ຕາດສະດີ ຕາດທຳມະຊາດທີ່ສວຍງາມທີ່ຫລາຍຄົນຍັງຄົງບໍ່ຮູ້
ຕາດສະດີ ຕາດທຳມະຊາດທີ່ສວຍງາມທີ່ເຊື່ອງຊ້ອນຢູ່ໃນປ່າດົງຂອງແຂວງສະຫວັນນະເຂດ.
ໃນໄລຍະສະພາບການປະຈຸບັນນີ້ການລະບາດຂອງພະຍາດຮ້າຍໂຄວິດ-19, ເຮັດໃຫ້ຫຼາຍຄົນຄິດຮອດການໄປທ່ອງທ່ຽວສະຖານທີ່ທໍາມະຊາດໃນວັນພັກວຽກ (ເສົາ-ອາທິດ), ການໄປກິນເຂົ້າປ່າ ທ່ຽວຊົມທຳມະຊາດອັນເຢັນ ແລະ ຊື່ນອົກຊືນໃຈ ດັ່ງໃນຊ່ວງກ່ອນໜ້າທີ່ຈະມີການລະບາດຂອງພະຍາດນີ້.
“ ຕາດສະດີ ” ເປັຍສະຖານທີ່ທ່ອງທ່ຽວທີ່ຍັງຄົງຄວາມເປັນທໍາມະຊາດທີ່ອ້ອມຮອບໄປດ້ວຍຕົ້ນໄມ້ສີຂຽວ ແລະ ພູຜາ ຄວາມງົດງາມທີ່ບໍ່ໄດ້ຖືກປຸງແຕ່ງ ຫຼື ດັດແປງ ເປັນຄວາມງົດງາມຂອງທໍາມະຊາດຢ່າງແທ້ຈິງ ສະຖານທີ່ນີ້ ແມ່ນນໍາຕົກຕາດຈາກທໍາມະຊາດທີ່ລ່ອງໄຫຼໃສເຢັນ ເໝາະແກ່ການໄປກິນເຂົ້າສາມັກຄີໃນປ່າ ໃນວັນພັກຜ່ອນທ້າຍອາທິດ ຫຼື ຈະຫາໂອກາດໃຫ້ຕົນເອງພາຮ່າງກາຍໄປສໍາພັດທໍາມະຊາດສູບອາກາດທີ່ສົດຊື່ນ.
ຕາດສະດີ ຕັ້ງຢູ່ຖະໜົນເລກ 9 ເມືອງເຊໂປນ ແຂວງ ສະຫວັນນະເຂດ ແວ່ເຂົ້າທາງບ້ານພະລັອງ ຂີ່ລົດເຂົ້າຕາມທາງແວ່ໄປປະມານ 50 ກວ່າກິໂລແມັດ ຕັ້ງຢູ່ບ້ານ ວັງເລິກ ເມືອງເຊໂປນ ແຂວງສະຫວັນນະເຂດ ເຊິ່ງເສັ້ນທາງໄປກໍຂ້ອນຂ້າງສະດວກ ລົດໃຫຍ່ສາມາດຂີ່ເຂົ້າໄປໄດ້ເລີຍ. ຕະຫຼອດສາຍທາງເຮົາຈະໄດ້ເຫັນ ທັງຕົ້ນໄມ້, ສວນກາເຟ ທີ່ປະຊາຊົນໃນເຂດນັ້ນປູກປ່ອຍໃຫ້ເຕີບໃຫຍ່ແບບທໍາມະຊາດໂດຍບໍ່ໄດ້ໃຊ້ສານເຄມີໃດໆ ແລະ ຕະຫຼອດສາຍທາງຍັງຈະໄດ້ເຫັນ ສາຍພູ, ຫ້ວຍນໍ້າຢູ່ລະຫວ່າງການເດີນທາງ ທີ່ມີ ຄວາມງົດງາມແປກຕາທັງສອງຟາກຂ້າງທາງ.
ສະຖານທີ່ແຫ່ງນີ້ ຍັງຄົງຮັກສາສະພາບເດີມຂອງທໍາມະຊາດໄວ້ເປັນຢ່າງດີ ແລະ ທາງອົງການປົກຄອງທ້ອງຖິ່ນໄດ້ມີການຈັດສັນສະຖານທີ່ຈອດລົດເປັນລານກວ້າງ ເພື່ອຄວາມສະດວກສະບາຍ ແຕ່ສິ່ງສໍາຄັນກ່ອນທີ່ຈະໄປສະຖານທີ່ແຫ່ງນີ້ ຕ້ອງໄດ້ກະກຽມເຂົ້າປາອາຫານ ແລະ ນໍ້າດື່ມໄປນໍາ ເພາະຈະບໍ່ມີຮ້ານຄ້າ ຫຼື ຮ້ານອາຫານໄວ້ໃຫ້ບໍລິການ.
ຜ່ານມາ “ຕາດສະດີ” ກໍມີນັກທ່ອງທ່ຽວແວະວຽນເປັນໄລຍະ ເພາະເປັນນໍ້າຕົກຕາດທີ່ມີຄວາມງົດງາມ ອາກາດເຢັນເໝາະແກ່ການພັກຜ່ອນ; ທາງດ້ານລຸ່ມເບິ່ງຄ້າຍຄືອ່າງນໍ້າ ມີບ່ອນເລິກ ແລະ ບ່ອນຕື້ນ ສາມາດລອຍຫຼິ້ນຕາມຄວາມພໍໃຈ ແລະ ຜູ້ທີ່ໄດ້ແວະວຽນໄປຍັງສະຖານທີ່ແຫ່ງນີ້ສ່ວນຫຼາຍແມ່ນໄດ້ລົງອາບລອຍຫຼິ້ນຊື່ນໃຈ.
ຜູ້ທີ່ໄປຄວນເປັນໄວໜຸ່ມ ແລະ ຜູ້ທີ່ສຸຂະພາບແຂງແຮງ: ເມື່ອເດີນທາງໄປຮອດລານຈອດລົດ ຈະຕ້ອງໄດ້ຍ່າງຜ່ານທາງທີ່ຂ້ອນຂ້າງຊັນລົງພູໄປ ເຊິ່ງຕອນລົງກໍບໍ່ເມື່ອຍປານໃດ ແຕ່ຕອນຂຶ້ນ ກໍຈະເໝືອນເປັນການທົດສອບຄວາມແຂງແກ່ນຂອງຮ່າງກາຍ ແລະ ຈະໄດ້ອອກກໍາລັງກາຍໄປໃນຕົວ ບອກເລີຍວ່າ ເມື່ອຍ ແລະ ມ່ວນ ໜ້າຈົດຈໍາ ເຊິ່ງຕະຫຼອດການເດີນທາງນັ້ນ ຈະສໍາຜັດກັບຄວາມເປັນທໍາມະຊາດຍ່າງເຕັມປ່ຽມ. ແນວໃດກໍດີ ໄລຍະທີ່ເປີດບໍລິການນັ້ນກໍຈະມີປະຊາຊົນໃນພື້ນທີ່ພ້ອມທີ່ຈະຊ່ວຍເຫຼືອທ່ານໃນການເດີນທາງ ໂດຍເຂົາເຈົ້າຮັບບໍລິການຖືເຄື່ອງໃຫ້ ເຊິ່ງຈະຍິບຍື່ນແລ້ວແຕ່ນໍ້າໃຈ.
ເມື່ອລົງໄປຮອດຕາດແລ້ວຈະຮູ້ສຶກສົດຊື່ນ ແລະ ຊຸມຊື່ນໃນເວລາດຽວກັນ ເພາະກະແສນໍ້າທີ່ຕົກ ລົງໃສ່ໂງ່ນຫີນຟົ້ງກະຈາຍ ແລະ ມີລະອອງນໍ້າປົກຄຸມເໝືອນນໍ້າໝອກຍາມເຊົ້າ ແລະ ອ້ອມຮອບສາຍນໍ້າສອງຝາກຂ້າງ ເຮົາຈະຫຼຽວເຫັນຕົ້ນໄມ້ພືດພັນນາໆຊະນິດຂຽວງາມລ້ອມເປັນຮົ່ມເງົາ ແລະ ໃຫ້ ຄວາມຊຸ່ມເຢັນຕະຫຼອດເວລາ.
ຮູ້ແນວນີ້ແລ້ວໃຜບໍ່ທັນໄດ້ໄປກໍຫາໂອກາດຍາເວລາໄປທ່ຽວໄປຊົມຈັກຄັ້ງໜຶ່ງ ຈະສ້າງຄວາມຈົດຈໍາໃຫ້ທ່ານ ແລະ ທຸກຄົນທີ່ຮ່ວມທາງໄດ້ເປັນຢ່າງດີ ແຕ່ໃນໄລຍະທີ່ມີການລະບາດຂອງພະຍາດໂຄວິດ-19 ຄືແນວນີ້ກໍອົດໃຈລໍຄອຍໄປກ່ອນ ຄົງບໍ່ນານເກີນລໍວັນໜຶ່ງກໍຈະເປັນຂອງເຮົາ.
ຂອບໃຈແຫລ່ງທີ່ມາ: laoedaily.com