ເຍົາວະຊົນລຸ້ນໃໝ່ສືບທອດດົນຕີພື້ນເມືອງສາຍເລືອດລາວ
ຝຶກສອນດົນຕີພື້ນເມືອງລາວໃຫ້ນ້ອງນັກຮຽນ, ອະນຸຊົນ ຄົນຮຸ່ນໃໝ່ຂອງເມືອງວິລະບູລີ ຄັ້ງທີ II.
ເພືອໃຫ້ສິນລະປະດົນຕີທີ່ເປັນເອກະລັກຂອງລາວເຮົາໄດ້ຢູ່ຄູ່ບ້ານຄູ່ເມືອງຕະຫລອດໄປ ດົນຕີພື້ນເມືອງຕ້ອງໄດ້ມີການຝຶກແອບສົ່ງຕໍ່ໃຫ້ເຍົາວະຊົນລຸ້ນຕໍ່ໆໄປ ເພືອເປັນການອະນຸລັກປົກປັກຮັກສາມໍລະດົກວັດທະນະທໍາ ບໍ່ໃຫ້ສູນຫາຍໄປຕາມການເວລາ ແລະ ເພື່ອເປັນການຖ່າຍທອດຄວາມຮູ້, ຄວາມສາມາດດ້ານການຫລິ້ນດົນຕຣີພື້ນເມືອງລາວ ໃຫ້ແກ່ຄົນຮຸ່ນຫລັງ.
ໃນຕອນເຊົ້າຂອງວັນທີ 3 ສິງຫາ 2022 ນີ້ຢູ່ທີ່ຫ້ອງປະຊຸມຫໍວັດທະນະທໍາເມືອງວິລະບູລີ ແຂວງສະຫວັນນະເຂດ ຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງ ໄດ້ຈັດພິທີເປີດຊຸດອົບຮົມການຫລິ້ນເຄື່ອງດົນຕຣີພື້ນເມືອງລາວໃຫ້ແກ່ນ້ອງນັກຮຽນຂອງເມືອງວິລະບູລີ ຄັ້ງທີ II ຂຶ້ນ.
ໂດຍການເຂົ້າຮ່ວມເປັນປະທານຂອງທ່ານ ສີຄູນ ບານມະນີວົງ ກໍາມະການພັກເມືອງ ຮອງເຈົ້າເມືອງ ວິລະບູລີ ຜູ້ຊີ້ນໍາວຽກງານຂົງເຂດວັດທະນະທໍາ – ສັງຄົມ, ເຂົ້າຮ່ວມມີທ່ານ ມົງກຸດເພັດ ວົງພະຈັນ ຮອງຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງສະຫວັນນະເຂດ, ມີທ່ານ ກັນຫາ ໄຊຍະສານ ຫົວໜ້າຫ້ອງການ ຖວທ ເມືອງວິລະບູລີ, ທ່ານ ພອນສະຫວັດ ກຸນລະວົງ ຕາງໜ້າຈາກບໍລິສັດລ້ານຊ້າງ ມີເນໂຣນ ລິມິເຕັດ; ມີບັນດາທ່ານ ແຂກທີ່ຖືກເຊີນ, ອາຈານສອນດົນຕຣີພື້ນເມືອງ, ພ້ອມດ້ວຍນ້ອງນັກຮຽນເຂົ້າຮ່ວມ.
ສໍາລັບການຝຶກອົບຮົມໃນຄັ້ງນີ້ ແມ່ນຈະໃຊ້ເວລາທັງໝົດປະມານ 01 ເດືອນ ເຊິ່ງເລີ່ມວັນທີ 3 ສິງຫາ ຫາ ວັນທີ 3 ກັນຍາ 2022 ແລະ ມີນ້ອງນັກຮຽນເຂົ້າຮ່ວມຝຶກອົບຮົມທັງໝົດຈໍານວນ 15 ຄົນ,ຍິງ 9 ຄົນ ທີ່ມາຈາກໂຮງຮຽນ ມສ ພູຄໍາ, ເຄື່ອງດົນຕຣີທີ່ນໍາໃຊ້ເຂົ້າໃນການຝຶກອົບຮົມໃນຄັ້ງນີ້ ປະກອບມີ : ລະນາດເອກ, ລະນາດທຸ້ມ, ຄ້ອງວົງໃຫຍ່, ຄ້ອງວົງນ້ອຍ, ຊໍອີ້, ຊໍອູ້, ຊິ່ງ, ສາບ, ແຄນ ແລະ ຂຸ່ຍ ເຊິ່ງການຝຶກອົບຮົມ ແມ່ນນໍາໃຊ້ງົບປະມານ ຈາກກອງທຶນພັດທະນາທ້ອງຖິ່ນເມືອງວິລະບູລີ ຂອງບໍລິສັດ ລ້ານຊ້າງມີເນໂຣນສ໌ ລິມິເຕັດ ປະຈໍາປີ 2022 ລວມເປັນເງິນ 5.000 ໂດລາ
ພາຍຫຼັງສໍາເລັດການຝຶກອົບຮົມໃນຄັ້ງນີ້ແລ້ວ ກໍ່ຈະເຮັດໃຫ້ເມືອງ ວິລະບູລີ ໄດ້ມີວົງດົນຕຣີພື້້ນເມືອງລາວ ທີ່ຈະໄດ້ສະແດງຮັບໃຊ້ໃນວັນສໍາຄັນຕ່າງໆຂອງຊາດ ກໍ່ຄືຂອງເມືອງ ແລະ ນອກຈາກນີ້ແລ້ວ ກໍ່ຍັງເປັນການເຮັດໃຫ້ເມືອງ ວິລະບູລີ ໄດ້ມີສິນລະປິນດ້ານການຫຼິ້້ນດົນຕຣີພື້ນເມືອງລາວ ໄວ້ຖ່າຍທອດຄວາມຮູ້, ບົດຮຽນທີ່ໄດ້ຮຽນມາ ຕໍ່ໃຫ້ຄົນຮຸ່ນຫຼັງສືບຕໍ່ໄປໃນອະນາຄົດ ທັງເປັນການອະນຸລັກປົກປັກຮັກສາມໍລະດົກວັດທະນະທໍາຂອງລາວເຮົາ ກໍ່ຄືທ້ອງຖິ່ນເມືອງວິລະບູລີ ນີ້ໄວ້ໃຫ້ຍືນຍົງຕໍ່ໄປໃຫ້ຍາວນານ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: Media Laos