ຊົມທຳມະຊາດຄວາມສວຍງາມຂອງຕາດນ້ຳແຈ ເມືອງແບງ ແຂວງ ອຸດົມໄຊ
ຕາດທຳມະຊາດນ້ຳແຈ ເມືອງແບງ ແຂວງ ອຸດົມໄຊ ຕາດທີ່ເຕັມປະດ້ວຍຄວາມງົດງາມທາງທຳມະຊາດ
ແຂວງອຸດົມໄຊ ຖືວ່າເປັນແຂວງໜຶ່ງທີ່ມີແຫລ່ງທ່ອງທ່ຽວທຳມະຊາດທີ່ສວຍງາມ ແລະ ທີ່ໜ້າທ່ຽວຫລາຍ, ນ້ຳຕົກຕາດນ້ຳແຈເປັນອີກໜຶ່ງໃນຕາດທີ່ໜ້າທ່ຽວນຂອງແຂວງອຸດົມໄຊ ເຊິ່ງຕັ້ງຢູ່ ບ້ານ ທ່າມື່ນ, ເມືອງແບງ, ແຂວງ ອຸດົມໄຊ ຕັ້ງຢູ່ທາງທິດຕາເວັນອອກຂອງ ບ້ານ ທ່າມື່ນ ເປັນນ້ຳຕົກຕາດ ທີ່ມີຄວາມສວຍງາມ ບໍ່ແພ້ນ້ຳຕົກແຫ່ງອື່ນໆ ພາຍໃນແຂວງ, ແຕ່ສະພາບເສັ້ນທາງການເຂົ້າເຖິງແມ່ນຍັງມີຄວາມຫຍຸ້ງຍາກຢູ່.
ເຊິ່ງວ່າຕາດນ້ຳແຈນີ້ມີເສັ້ນທາງເຂົ້າໄປຫາຕາດຍາວປະມານ 4 ກິໂລແມັດ, ເປັນເສັ້ນທາງທີ່ຍັງບໍ່ໄດ້ຍົກລະດັບ ຢາມຝົນແມ່ນລຳບາກໃນການເດີນທາງ, ສຳລັບທ່າແຮງດ້ານການທ່ອງທ່ຽວ ເຖິງວ່າ ນ້ຳຕົກຕາດ ແຫ່ງນີ້ ຈະເປັນຕາດຂະໜາດນ້ອຍ ແຕ່ກໍມີຄວາມສວຍງາມ ແລະ ມີປ່າໄມ້ໃຫຍ່ປົກຫຸ້ມຢູ່ບໍລິເວນຕາດ, ລັກສະນະຂອງຕາດ ປະກອບດ້ວຍສອງພັກ, ພັກທີໜຶ່ງສູງປະມານ 7 ແມັດ, ພັກທີສອງສູງປະມານ 8 ແມັດ
ໃນປີ 2007 ໄດ້ຮັບການຊ່ວຍເຫຼືອທະລຸເສັ້ນທາງ ຈາກ ບ້ານທ່າມື່ນ ເຂົ້າໄປຫານ້ຳຕົກຕາດແລ້ວປະມານ 3 ກິ ໂລແມັດເຊິ່ງເຮັດໃຫ້ການເຂົ້າໄປທ່ຽວຊົມນັ້ນໄດ້ສະດວກກວ່າເກົ່າ ແລະ ເລີມມີນັກທ່ອງທ່ຽວເຂົ້າໄປທ່ຽວຊົມທຳມະຊາດຕາດນ້ຳແຈນີ້ແລ້ວ ແຕ່ຊວງນີ້ເນື່ອງຈາກການລະບາດຂອງພະຍາດໂຄວິດ-19 ເຮັດໃຫ້ມີນັກທ່ອງທ່ຽວນ້ອຍລົງກວ່າເກົ່າ ແລະ ຕ້ອງໄດ້ປັບປຸງອີກ.
ສຳລັບປະຫວັດຂອງຕາດແຫ່ງນີ້ ຕາມການບອກເລົ່າຂອງເຖົ້າແກ່ວ່າ ຕາດນ້ຳແຈ ເປັນຕາດທ່ອນກາງຂອງເງືອກໃນປາງກ່ອນ, ສ່ວນທ່ອນຫົວ ຕົກຢູ່ຫົວນ້ຳຫາວໃກ້ຊາຍແດນ ເມືອງງາ ແລະ ທ່ອນຫາງຕົກຢູ່ ຫົວນ້ຳແມດ (ບ້ານນາແມດ) ຍ້ອນການຂ້າຟັນລັນແທງລະຫວ່າງມະນຸດ ກັບ ເງືອກ ສາເຫດແມ່ນຍາດຜູ້ສາວມາເປັນເມຍ ແລະ ສາເຫດທີ່ສອງ ທີ່ເອີ້ນກັນ ຕາດນ້ຳແຈ ຍ້ອນເປັນທ່ອນໂຮມຊຸມນຸມກິນແຈ (ໝ້ຽງ) ຂອງຄົນສະໄໝກ່ອນ
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: ຂະແໜງທ່ອງທ່ຽວ ແຂວງ ອຸດົມໄຊ.