ຜາພຣະ ສະຖານທີ່ສັກສິດ ອານຸສອນລູກສາວຂອງເຈົ້າອະນຸວົງ
ຜາພຣະ ສະຖານທີ່ອັນສັກສິດ ແລະ ມີທຳມະຊາດທີ່ໜ້າທ່ອງທ່ຽວປະສົມປະສານກັບວັດທະນະທຳ ທີ່ລົງໂຕ.
ຜາພຣະ ຕັ້ງຢູ່ບ້ານປາກງາວ ຫ່າງຈາກຕົວເມືອງຫ້ວຍຊາຍປະມານ 15 ກິໂລແມັດ, ຜາພະ ເປັນສະຖານທີ່ທ່ອງທ່ຽວທາງທຳມະຊາດທີ່ປະສົມປະສານກັບວັດທະນະທຳໄດ້ຢ່າງກົມກືນ ໂດຍມີຮອຍ ແກະສະຫຼັກຮູບພາບຢູ່ເທິງຜາຫີນແຫ່ງນີ້ ດ້ວຍປາຍດາບຂອງເຈົ້າອານຸວົງ ເພື່ອເປັນການລະນຶກເຖິງ ດວງວິນຍານຂອງລູກສາວເພິ່ນ ທີ່ໄດ້ສິ້ນພະຊົນຊີບຢູ່ສະຖານທີ່ແຫ່ງນີ້ ແລະ ຍັງຄົງປະກົດໃຫ້ຄົນລາວເຮົາທຸກຄົນໄດ້ເຫັນຈົນຮອດທຸກມື້ນີ້.
ນອກນັ້ນ ເພິ່ນຍັງໄດ້ຝັງເຄື່ອງຂອງທີ່ມີຄ່າຈຳນວນໜຶ່ງໄວ້ໂງ່ນຫີນກາງແມ່ນ້ຳຂອງ ແລະ ໄດ້ຂຽນຕຳລາຈາລຶກໄວ້ວ່າ: ໄປພຽງຕາ ມາພຽງຕີນ, ແຕ່ໜ້າເສຍດາຍທີ່ເຄື່ອງຂອງມີຄ່າເລົ່ານັ້ນໄດ້ຖືກ ກຸ່ມຄົນບໍ່ດີຂຸດຄົ້ນເອົາໄປໝົດແລ້ວ ເຫຼືອພຽງແຕ່ຮ່ອງຮອຍປະໄວ້ເທົ່ານັ້ນ.
ຜາພຣະ ບ້ານປາກງາວ ເມືອງຫ້ວຍຊາຍ ແຂວງບໍ່ແກ້ວ ເປັນການສະຫລັກພຣະພຸດທະຮູບລົງໃນຜາ ຫລືກ້ອນຫິນ ແຄມຝັ່ງນ້ຳຂອງ ຜູ້ເຖົ້າຜູ້ແກ່ເລົ່າໃຫ້ຟັງວ່າ ໃນສະໄຫມກ່ອນເຈົ້າອານຸວົງ ໄດ້ເດິນທາງມາຕາມລຳນ້ຳຂອງເມື່ອມາຮອດແຖວນີ້ ເຮືອທີ່ລູກສາວຂອງເພິ່ນນັ່ງມາໄດ້ເກີດຫລົ້ມລົງທີ່ແກ້ງຫິນໃນບໍລິເວນນີ້ແລະເຮັດໃຫ້ລູກສາວຂອງເຈົ້າອະນຸວົງເສຍຊີວິດລົງ ດັ່ງນັ້ນ ເພິ່ນຈຶງເຮັດອະນຸສອນເພື່ອຣະນຶກເຖິງລູກສາວຂອງເພິ່ນກໍ່ໄດ້ມີການສ້າງພຣະພຸດທະຮູບໄວ້ທີ່ເທິງຜາໃກ້ບໍລິເວນທີ່ເກີດອຸບັດເຫດດັ່ງກ່າວ.
ຜາພຣະ ຖືວ່າເປັນສະຖານທີ່ອັນສັກສິດຂອງພີ່ນ້ອງປະຊາຊົນບໍ່ແກ້ວ ກໍຄືປະຊາຊົນທົວປະເທດຜູ້ທີ່ໄດ້ຮູ້ເຖິງປະຫວັດຄວາມເປັນມາ ແລະ ມີສັດທາໃນສະຖານທີ່ອັນສັກສິດແຫ່ງນີ້ ທີ່ທຸກຄັ້ງທີ່ໄດ້ກາຍໄປກາຍມາກໍຕ້ອງໄດ້ມາກັບໄຫວ້ຂໍພອນອັນດີໃຫ້ແກ່ຕົວເອງສະເໝີ.
ຖ້າທ່ານໄດ້ມີໂອກາດມາທ່ຽວຊົມຜາພະປາກງາວແຫ່ງນີ້ ນອກຈາກຈະໄດ້ເພີດເພີນກັບທິວທັດອັນ ສວຍງາມຂອງທຳມະຊາດຢູ່ບໍລິເວນອ້ອມຮອບຜາແລ້ວ ທ່ານຍັງຈະໄດ້ສຳພັດກັບພາບໃນອະດີດ ແລະ ຫວນຄືນສູ່ເຫດການທາງປະຫວັດສາດອັນສຳຄັນກ່ຽວກັບການເຄື່ອນໄຫວຂອງເຈົ້າອານຸວົງນຳອີກ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຮວບຮວມຂໍ້ມູນແຫລ່ງທີ່ມາຈາກ: ແຂວງບໍ່ແກ້ວ.