ມາເບິ່ງ “ຄອງ 14” ສຳລັບພຣະສົງອົງຄະເຈົ້າໃນທາງພຸດທະສາສະໜາ.

ຮີດ 12 ຄອງ 14 ຄືຄຳທີ່ຫລາຍໆຄົນລາວເວົ້າກັນມາຕະຫລອດ ແລະ ຄິດວ່າຄົນລາວຫລາຍໆຄົນເຄີຍໄດ້ຍິນໄດ້ຟັງຢູ່ແລ້ວເລື່ອງຄອງ 14 ຄົນລາວສ່ວນຫລາຍຈະໄດ້ຮູ້ ແລະ ຍິນມາແຕ່ຍັງນ້ອຍໆຈົນໃຫຍ່, ແຕ່ໃນນີ້ເຮົາຈະມາຮູ້ຈັກແຕ່ລະຄອງຂອງຄອງ 14 ໃນທາງພຸດທະສາດສະໜາ, ເຊິງມີດັ່ງນີ້

ໃນຄອງ 14 ຂອງສົງ ມີກ່າວໄວ້ຫຍໍ້ໆ ດັ່ງຕໍ່ໄປນີ້ ແຕ່ບໍ່ເຫັນມີບຸນວິສາຂະເລີຍ ຄື :

ໃຫ້ພະສັງຄະເຈົ້າ ສູດຮຽນທໍາຄໍາສອນຂອງພະພຸດທະເຈົ້າ ແລະ ຮັກສາສິນ 227 ຢ່າໃຫ້ຂາດ.
ໃຫ້ບົວລະບັດກຸຕິວິຫານ ປັດຕາດ ກວາດຍູ ຢ່າໃຫ້ວັດເສົ້າຫມອງ.

ໃຫ້ປະຕິບັດຈັດທໍາໄປຕາມສັດທາຊາວບ້ານນິມົນ ມີການທໍາບຸນໃຫ້ທານ ບວດຫົດ ເປັນຕົ້ນ.
ເຖິງລະດູເດືອນ 8 ໃຫ້ເຂົ້າວັດສາຕະຫລອດ 3 ເດືອນ ຈົນເຖິງເດືອນ 11 ແຮມຄໍ່າ 1 ແຕ່ເດືອນ 11 ແຮມ 1 ໄປເຖິງເດືອນ 12 ເພັງ ໃຫ້ຮັບຜ້າກະຖິນ ຮັກສາຄອງຜ້າ ເຖິງ 4 ເດືອນ.
ອອກວັດສາແລ້ວ ລະດູເຫມັນຕະ (ລະດູຫນາວ) ພິກຂຸສັງຄະເຈົ້າ ເຂົ້າປະລິວາສະກໍາ ໆລໆ (ເຂົ້າກັມ).
ໃຫ້ທ່ຽວບິນທະບາດ ຕາມບ້ານນ້ອຍບ້ານໃຫຍ່ ຢ່າຂາດ
ໃຫ້ສູດມົນພາວະນາທຸກຄືນວັນ ຢ່າຂາດ ໆລໆ
ເຖິງວັນສິນດັບສິນເພັງ ໃຫ້ປະຊຸມກັນອຸໂປສົດສັງຄະກໍາ ຢ່າຂາດ ໆລໆ
ເຖິງເທດສະການປີໃຫມ່ ທາຍົກໄຫວ້ຂີ່ວໍ ແຫ່ນ້ຳໄປສົງພະພຸດທະຮູບ ພະທາດເຈດີ ໆລໆ.
ສັງກາດປີໃຫມ່ ພະເຈົ້າແຜ່ນດິນໄຫວ້ພະ ໃຫ້ສົງນ້ໍາໃນພະລາຊະວັງ ແລະ ບາສີ ສັງຄະເຈົ້າ.
ສັດທາຊາວບ້ານນິມົນສິ່ງໃດ ອັນບໍ່ຜິດຄອງວິໄນ ກໍໃຫ້ປະຕິບັດຕາມ ໆລໆ
ເປັນສະມະນະໃຫ້ພ້ອມກັນສ້າງວັດວາອາຮາມ ພະທາດເຈດີ ໆລໆ
ໃຫ້ຮັບທານຂອງທາຍົກ ຄືສັງຄະພັດ ສະຫລາກກະພັດ ເປັນຕົ້ນ
ພະເຈົ້າແຜ່ນດິນ ເສນາຂ້າລາຊະການ ມີສັດທານິມົນມາປະຊຸມກັນ ໃນສິມແຫ່ງ ໃດແຫ່ງຫນຶ່ງ ໃນວັນເດືອນ 11 ເພັງ ເປັນກາລະອັນໃຫຍ ຢ່າໄດ້ຂັດຂີນ.