັນ ແລ້ວມາຢູ່ວັດໂພນໄຊເຊດຖາທິຣາຊ ຈົນຮອດເດືອນ 5 ຈຶ່ງເດີນທາງໄປແຂວງອັດຕະປື , ປີ 1956 ພຣະອາຈານເພິ່ນໄດ້ເຂົ້າເຄື່ອນໄຫວຂະບວນປະຕິວັດຊາດ , ປີ 1957 ໄດ້ກັບຄືນສູ່ນະຄອນຫລວງວຽງຈັນແລະໄດ້ເຂົ້າພັກຢູ່ວັດໂພນໄຊເຊດຖາທິຣາຊ ແລະໃຫ້ເຈົ້າອະທິການວັດຊອກຝາກໃຫ້ໄປຢູ່ວັດຂົວຫລວງເພາະໃກ້ກັບບ່ອນຮຽນຕໍ່ ເຈົ້າອະທິການສະໄໝນັ້ນແມ່ນພຣະມະຫາບຸນລ້ວນ ພິມມະເສນ ນັບແຕ່ມື້ນັ້ນ ເພິ່ນກໍ່ຈຳວັດຢູ່ວັດຂົວຫລວງເລື້ອຍມາ ຈົນຮອດວາຣະສຸດທ້າຍ ໃນວັນທີ 22 ກັນຍາ 2022 ຈຶ່ງມໍຣະນະພາບລົງ ກັບຄືນສູ່ທັມມະຊາດດັ່ງເດີມນັ້ນແລ ອະນິດຈັງ ວັດຕະສັງຂາຣາ .