ຈະກັບບ້ານ! ແຮງງານຈ່ຳນວນຫລວງຫລາຍລໍກັບບ້ານທີ່ດ່ານນ້ຳເກີ່ງ
ພາບ: laodaily.com.la
ແຮງງານຢູ່ເມືອງຕົ້ນເຜິ້ງຈ່ຳນວນຫລາຍຄົນລໍຖ້າທີ່ຈຸດກວດເຂົ້າ – ອອກເມືອງຈຸດນໍ້າເກິ່ງ.
ເມືອງຕົ້ນເຜີ້ງ ແຂວງບໍ່ແກ້ວ ເປັນເມືອງໜຶ່ງທີ່ກ່ຳລັງມີການລະບາດຂອງພະຍາດໂຄວິດ-19 ຈ່ຳນວນຫລາຍ, ແລະ ແຂວງບໍ່ແກ້ວຖືວ່າຢູ່ອັນດັບສອງຂອງການທີ່ມີຜູ້ຕິດເຊື້ອສະສົມຫລາຍທີ່ສຸດຂອງ ສປປ ລາວ. ແລະ ທ່າມກາງການລະບາດຂອງພະຍາດໂຄວິດ-19ຢູ່ນີ້, ໄດ້ມີເຫດການທີ່ເຮັດໃຫ້ໜ້າຕົກໃຈກໍຄືການທີ່ແຮງງານທີ່ລໍຖ້າຢູ່ຈຸດກວດເຂົ້າ-ອອກ ເມືອງຕົ້ນເຜິ້ງຈ່ຳນວນຫລວງຫລາຍ, ເຮັດໃຫ້ເປັນຂ່າວອອກມາໃນຫລາຍໆສື່ສັງຄົມອອນລາຍ.
ຕາມຂໍ້ມູນຂອງໜັງສືພິມບໍ່ແກ້ວ Bokeo Newspaper ລາຍງານໃນວັນທີ21 ພຶດສະພານີ້ວ່າ: ເນື່ອງຈາກເມືອງຕົ້ນເຜິ້ງ ແຂວງບໍ່ແກ້ວ ຍັງມີການແຜ່ລະບາດ ຂອງພະຍາດ ໂຄວິດ – 19 ເຊິ່ງໄດ້ສົ່ງຜົນຕໍ່ເສດຖະກິດ ຊີວິດການເປັນຢູ່ຂອງປະຊາຊົນພາຍໃນເມືອງ ລວມທັງຄົນຕ່າງເມືອງ, ຕ່າງແຂວງ ແລະ ຕ່າງປະເທດທີ່ເຂົ້າມາ ດຳເນີນທຸລະກິດ ປະກອບອາຊີບ ທຳມາຫາກິນຢູ່ພາຍໃນເມືອງ ຕົ້ນເຜິ້ງ ໂດຍສະເພາະແມ່ນຊາວຜູ້ແຮງງານທີ່ມາຈາກຕ່າງເມືອງ, ຕ່າງແຂວງ ມາອອກແຮງງານຢູ່ບັນດາ, ໂຮງງານ ແລະ ບໍລິສັດສວນໝາກຖົ່ວເຫຼືອງ ຂອງຄົນຕ່າງປະເທດ.
ຍ້ອນສະພາບການດັ່ງກ່າວ ພາຍຫຼັງຜູ້ອອກແຮງງານທີ່ຕົກຄ້າງຢູ່ບັນດາບໍລິສັດພາຍໃນເມືຶອງສ່ວນໃຫຍ່ ໄດ້ຮັບເງິນຄ່າຈ້າງອອກແຮງງານນໍາບັນດາເຈົ້າຂອງບໍລິສັດແລ້ວ ຈຶ່ງໄດ້ພາກັນຫຼັ່ງໄຫຼກັບທ້ອງຖິ່ນລຳເນົາຂອງຕົນເອງ.
ໂດຍສະເພາະ ແມ່ນໃນລະຫວ່າງ ວັນທີ 20-21 ພຶດສະພາ 2021 ນີ້ ໄດ້ມີຜູ້ອອກແຮງງານຈໍານວນຫຼາຍພັນຄົນຫຼັ່ງໄຫຼກັນເຂົ້າມາລໍຖ້າຢູ່ບໍລິເວນປ້ອມຕຳຫຼວດກວດກາຄົນເຂົ້າ – ອອກເມືອງຈຸດນໍ້າເກິ່ງ ເພຶ່ອລໍຖ້າການປະສານງານ ລະຫວ່າງ ອົງການປົກຄອງເມືອງ ແລະ ຂະແໜງການທີ່ກ່ຽວຂ້ອງຂອງເມືອງຕົນກັບອົງການປົກຄອງເມືອງ ຕົ້ນເຜິ້ງ ເພື່ອປະກອບເອກການສານຮັບຮອງເອົາແຮງງານທີ່ຕົກຄ້າງກັບທ້ອງຖິ່ນໃຜລາວ ຈຶ່ງເຮັດໃຫ້ບັນຍາກາດຢູ່ເຂດດັ່ງກ່າວມີຄວາມແອອັດໄປດ້ວຍຜູ້ຄົນທີ່ລໍຖ້າກັບທ້ອງຖິ່ນ.
ຍ້ອນບັນຍາກາດດັ່ງກ່າວ ດ້ວຍຄວາມເປັນຫ່ວງເປັນໄຍ ຈຶ່ງຂໍໃຫ້ພີ່ນ້ອງຊາວຜູ້ອອກແຮງງານທີ່ຈະມາລໍຖ້າກັບຄືນທ້ອງຖິ່ນຂອງຕົນ ປະຕິບັດມາດຕະການປ້ອງກັນການແຜ່ລະບາດ ຂອງພະຍາດ ໂຄວິດ – 19 ດ້ວຍການຮັກສາໄລຍະຫ່າງເທົ່າທີ່ຈະເຮັດໄດ້, ໃສ່ຜ້າອັດປາກ – ດັງ ເພື່ອຄວາມປອດໄພຈາກພະຍາດ ໂຄວິດ – 19 ແລະ ຂໍໃຫ້ພີ່ນ້ອງຊາວຜູ້ອອກແຮງງານທຸກຄົນເດີນທາງກັບທ້ອງຖິ່ນຂອງຕົນດ້ວຍຄວາມປອດໄພ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: laoedaily.com.la
