ຮູ້ຈັກ ວັດທະນະທໍາລາວ ຜ່ານ “ແຜ່ນແພ” ທີ່ເປັນເອກະລັກ ແລະ ມໍລະດົກອັນລໍ້າຄ່າຂອງຊາດລາວ.

ຫາກຈະເວົ້າເຖິງ ຫັດຖະກຳ ຕໍ່າຫູກແລ້ວ ແມ່ນຕິດພັນກັບວິຖີຊິວີດຂອງຄົນລາວມາແຕ່ດຶກດໍາບັນ ແລະ ໄດ້ຖ່າຍທອດຈາກບັນພະບຸລຸດຂອງລາວເຮົາຈາກ ລຸ້ນສູ່ລຸ້ນ, ແພພື້ນເມືອງລາວ ແມ່ນໃຊ້ເປັນ ເຄື່ອງນຸ່ງຫົ່ມ ແລະ ເຄື່ອງໃຊ້ປະຈໍາຄອບຄົວ ທີ່ປະຕິບັດມາຕັ້ງແຕ່ບູຮານນະການ, ແຕ່ລະຂົງເຂດ ແຕ່ລະພາກຂອງປະເທດລາວກໍມີເອກະລັກທີ່ສວຍງາມ ແລະ ແຕກຕ່າງກັນໄປ.

ສິນລະປະບູຮານອັນລຶກລັບຂອງຊົນຊາດລາວດັ່ງກ່າວນີ້ ໄດ້ແອບແຝງໄປຢູ່ກັບການດໍາລົງຊິວີດຮີດຄອງປະເພນີ ວັດທະນາທໍາລາວ ແລະ ສາສະໜາ ມາຈົນຮອດທຸກວັນນີ້. ເພາະສະນັ້ນລວດລາຍ ສີສັນ ການອອກແບບດອກດວງ ພື້ນເມືອງບູຮານ ອັນເປັນມະໂນພາບຂອງນັກຕໍ່າຫູກແຕ່ລະຄົນ ໄດ້ສະແດງອອກມາໃນຄວາມງາມ ທີ່ສະລັບຊັບຊ້ອນ ໂດຍເຄື່ອງຈັກສະໄໝໃໝ່ບໍ່ສາມາດແກະກາຍໄດ້ ນອກຈາກຜູ້ມີຄວາມຊ່ຽວຊານເທົ່ານັ້ນ.

ໂດຍຂະບວນການ ຍ້ອມສີ ການຕໍ່າຫູກ ແລະ ການແກະລວດລາຍ ແມ່ນຈະແຕກຕ່າງກັນໄປຕາມແຕ່ລະທ້ອງຖີ່ນ ແຕ່ທັງໝົດລ້ວນແຕ່ອີງໃສ່ ທໍາມະຊາດ ວັດທະນະທໍາ ແລະ ຄວາມເຊື່ອຂອງຄົນລາວ. ຜ້າແຕ່ລະຜືນແມ່ນໃຊ້ເວລາໃນການຕໍ່າ ແມ່ນຂື້ນກັບລວດລາຍ ແລະ ຄວາມເອົາໃຈໃສ່ຂອງຜູ້ຕໍ່າ. ການຕໍ່າຫູກໃນປັດຈຸບັນແມ່ນ ບໍ່ຟົດຟື້ນຄືແຕ່ກ່ອນ ມູນເຊື້ອອັນດີງາມຈະສູນຫາຍໄປຕາມການເວລາ ຖ້າຄົນລາວບໍ່ອະນຸລັກ ຮັກສາໄວ້

ພິພີຕະພັນ ຜ້າໄໝລາວ ( Lao Textile Museum ) ເປັນສະຖານທີ່ໜື່ງ ທີ່ໄດ້ລວມເອົາຜ້າໄໝບູຮານລາວ ແລະ ຍັງຮັກສາມູນເຊື້ອການຕໍ່າຜ້າແບບດັ້ງເດີມເອົາໄວ້ ເພື່ອໃຫ້ລູກຫຼານລາວ ໄດ້ເຫັນເຖິງຂັ້ນຕອນວິທີການຍ້ອມຜ້າ ຕໍ່າຫູກແບບລາວໆ.

3 ຜູ້ກໍ່ຕັ້ງພິພີຕະພັນ ຜ້າໄໝລາວ

ທ່ານ ຫານຊະນະ ສີສານ ຜູ້ກໍ່ຕັ້ງ ພິພີຕະພັນ ຜ້າໄໝລາວ ໄດ້ກ່າວວ່າ: ພວກຂ້າພະເຈົ້າໄດ້ເລີ່ມສ້າງ ພິພີຕະພັນ, ທຳອິດແມ່ນ ເພຶ່ອຢາກອະນຸຮັກມໍລະດົກທາງດ້ານວັດທະນະທຳຂອງລາວເຮົາໄວ້, ໂດຍສະເພາະແມ່ນການອະນຸຮັກ ການຕໍ່າຜ້າພື້ນເມືອງແບບດັ່ງເດີມຂອງລາວເຮົາ ແລະ ຕົກມາໃນປີ 2003 ພວກຂ້າພະເຈົ້າໄດ້ເປີດພິພີຕະພັນຜ້າໄໝລາວເປັນເຮືອນໄມ້ສະຖາປັດຕະຍະກຳແບບລາວ ເຮັດເປັນຫ້ອງວາງສະແດງ ຜ້າໄໝບູຮານອາຍຸຫຼາຍຮ້ອຍປີຂອງຫຼາຍຊົນເຜົ່າ, ສູນວັດທະນະທຳ ລາວ-ຢີ່ປຸ່ນ, ສ້າງສູນສອນເຮັດອາຫານລາວ, ສ້າງໂຮງຮຽນຕໍ່າຫູກ. ປັດຈຸບັນນີ້ ພິພີຕະພັນ ໄດ້ກາຍມາເປັນ ແຫຼ່ງທ່ອງທ່ຽວ ທາງດ້ານວັດທະນະທໍາ ແລະ ສະຖານທີ່ສຶກສາຮຽນຮູ້ກ່ຽວກັບຜ້າພື້ນເມືອງລາວ

ທ່ານ ນາງ ສຸພັດຕຣາ ສີສານ ໄດ້ບອກກັບເຮົາວ່າ: ນອກຈາກນີ້ແລ້ວ ພວກຂ້າພະເຈົ້າ ຍັງມີການສາທິດການຕໍ່າຜ້າ, ການຍ້ອມຜ້າ ດ້ວຍສີທຳມະຊາດນຳອີກ ໂດຍພວກເຮົາຈະມີການຍ້ອມຢູ່ສອງແບບຄື: ແບບຮ້ອນ ແລະ ແບບເຢັນ. ສີທີ່ໄດ້ແມ່ນໄດ້ຈາກຕົ້ນໄມ້ຢູ່ບ້ານເຮົາ ເປັນຕົ້ນແມ່ນ: ໃບຄາມ ໃບຫ້ອມ ເພື່ອໃຫ້ໄດ້ສີຟ້າ ຫຼື ສີຄາມ ເປຶອກໝາກພ້າວແຫ້ງ ເພື່ອໃຫ້ໄດ້ສີນໍ້າຕານອ່ອນ ຕົ້ນໝາກມີ້ ເພື່ອໃຫ້ໄດ້ສີເຫຼືອງ ໄມ້ຝາງແດງ ເພື່ອໃຫ້ໄດ້ສີແດງ ແລະ ອື່ນໆ