ມາຮູ້ຈັກກັບເສົາຫີນອັນເກົ່າແກ່ ແລະ ມີຄວາມໝາຍຄວາມສຳຄັນຂອງວັດອິນແປງ ມະຫາວິຫາຣ.

ຫາກໃຜທີ່ມາວຽງຈັນແລ້ວຍັງບໍ່ຮູ້ຈັກວັດອິນແປງກໍ່ຖືວ່າຍັງຄົງບໍ່ໄດ້ຄຸກຄີກັບວັດທະນະທຳຮີດຄອງປະເພນີວັດວາອາຮາມຂອງນະຄອນຫລວງວຽງຈັນເທືອ, ວັດອິນແປງຖືວ່າເປັນວັດສຳຄັນແຫ່ງໜຶ່ງຂອງນະຄອນຫລວງວຽງຈັນ ແລະ ເປັນວັດທີ່ເກົ່າແກ່ ມີພຣະພຸດທະຮູບທີ່ມີຄວາມເປັນເອກະລັກ ແລະ ສວຍສົດງົດງາມ ພ້ອມກັບຄວາມສັກສິດທີປະຊາຊົນຊາວນະຄອນຫລວງວຽງຈັນໄປມາຕ້ອງໄດ້ກາບໄຫວ້.

ເສົາຫີນ ທີ່ເກົ່າແກ່ແລະສຳຄັນຂອງວັດອິນແປງ ມະຫາວິຫາຣ ນະຄອນຫລວງວຽງຈັນເປັນເສົາຫິນແກະສະຫລັກພຣະພຸທທະເຈົ້າ 28 ອົງ ໃນຍຸກສະໄໝກ່ອນລ້ານຊ້າງ , ກ່ອນຈະຮອດພຣະພຸທທະເຈົ້າໂຄດົມ ໃນຍຸກປັດຈຸບັນນີ້ ກໍ່ໄດ້ມີປາກົດມີພຣພຸທທະເຈົ້າມາກ່ອນ 27 ອົງກ່ອນຫນ້ານີ້ ແລະກ່ອນຫນ້າ 27 ອົງກໍ່ມີຈຳນວນຫລວງຫລາຍຈົນນັບບໍ່ຖ້ວນ ເພິ່ນວ່າຫລາຍກວ່າເມັດຊາຍໃນມະຫາສະມຸດທັງອີກ.

ແຕ່ໃນທີ່ນີ້ຈະມານັບແຕ່ 28 ອົງ ເຊິ່ງປະກອບດ້ວຍພຣະນາມດັ່ງນີ້ :

01. ພຣະພຸທທະເຈົ້າຕັນຫັງກອນ ( ຕັນຫັງກະໂຣ )

02. ພຣະພຸທທະເຈົ້າເມທັງກອນ ( ເມທັງກະໂຣ )

03. ພຣະພຸທທະເຈົ້າສະຣະນັງກອນ ( ສະຣະນັງກະໂຣ )

04. ພຣະພຸທທະເຈົ້າທີປັງກອນ ( ທີປັງກະໂຣ )

05. ພຣະພຸທທະເຈົ້າໂກນດັນຍະ ( ໂກດັນໂຍ )

06. ພຣະພຸທທະເຈົ້າມັງຄະຣະ ( ມັງຄະໂຣ )

07. ພຣະພຸທທະເຈົ້າສຸມະນະ ( ສຸມະໂນ )

08. ພຣະພຸທທະເຈົ້າເຣວະຕະ ( ເຣວະໂຕ )

09. ພຣະພຸທທະເຈົ້າໂສພິຕະ ( ໂສພິໂຕ )

10. ພຣະພຸທທະເຈົ້າອະໂນມະທັສສີ

11. ພຣະພຸທທະເຈົ້າປະທຸມະ (ປະທຸໂມ)

12. ພຣະພຸທທະເຈົ້ານາຣະທະ (ນາຣະໂທ)

13. ພຣະພຸທທະເຈົ້າປະທຸມຸຕຕະຣະ (ປະທຸມຸຕຕະໂຣ)

14. ພຣະພຸທທະເຈົ້າສຸເມທະ (ສຸເມໂທ)

15. ພຣະພຸທທະເຈົ້າສຸຊາຕະ (ສຸຊາໂຕ)

16. ພຣະພຸທທະເຈົ້າປິຍະທັສສີ

17. ພຣະພຸທທະເຈົ້າອັຖຖະທັສສີ

18. ພຣະພຸທທະເຈົ້າທັມມະທັສສີ

19. ພຣະພຸທທະເຈົ້າສິດທັດຖະ (ສິດທັດໂຖ)

20. ພຣະພຸທທະເຈົ້າຕິສສະ (ຕິສໂສ)

21. ພຣະພຸທທະເຈົ້າປຸສສະ (ປຸສໂສ)

22. ພຣະພຸທທະເຈົ້າວິປັສສີ

23. ພຣະພຸທທະເຈົ້າສິຂີ

24. ພຣະພຸທທະເຈົ້າເວສສະພູ

25. ພຣະພຸທທະເຈົ້າກະກຸສັນທະ (ກະກຸສັນໂທ)

26. ພຣະພຸທທະເຈົ້າໂກນາຄະມະນະ (ໂກນາຄະມະໂນ)

27. ພຣະພຸທທະເຈົ້າກັສສະປະ (ກັສສະໂປ)

28. ພຣະພຸທທະເຈົ້າໂຄຕະມະ ຫລື ໂຄດົມ ຫລື ໂຄຕະໂມ (ອົງປັດຈຸບັນນີ້ເອງ).

ຫາກຈະແບ່ງຕາມກັບ ໂດຍການນັບອະສົງໄຂກັບ ຈະນັບອະສົງໄຂທຳອິດໂດຍເຣິ່ມນັບຈາກໄລຍະເວລາທີ່ ອະດິດຊາດຂອງພຣະສັມມາສັມພຸທທະເຈົ້າໂຄຕະມະ ເຣິ່ມສ້າງບາຣະມີ ໂດຍການອະທິຖານປາຖະໜາໃນໃຈວ່າຈະເປັນພຣະສັມມາສັມພຸທທະເຈົ້າເປັນຄັ້ງທຳອິດ ນັບແຕ່ອະດິດຮອດທຸກມື້ນີ້ ຜູ້ມີໃຈສັດທາທີ່ແຮງກ້າ ມັກຈະສ້າງພຣະພຸທທະຮູບ 28 ອົງຖວາຍວັດ ໂດຍແກະສະລັກ ຈາກຫີນ ໄມ້ ຫລືຫລໍ່ດ້ວຍທອງສຳຣິດ ນອກນັ້ນຍັງແຕ້ມໄວ້ພື້ນຫລັງຂອງພຣະປະທານຕາມວັດຕ່າງໆ ເຮັດຜ້າພິມເປັນທຸງ … ເພື່ອຖວາຍເປັນພຸທທະບູຊາ

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບໃຈແຫລ່ງທີ່ມາ: Art and Culture of Laos