ມາເບິ່ງຄວາມງົດງາມຂອງບຸນນະມັດສະການພຣະທາດສາມປາງເມືອງສຸຂຸມາ
ພາບ: Chitthavong Sengkeo
ບຸນນະມັດສະການພຣະທາດສາມປາງ ເມືອງສຸຂຸມາ ແຂວງຈໍາປາສັກ.
ເຮົາມາລົງໃຕ້ໄປທ່ຽວ ເມືອງ ສຸຂຸມາ ດິນແດນແຫ່ງບູຮານສະຖານທີ່ເກົ່າແກ່ໃນສະໃໝຍຸກຂອມເຊິ່ງສະຖານທີ່ນີ້ແມ່ນ “ພຣະທາດສາມປາງ”, ພຣະທາດສາມປາງ ຕັ້ງຢູ່ເຂດ 4 ໂນນຍ່າງ, ເມືອງສຸຂຸມາ ຫ່າງຈາກເມືອງສຸຂຸມາ ໄປທາງຕາເວັນຕົກສ່ຽງເໜືອປະມານ 13 ກິໂລແມັດ, ຫ່າງຈາກເມືອງປາກເຊ ໄປທາງຕາເວັນຕົກສ່ຽງໃຕ້ປະມານ 72 ກິໂລແມັດ ແລະ ຫ່າງຈາກວັດພູປະມານ 21 ກິໂລແມັດ ເຊິ່ງມີເສັ້ນທາງເຂົ້າເຖິງຢ່າງສະດວກ.
ສະຖານທີ່ແຫ່ງນີ້ ຕັ້ງຢູ່ທົ່ງຮາບຫ້ວຍຂະໜວນ ເຊິ່ງ ເປັນສາຂາໜຶ່ງ ຂອງແມ່ນໍ້າຂອງ ໃນອະດີດ ຫ້ວຍນີ້ມີນໍ້າໄຫຼ່ຢູ່ຕະຫຼອດເຊິ່ງຄົນບູຮານໄດ້ໃຊ້ເປັນເສັ້ນທາງຂົນສົ່ງ ແລະ ໄປມາຫາສູ່ກັນ. ພ້ອມນີ້ຍັງມີເສັ້ນທາງບູຮານ ທີ່ໄດ້ເນັ່ງຈາກວັດພູ ໄປທາງໃຕ້ ຈົນເຖິງຊາຍແດນກຳປູເຈຍ ເຊິ່ງປັດຈຸບັນນີ້ ກໍຍັງສາມາດໄດ້ພົບເຫັນຢູ່ບາງຕອນ ແລະ ບາງຕອນກໍຖືກທຳລາຍໂດຍສະເພາະປະຊາຊົນທີ່ເຮັດໄຮ່, ເຮັດນາ, ປຸກເຮືອນຊານໃສ່ ແຕ່ກໍຍັງສາມາດສັນນິຖານໄດ້ວ່າແມ່ນ “ເສັ້ນທາງຄູບູຮານ”.
ໃນປີ 2020, ເຟສບຸກ Chitthavong Sengkeo ໄດ້ນໍາສະເໜີຮູບພາບງານບຸນນະມັດສະການພຣະທາດສາມປາງ ທີ່ຈັດຂື້ນຢູ່ ເມືອງ ສຸຂຸມາ ແຂວງຈໍາປາສັກ ໃນວັນທີ 09 ມັງກອນ 2020 ກົງກັບ ອອກໃໝ່ 15 ຄໍ່າ ເດືອນຍີ້ລາວ ພສ 2563, ໃນທຸກໆປີ ໃນມື້ຂຶ້ນ 15 ຄໍ່າ ເດືອນຍີ່ ຊາວບ້ານຊາວເມືອງຈະພາກັນຈັດພິທີບຸນນະມັດສະການສະເຫຼີມສະຫຼອງພຣະທາດສາມປາງຂຶ້ນ.
ເຊິງໃນພິທີສະເຫລີມສະຫລອງງານບູນພຣະທາດສາມປາງນີ້ເຕັມໄປດ້ວຍຄວາມສວຍງາມຂອງການປະດັບປັບແຕ່ງ ແລະ ພິທີ່ການຕ່າງໆ ເຊິງຫລາຍໆທ່ານທີ່ມັກທ່ອງທ່ຽວບໍ່ຄວນຈະພາດຫາກໄດ້ກາຍມາແຖວນີ້, ໃນງານບຸນຈະມີພໍ່ແມ່ພີນ້ອງປະຊາຊົນຄົນລາວທົວໜ້າເຂົ້າກາບໄຫວ້ ສັກກະລະບູຊາເພື່ອຄວາມເປັນສິລິມົງຄຸນໃຫ້ແກ່ຕົນເອງ ແລະ ຄອບຄົວ.
ພຣະທາດສາມປາງ ເປັນຜາສາດຫີນສາມຍອດ ກໍ່ສ້າງຂຶ້ນໃນ ສັດຕະວັດທີ 12 ເຊິ່ງສ້າງບໍ່ສຳເລັດ ໂດຍຕັ້ງລຽງກັນເທິງແທ່ງຫີນ, ສັນນິຖານວ່າ: ສຸພາທາ ເປັນຜູ້ສ້າງຂຶ້ນ. ຜູ້ຊ່ຽວຊານທາງບູຮານຄະດີໄດ້ສັນນິຖານວ່າ:
ສຸພາທາ ອາດແມ່ນບຸກຄົນດຽວກັນກັບ ທິວາກາ ຮາປັນດິຕາ ເຊິ່ງເປັນທີ່ປຶກສາຂອງເຈົ້າຊີວິດ ຫີນສີລາຈາຣຶກ ຢູ່ຕໍ່ໜ້າຫໍທີ່ມີໜັງສືຂຽນໄວ້ທັງ 4 ດ້ານ ສັນນິຖານວ່າ:
ມານດາຂອງພຣະອົງເປັນຄົນງາມ ແລະ ເປັນຜູ້ເກັ່ງທາງດ້ານອັກສອນສາດ ກໍ່ຄື ທາງດ້ານກາບກອນ. ຫີນສີລາຈາຣຶກໄດ້ບັນທຶກເຫດການດັ່ງກ່າວນັ້ນໄວ້ ເຊິ່ງເປັນຂໍ້ມູນທີ່ສໍາຄັນ ສໍາລັບ ນັກຊ່ຽວຊານທາງດ້ານໜັງສືຈາຣຶກຫີນສີລາ ເຊິ່ງພົວພັນເຖິງປະຫວັດສາດຂະແມ ຫຼື ກຳປູເຈຍໃນປັດຈຸບັນ.
ຂອບໃຈແຫລ່ງທີ່ມາພາບ: Chitthavong Sengkeo
