ສົ່ງເສີມການທ່ອງທ່ຽວພາຍໃນປັບປຸງສະຖານທີ່ທ່ອງທ່ຽວໂຮງນາງສີດາເຂດວັດພູຈຳປາສັກ

ເພື່ອເປັນການສົ່ງເສີມການທ່ອງທ່ຽວພາຍໃນປະເທດ ແລະ ດຶງດູດນັກທ່ອງທ່ຽວຈາກຕ່າງປະເທດເຂົ້າມາທ່ຽວໃນ ສປປ ລາວ ໃຫ້ຫລາຍຂື້ນ, ສະນັ້ນທາງຂະແໜງການທ່ອງທ່ຽວສ ປປ ລາວ ກໍໄດ້ມີນະໂຍບາຍໃນການສົ່ງເສີມການທ່ອງທ່ຽວແບບ ສີຂຽວ ແລະ ປັບປຸງສະຖານທີທ່ອງທຽວໃຫ້ມີຄວາມໜ້າທ່ຽວຊົມຫລາຍຂື້ນ, ແລະ ໂຮງນາງສີດາເຂດມໍລະດົກໂລກວັດພູຈຳປາສັກ ກຳລັງບູລະນະປະຕິສັງຂອນ ໄລຍະ2 ປີ2021-2025 ໃຊ້ງົບ 5ລ້ານໂດລາສະຫະລັດ.

ທ່ານ ອຳພົນ ແສງພະຈັນ ຫົວໜ້າຫ້ອງການມໍລະດົກໂລກວັດພູຈຳປາສັກໄດ້ລາຍງານໃຫ້ຊາບວ່າ:

ການບູລະນະປະຕິສັງຂອນໂຮງນາງສີດາ ເຂດມໍລະດົກໂລກວັດພູຈຳປາສັກທີ່ໄດ້ເຊັນບົດບັນທຶກໃນປີ 2012 ລະຫວ່າງ ກະຊວງ ຖວທ ແລະ ມູນນິທິ ມໍລະດົກວັດທະນະທຳ ສ.ເກົາຫຼີ ແລະ ເລີ່ມລົງມືປະຕິສັງຂອນໃນປີ 2013, ການບູລະນະຄັ້ງນີ້ແມ່ນພົບກັບຄວາມຫຍຸ້ງຍາກຫຼາຍຕ້ອງໄດ້ດຳເນີນການສຳຫຼວດ, ການສຶກສາຄົ້ນຄວ້າທາງດ້ານບູຮານຄະດີໃຫ້ໄດ້ຂໍ້ມູນທີ່ລະອຽດໃຊ້ເວລາ ຫຼາຍກວ່າ 4-5ປີ ຈຶ່ງໄດ້ເລີ່ມລົງມືປະຕິບັດການບູລະນະປະຕິສັງຂອນ

ມາຮອດປັດຈຸບັນແມ່ນຢູ່ໃນໄລຍະປີ 2021-2025 ທາງຫ້ອງການມໍລະດົກໂລກວັດພູຈຳປາສັກຈະໄດ້ສຸມໃສ່ການປະຕິບັດຕາມຂັ້ນຕອນຕາມລະບຽບຫຼັກການ ຕາມການບູລະນະຈາກອົງການອຸຍເນັດສະໂກວາງອອກຢ່າງເຂັ້ມງວດ, ເພື່ອຮັກສາວັດຖຸພັນຕ່າງໆທີ່ເປັນຄຸນຄ່າມໍລະດົກໃຫ້ດີທີ່ສຸດ.

ສຳລັບໂຮງນາງສີດາໄລຍະທີ່1 ປີ 2012-2020 ໃຊ້ງົບ 7ລ້ານໂດລາສະຫະລັດ, ໄລຍະທີ່2 ປີ 2021-2025 ໃຊ້ງົບ 5ລ້ານໂດລາສະຫະລັດ.

ໂຮງນາງສີດາມີເນື້ອທີ່ 54,549ຕາແມັດ ແລະ ສັນນິຖານວ່າໄດ້ສ້າງໂຮງນາງສີດາແຕ່ສັດຕະວັດທີ 10 ຫາ ສັດຕະວັດທີ 11. ຫ່າງຈາກມໍລະດົກໂລກວັດພູຈຳປາສັກໄປທາງທິດໃຕ້ປະມານ 1 ກມ, ປັດຈຸບັນພາກສ່ວນທີ່ກ່ຽວຂ້ອງໄດ້ຍົກຍ້າຍຫີນທີ່ເພພັງລົງມາຍ້ອນການເວລາ ອອກໄປອະນາໄມ ແລະ ກະກຽມປະກອບເຂົ້າຄືນຈຸດທີ່ຕັ້ງເດີມຂອງກ້ອນຫີນແຕ່ລະກ້ອນ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບໃຈແຫລ່ງທີ່ມາ: Media Laos