ເປີດແລ້ວ! ນ້ຳຕົກຕາດແດນພູສູງອີກໜຶ່ງແຫຼ່ງທ່ອງທ່ຽວທຳມະຊາດສວຍງາມ
ເສດຖະກິດ-ສັງຄົມ
ພິທີເປີດຢ່າງເປັນທາງການຂອງແຫຼ່ງທ່ອງທ່ຽວນໍ້າຕົກຕາດແດນພູສູງຂອງ ແຂວງຫົວພັນ
ການທ່ອງທ່ຽວພາຍໃນ ສປປ ລາວ ກ່ຳລັງເລີມຕົ້ນຢ່າງຄືກຄັກອີກຄັ້ງໜຶ່ງຫລັງຈາກໄດ້ຢຸດສະຫງັດມາດົນເນືອງຈາກການລະບາດຂອງພະຍາດໂຄວິດ-19 ໄດ້ສົ່ງຜົນກະທົບໂດຍກົງຕໍ່ຂະແໜງການທ່ອງທ່ຽວ ແລະ ທຸກໆສະຖານທີ່ທ່ອງທ່ຽວກໍ່ຕ້ອງໄດ້ຢຸດ ແລະ ບາງກິດຈະການກໍຕ້ອງໄດ້ປິດລົງ, ມາໃນຕົ້ນປີນີ້ລັດຖະບານກໍໄດ້ມີນະໂຍບາຍໃໝ່ອອກມາເພື່ອກະຕຸ້ນການທ່ອງທ່ຽວໃຫ້ມາຄືກຄັກອີກ, ຫລາຍໆສະຖານທີແຫລ່ງທ່ອງທ່ຽວກໍໄດ້ຮັບການປັບປຸງຄືນ ແລະ ເປີດໃຫ້ບໍລິການປົກກະຕິແລ້ວ.
ພິທີເປີດໃຫ້ບໍລິການແຫຼ່ງທ່ອງທ່ຽວນໍ້າຕົກຕາດແດນພູສູງຢ່າງເປັນທາງການໄດ້ຈັດຂຶ້ນໃນວັນທີ 26 ພະຈິກ 2019 ນີ້ ທີ່ບ້ານນໍ້າເຕີບ ເມືອງສົບເບົາ ແຂວງຫົວພັນ ເຂົ້າຮ່ວມເປີດປ້າຍ ແລະ ລັ່ນຄ້ອງມີທ່ານ ອຳພອນ ຄຳປັນຍາ ຮອງເລຂາພັກເມືອງເມືອງສົບເບົາ, ທ່ານ ພູວັນ ເພັດມີໄຊ ຮອງຫົວໜ້າພະແນກຖະແຫຼງຂ່າວວັດທະນະ ທຳ ແລະທ່ອງທ່ຽວແຂວງຫົວພັນ, ມີພາກສ່ວນກ່ຽວຂ້ອງຂັ້ນແຂວງ, ເມືອງສົບເບົາ, ເມືອງອ້ອມຂ້າງ, ເຈົ້າຂອງກິດຈະການ ແລະປະຊາຊົນເຂດນໍ້າເຕີບເຂົ້າຮ່ວມ.
ແຫຼ່ງທ່ອງທ່ຽວທໍາມະຊາດນໍ້າຕົກຕາດແດນພູສູງເປັນກິດຈະການການລົງທຶນສຳປະທານຂອງ ທ່ານ ເຍຍ ລີມົວ ນັກທຸລະກິດບ້ານນໍ້າເຕີບ ເມືອງສົບເບົາ ແຂວງຫົວພັນ, ແຫຼ່ງທ່ອງທ່ຽວແຫ່ງນີ້ເປັນແຫຼ່ງທ່ອງທ່ຽວທໍາມະຊາດແຫ່ງໜຶ່ງທີ່ມີຄວາມສວຍສົດງົດງາມ, ມີຄວາມອຸດົມສົມບູນເຕັມໄປດ້ວຍທັດສະນີຍະພາບທໍາມະຊາດພູຜາປ່າໄມ້, ຊຶ່ງຢູ່ຫ່າງຈາກເທດສະບານເມືອງສົບເບົາ ໄປທາງທິດຕາເວັນອອກຕາມເສັ້ນທາງເລກທີ 6B ປະມານ 28 ກິໂລແມັດ,
ມີເນື້ອທີ່ສໍາປະທານທັງໝົດ 6 ເຮັກຕາ ກວ່າ ຊຶ່ງໄດ້ເລີ່ມລົງມືຈັດຕັ້ງປະຕິບັດການກໍ່ສ້າງມາແຕ່ເດືອນມີນາປີ 2019 ເປັນຕົ້ນມາ ແລະ ໄດ້ຮັບການສະໜັບສະໜູນຈາກຄະນະພັກ, ອໍານາດການປົກຄອງບ້ານນໍ້າເຕີບ ແລະຄະນະພັກອໍານາດການປົກຄອງເມືອງສົບເບົາ,
ຊຶ່ງມີອາຍຸສໍາປະທານ 40 ປີ, ມູນຄ່າການກໍ່ສ້າງ ແລະລົງທຶນທັງໝົດ 539 ລ້ານກີບ,ກໍານົດການກໍ່ສ້າງເປັນ 2 ໄລຍະມາຮອດປະຈຸບັນໄດ້ປະຕິບັດສຳເລັດ 90%, ໂຄງການແມ່ນຈັດຕັ້ງປະຕິບັດໄປຕາມແຜນແມ່ບົດຢ່າງຖືກຕ້ອງ ແລະໄປຕາມລະບົບເຕັກນິກຢ່າງຄັກແນ່.
ຊຶ່ງກິດຈະກຳຫຼັກໃນການກໍ່ສ້າງສິ່ງອໍານວຍຄວາມສະດວກໃນສະຖານທີ່ແຫຼ່ງທ່ອງທ່ຽວແຫ່ງນີ້ປະກອບມີ: ສ້າງຂັ້ນໄດເຫຼັກຕັ້ງແຕ່ຫົວຕາດລົງຮອດຈຸດພັກຜ່ອນປະ ມານ 765 ຂັ້ນ, ສ້າງສາຍສະລິງຍາວ 800 ກວ່າແມັດ, ສ້າງຂົວອູ່ຍາວ 140 ແມັດ ນອກນີ້ຍັງສ້າງຈຸດພັກເຊົາຕາມຂັ້ນໄດ, ສ້າງຕູບຜັກຜ່ອນ, ສ້າງໜອງປາ, ສວນສັດ, ທະລຸເດີນຈອດລົດ, ເດີນຈັດກິດຈະກຳ, ເດີນຊົນງົວ, ສ້າງເສັ້ນທາງລົງສູ່ເຂດທ່ອງທ່ຽວ, ສ້າງບ່ອນເກັບປີ້, ກໍ່ສ້າງເຮືອນພັກ ແລະ ອື່ນໆ ຄາດວ່າການກໍ່ສ້າງຕ່າງໆຈະປະຕິບັດໃຫ້ສໍາເລັດໃນປີ 2020.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ເສດຖະກິດ-ສັງຄົມ
