ໃນວັນທີ 5 ມັງກອນ 2023 ຜ່ານມາໄດ້​ມີ​ການ​ຈັດພິທີວາງສີລາລຶກໂຄງການກໍ່ສ້າງອາຄານ ໂຮງຮຽນປະຖົມກະແຫລງພູ ເມືອງນອງ ແຂວງສະຫວັນນະເຂດ, ໂດຍໄດ້ຮັບທຶນຊ່ວຍເຫລືອລ້າຈຳນວນ 50.000 ໂດລາສະຫະລັດ ພາຍໃຕ້ໂຄງການເຫັນຜົນໄວ ຂອງຂອບການຮ່ວມມື ແມ່ນ້ຳຂອງ-ແມ່ນ້ຳຄົງຄາ ປະເທດອິນເດຍ

ໂດຍມີ ທ່ານ ດິນກາ ອັສທານາ (Dinkar Asthana) ເອກອັກຄະລັດຖະທູດອິນເດຍ ປະຈໍາ ສປປ ລາວ ແລະ ທ່ານ ນາງ ລິງທອງ ແສງຕາວັນ ຮອງເຈົ້າແຂວງສະຫວັນນະເຂດ, ມີຜູ້ຕາງໜ້າຈາກອົງການປົກຄອງແຂວງສະຫວັນນະເຂດ ເຂົ້າຮ່ວມ ໃນພິທີ.

ທ່ານ ດິນກາ ອັສທານາ ໄດ້ກ່າວວ່າ: ໂຄງການດັ່ງກ່າວ ປະກອບດ້ວຍການກໍ່ສ້າງອາຄານໃໝ່ ມີ 3 ຫ້ອງຮຽນ ແລະ ຫ້ອງນ້ຳ, ເມື່ອກໍ່ສ້າງສຳເລັດ ຈະອຳນວຍຄວາມສະດວກໃຫ້ແກ່ການສຶກສາຂັ້ນປະຖົມຢູ່ໃນບ້ານເຂດພູດອຍ ຫ່າງໄກສອກຫລີກ ຂອງຊຸມຊົນຊົນເຜົ່າບຣູ ແລະ ສ້າງສະພາບແວດລ້ອມການຮ່ຳຮຽນໃຫ້ດີຂຶ້ນກວ່າເກົ່າ.

ໂຄງການເຫັນຜົນໄວ ແມ່ນໂຄງການທີ່ສໍາເລັດໃນໄລຍະທີ່ສັ້ນ ໃຫ້ຜົນປະໂຫຍດໂດຍກົງກັບຊຸມຊົນທ້ອງຖິ່ນ, ເຫັນຜົນໄວ ແລະ ຊັດເຈນ ໄດ້ປະກອບສ່ວນຢ່າງຫລວງຫລາຍຕໍ່ການພັດທະນາເສດຖະ ກິດ-ສັງຄົມ ແລະ ການປັບປຸງສະຫວັດດີການມະຫາຊົນ, ທັງເປັນການເພີ່ມທະວີແກ່ການພົວພັນສອງຝ່າຍອັນດີລະຫວ່າງ ອິນເດຍ ແລະ ສປປ ລາວ.

ໃນໄລຍະຜ່ານມາ, ການຊ່ວຍເຫລືອດ້ານການພັດທະນາຂອງອິນເດຍ ໃຫ້ແກ່ ສປປ ລາວ ກວມເອົາຫລາຍຂົງເຂດເຊັ່ນ: ການສ້າງຄວາມອາດສາມາດຜ່ານໂຄງການດ້ານວິຊາການ ແລະ ເສດຖະ ກິດອິນເດຍ (ITEC), ທຶນການສຶກສາໄລຍະສັ້ນ ແລະ ໄລຍະຍາວສໍາລັບການສຶກສາຊັ້ນສູງ, ໂຄງການພາຍ ໃຕ້ວົງເງິນສິນເຊື່ອ ຫລື ເງິນກູ້ດອກເບ້ຍຕ່ຳ, ການສ້າງສູນຝຶກອົບຮົມທາງດ້ານພາສາອັງກິດ ລາວ-ອິນເດຍ, ສູນພັດທະນາຜູ້ປະກອບກິດຈະການ ລາວ-ອິນເດຍ ແລະ ໂຄງການອະນຸລັກມໍລະດົກ, ການບູລະນະສະຖານທີ່ມໍລະດົກ ຮັບຮອງໂດຍອົງການ ອຸຍເນັສໂກ ເປັນຕົ້ນ ວັດພູຈຳປາສັກ ໂດຍຊ່ຽວຊານສຳຫລວດບູຮານຄະດີ ຂອງປະເທດອິນເດຍ ພາຍໃຕ້ໂຄງການ ITEC.

ໂອກາດດຽວກັນ, ທ່ານເອກອັກຄະລັດຖະທູດອິນເດຍ ປະຈຳ ສປປ ລາວ ຍັງໄດ້ມອບປຶ້ມໃຫ້ນັກຮຽນ ໂຮງຮຽນດັ່ງກ່າວ ເພື່ອການສຶກສາຄົ້ນຄວ້າຮໍ່າຮຽນ ຕື່ມອີກ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບ​ໃຈແຫຼ່ງຂໍ້ມູນຈາກ: ຂປລ.