ຮ່ອນຄໍາ ເປັນອີກກິດຈະກຳອັນເດັນໃນງານປະກາດມໍລະດົກແຫ່ງຊາດ
ຂປລ.
ການປະກາດມໍລະດົກແຫ່ງຊາດ ກິດຈະກໍາ ຮ່ອນຄໍາ ສ້າງບັນຍາກາດ ທີ່ເປັນສີສັນຫລາຍ
ຮ່ອນຄໍາ ເປັນເອກະລັກວັດທະນາທຳຂອງແຂວງອັດຕະປື, ເຊິ່ງປະຊາຊົນຊາວອັດຕະປືໄດ້ອາໃສການ ຮ່ອນຄຳ ເປັນອາຊີບໃນການດຳລົງຢູ່, ແລະ ໃນພິທີປະກາດວັດຫລວງ ເມືອງເກົ່າ ແລະ ວັດທາດພະໄຊ ຢູ່ເມືອງໄຊເສດຖາ ເປັນມໍລະດົກແຫ່ງຊາດລະດັບທ້ອງຖິ່ນ, ເມືອງ ໄຊເສດຖາ ແຂວງອັດຕະປື ຈັດກິດຈະກຳຮ່ອນແຮ່-ຮ່ອນຄຳຢູ່ລໍານໍ້າເຊກະໝານ ເພື່ອເປັນການສ້າງບັນຍາກາດ ແລະ ການມີສ່ວນຮ່ວມໃຫ້ຫລາກຫລາຍກິດຈະກໍາ ທາງດ້ານວັດທະນະທໍາ
ໂດຍພາຍໃຕ້ການນໍາພາຂອງອົງການປົກຄອງແຂວງ ຮ່ວມກັບສະມາຄົມສຽງແຄນລາວ ວາງແຜນ, ຊຸກຍູ້ສົ່ງເສີມກິດຈະກໍາທາງດ້ານວັດຖຸ ແລະ ຈິດໃຈ ທີ່ເປັນການສືບສານຢ້ອນຮອຍອາດີດ ທີ່ສ່ອງແສງໃຫ້ເຫັນວິທີການດໍາລົງຊິວິດ, ຮີດຄອງ, ການທໍາມາຫາກິນ, ການນຸ່ງຖື ແລະ ພາສາປາກເວົ້າຂອງບັນດາເຜົ່າຊາວແຂວງ ອັດຕະປື.
ການຮ່ອນແຮ່-ຮ່ອນຄໍາ ພື້ນຖານແລ້ວ ພາຍຫລັງທີ່ສຳເລັດການເກັບກ່ຽວຜົນຜະລິດໃນລະດູຝົນ, ເມື່ອຮອດລະດູແລ້ງ ແມ່ນ້ຳຕາມຫ້ວຍຮ່ອງລຳເຊ ເລີ່ມບົກລົງແລ້ວ, ເຊິ່ງພໍ່ແມ່ປະຊາຊົນກໍຈະຊອກຊ່ອງທາງຈັດເກັບລາຍຮັບເສີມດ້ວຍວິທີການຕ່າງໆ ແລະ ການຮ່ອນຄຳກໍແມ່ນອີກຊ່ອງທາງໜຶ່ງທີ່ສາມາດສ້າງລາຍຮັບສູງສົມຄວນ. ດັ່ງນັ້ນ, ປະຊາຊົນຈໍານວນຫລາຍເກືອບເວົ້າໄດ້ວ່າ ຖືເອົາການຮ່ອນແຮ່-ຮ່ອນຄໍາໃຫ້ເປັນຂະບວນ ແລະ ການປະດິດສ້າງດ້ວຍວິທີການແຕກຕ່າງກັນໄປເຊັ່ນ:
ການນໍາໃຊ້ອຸປະກອນຂຸດຄົ້ນ ເປັນຕົ້ນ ກະບ້າງເຮັດດ້ວຍໄມ້ ຫລື ເຫລັກ, ຊວ້ານ, ຈົກ, ກວດແກ້ວນ້ອຍໆເພື່ອໃສ່ຄໍາທີ່ຮ່ອນແລ້ວ ຫລື ອຸປະກອນອື່ນໆ. ສ່ວນວິທີການຂັ້ນຕອນການຮ່ອນກໍແຕກຕ່າງກັນໄປຕາມຄວາມເໝາະສົມ ແລະ ຄວາມ ຖະນັດຂອງໃຜລາວ. ນອກຈາກນັ້ນ, ຍັງເປັນການຊອກທ່າແຮງບົ່ມຊ້ອນ ຕາມແມ່ນ້ຳລຳເຊຕ່າງໆ ເພື່ອການຂຸດຄົ້ນບໍ່ວ່າຈະເປັນນໍ້າເຊກອງ, ເຊກະໝານ, ຫ້ວຍຮ່ອງຄອງບຶງໃນເຂດພູສູງ, ພູພຽງຕາມເງື່ອນໄຂ ຫລື ຕາມຈຸດທີ່ມີແຮ່ຄໍາ.
ສໍາລັບການເຂົ້າຮ່ວມກິດຈະກໍາໃນຄັ້ງນີ້, ປະກອບມີ 4 ກຸ່ມຄື: ກຸ່ມບ້ານເຊໃຫຍ່ ເມືອງສາມັກຄີໄຊ, ກຸ່ມບ້ານວັດທາດພະໄຊ ແລະ ບ້ານວັດຫລວງ ເມືອງໄຊເສດຖາ, ກຸ່ມບ້ານມິດສະພັນ ເມືອງສະໜາມໄຊ ແລະ ກຸ່ມບ້ານປະອໍາ ເມືອງຊານໄຊ. ທັງນີ້, ກໍເພື່ອເປັນການສືບສານສຶກສາຮຽນຮູ້ ແລະ ປູກຈິດສໍານຶກໃຫ້ແກ່ຄົນຮຸ່ນໃໝ່ໄດ້ຮັບຮູ້ ແລະ ເຫັນໄດ້ເຖິງຮີດຄອງປະເພນີ, ວັດທະນະທໍາ, ວິຖີດໍາລົງຊີວິດທີ່ໄດ້ສືບທອດກັນມາແຕ່ບູຮານນະການເຖິງປັດຈຸບັນ ແລະ ອັນສໍາຄັນ ເພື່ອສົ່ງເສີມ, ອະນຸລັດວັດທະນະທໍາຮີດຄອງປະເພນີ ໃຫ້ສືບທອດເຊັ່ນລູກເຊັ່ນຫລານຕະຫລອດໄປ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ ເບີ່ງເມືອງລາວ
ຂອບໃຈແຫຼ່ງຂໍ້ມູນຈາກ: ຂປລ.
