ໄດ້ຂໍ້ສະຫລຸບກໍານົດມື້ຈັດງານບຸນຊ້າງໄຊຍະບູລີທີ່ຈະມີຂື້ນໃນປີໜ້າ
ພາບ: ຄົນມັກທ່ຽວ
ໄຊຍະບູລີ ກໍານົດມື້ຈັດງານບຸນຊ້າງ ໃນເດືອນກຸມພາປີໜ້າ.
ຕາມຮີດຄອງປະເພນີຂອງຂອງຊາວເມືອງໄຊຍະບູລີກໍຄືຮີດຄອງປະເພນີຂອງຊາດລາວເຮົາ ແລະ ຈະຈັດຂື້ນທຸກໆປີໃນຊວງຕົ້ນປີ ທັງນີ້ທັງນັ້ນກໍເພື່ອຍັງໃຫ້ມີການຈັດງານປະເພນີຕໍ່ໄປອີກທັງເພື່ອເປັນການປະຕິບັດຕາມມາດຕະການຂອງໜ່ວຍສະເພາະກິດແຫ່ງຊາດ ໃນການຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19.
ດັ່ງນັ້ນແຂວງໄຊຍະບູລີ ຈຶ່ງໄດ້ຈັດກອງປະຊຸມ ປຶກສາຫາລື ກ່ຽວກັບການກະກຽມຈັດງານບຸນຊ້າງ ປະຈໍາປີ 2021 ຂຶ້ນໃນວັນທີ 25 ທັນວາ, ທີ່ຫ້ອງປະຊຸມ ແນວລາວສ້າງຊາດ ແຂວງໃນການຈະຈັດງານບຸນຊ້າງປະຈໍາປີ 2021 ຂຶ້ນຕາມຮີດຄອງປະເພນີ ໂດຍຈະໄດ້ຈໍາກັດແຂກຄົນເພື່ອເຂົ້າຮ່ວມງານບຸນດັ່ງກ່າວ ໂດຍການເປັນປະທານຂອງທ່ານ ເພັດພິໄຊ ສູນວິໄລ ຮອງເຈົ້າແຂວງ ໄຊຍະບູລີ, ມີຫົວໜ້າ, ຮອງຫົວໜ້າ ພະແນກການ, ກົມກອງ ແລະ ພະນັກງານວິຊາການຈາກຫ້ອງວ່າການແຂວງເຂົ້າຮ່ວມ.
ໃນກອງປະຊຸມຜູ້ເຂົ້າຮ່ວມ ໄດ້ປຶກສາຫາລືກັນເພື່ອຫ້າງຫາກະກຽມໃນການຈັດງານບຸນຊ້າງປະຈໍາປີໂດຍໄດ້ຕົກລົງຈັດງານບຸນຊ້າງເປັນເວລາ 1 ວັນຄື:
ວັນທີ 13 ກຸມພາ 2021 ເປັນມື້ຈັດງານບຸນ, ໃນງານຈະມີການທໍາບຸນຕັກບາດເພື່ອອຸທິດບຸນກຸສົນໄປໃຫ້ຊ້າງທີ່ລ່ວງລັບໄປແລ້ວ, ຈາກນັ້ນຈະໄດ້ມີການແຫ່ຊ້າງ 21 ໂຕອ້ອມເມືອງເຂົ້າສູ່ສະໜາມຫຼວງຂອງແຂວງ, ມີການບາສີສູ່ຂວັນໃຫ້ຊ້າງ ແລະ ນໍາຊ້າງກິນອາຫານບຸບເຟຖືວ່າຈົບພິທີ.
ນອກນີ້, ຍັງຈະມີການວາງສະແດງສິນຄ້າທີ່ເປັນຜະລິດຕະພັນຂອງທ້ອງຖິ່ນພາຍໃນແຂວງຈໍານວນໜຶ່ງເພື່ອວາງສະແດງໃນງານບຸນຊ້າງປີນີ້, ທ່ານ ຮອງເຈົ້າແຂວງ ໄດ້ກ່າວວ່າ:
ການຈັດງານບຸນຊ້າງປີ2021 ນີ້ ແມ່ນຈະໄດ້ເຮັດນ້ອຍຕາມຮີດຄອງປະເພນີ ທີ່ເຄີຍປະຕິບັດກັນມາ ໂດຍໄດ້ກໍານົດເອົາວັນທີ 13 ກຸມພາ 2021 ເປັນມື້ຈັດງານບຸນ, ກໍານົດ 1 ວັນ ໂດຍໄດ້ກໍານົດຈໍານວນພົນເພື່ອເຂົ້າຮ່ວມ, ທັງໝົດນີ້ແມ່ນການປຶກສາຫາລື ແລະ ກໍານົດການຈັດງານບຸນຂັ້ນຕົ້ນ,
ສ່ວນວ່າຈະໄດ້ຈັດງານບຸນດັ່ງກ່າວ ຫຼື ບໍ່ນັ້ນແມ່ນຂັ້ນເທິງຈະເປັນຜູ້ຕັດສິນວ່າຈະອະນຸຍາດໃຫ້ຈັດ ຫຼື ບໍ່ ແລະ ຈະໄດ້ມີການຖະແຫຼງຂ່າວໃຫ້ສັງຄົມໄດ້ຮັບຮູ້ຕາມທີ່ຫຼັງ ແລະ ດ້ານໜຶ່ງກໍ່ເພື່ອເປັນການຕ້ານ ແລະ ສະກັດກັ້ນບໍ່ໃຫ້ມີການແຜ່ລະບາດຂອງພະຍາດ ໂຄວິດ-19 ມາຍັງແຂວງ ໄຊຍະບູລີ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນ: Lao Youth Radio
