ເງື່ອນໄຂສປປ ລາວ ທີ່ຈະມອບສັນຊາດລາວໃຫ້ຄົນຕ່າງປະເທດ.
ຄົນຕ່າງປະເທດທີ່ອາໄສຢູ່ລາວເງື່ອນໄຂທີ່ຈະໄດ້ສັນຊາດລາວ.
ດັ່ງທີ່ເຮົາຮູ້ກັນດີຢູ່ແລ້ວມັນຍາກຫລາຍທີ່ຄົນຕ່າງດ້າວ ຫລື ຄົນປະເທດໃດໜືງຈະໄດ້ຮັບການອະນຸຍາດໃຫ້ໄດ້ອີກສັນຊາດໜຶ່ງ ຫລື ອາດຈະຫລາຍໆສັນຊາດ, ເຮົາມາເບິ່ງລະບຽບ ແລະ ວິທີການທີ່ ສປປ ລາວ ຈະມອບສັນຊາດລາວໃຫ້ບຸກຄົນຕ່າງປະເທດທີ່ອາໃນຢູ່ໃນປະເທດລາວ.
ຫາກຄົນຕ່າງປະເທດທີ່ຢູ່ອາໄສຢູ່ໃນ ສປປ ລາວ ຕ້ອງການທີ່ຈະໄດ້ສັນຊາດລາວຕ້ອງມີຂັ້ນຕອນລາຍລະອຽດແນວໃດນັ້ນ, ໃນກົດໝາຍຂອງ ສປປ ລາວ ວ່າດ້ວຍສັນຊາດລາວໃນມາດຕາ 14, ເງື່ອນໄຂການໄດ້ສັນຊາດລາວຂອງພົນລະເມືອງຕ່າງປະເທດ ຫຼື ຄົນບໍ່ມີສັນຊາດ ພົນລະເມືອງຕ່າງປະເທດ ຫຼື ຄົນບໍ່ມີສັນຊາດອາດຈະໄດ້ສັນຊາດລາວຕາມຄໍາຮ້ອງຂໍຂອງຜູ້ກ່ຽວຖ້າຫາກວ່າມີເງື່ອນໄຂຄົບຖ້ວນດັ່ງນີ້:
- ຕ້ອງມີອາຍຸແຕ່ສິບແປດປີຂຶ້ນໄປໃນເວລາເຮັດຄໍາຮ້ອງຂໍເອົາສັນຊາດລາວ
- ເຄົາລົບລັດຖະທໍາມະນູນ ແລະ ກົດໝາຍຂອງ ສປປ ລາວ
- ເວົ້າ, ອ່ານ ແລະ ຂຽນພາສາລາວໄດ້ໃນລະດັບອັນແນ່ນອນ
- ມີຫຼັກຖານວ່າຕົນໄດ້ເຊື່ອມເຂົ້າສັງຄົມ ແລະ ວັດທະນະທໍາລາວ, ຮູ້ ແລະ ເຄົາລົບຮີດຄອງປະເພນີດີງາມຂອງລາວ
- ມີສຸຂະພາບດີ, ບໍ່ເປັນພະຍາດຕິດຕໍ່ຮ້າຍແຮງ, ບໍ່ຕິດຢາເສບຕິດ
- ບໍ່ຖືກສານຕັດສິນລົງໂທດຕັດອິດສະລະພາບ
- ໄດ້ປະກອບສ່ວນໃນການປົກປັກຮັກສາ ແລະ ພັດທະນາປະເທດຊາດ
- ບໍ່ໄດ້ສ້າງຄວາມເສຍຫາຍໃຫ້ແກ່ຜົນປະໂຫຍດຂອງຊາດ
- ໄດ້ປະສັນຊາດເດີມຂອງຕົນ (ຍົກເວັ້ນຄົນບໍ່ມີສັນຊາດ)
- ໄດ້ຢູ່ ສປປ ລາວ ຢ່າງຕໍ່ເນື່ອງແຕ່ສິບປີຂຶ້ນໄປກ່ອນເວລາເຮັດຄໍາຮ້ອງຂໍເອົາສັນຊາດລາວ, ສໍາລັບຜູ້ມີຄວາມຮູ້ດ້ານວິຊາສະ ເພາະຂັ້ນຊ່ຽວຊານກໍານົດເວລາດັ່ງກ່າວນີ້ອາດຈະສັ້ນກວ່າ
- ມີວິຊາສະເພາະ, ວິຊາຊີບໃດໜຶ່ງທີ່ແນ່ນອນ, ມີຖານະດ້ານເສດຖະກິດທີ່ໝັ້ນຄົງ
ໃນວັນທີ 10 ມັງກອນ ທີ່ຜ່ານມາ, ພະແນກພາຍໃນນະຄອນຫຼວງວຽງຈັນ ກໍໄດ້ຈັດພິທີມອບສັນຊາດລາວໃຫ້ຄົນຕ່າງປະເທດ ຫຼື ຄົນທີ່ບໍ່ມີສັນຊາດທີ່ອາໄສຢູ່ ສປປ ລາວ ແລະ ມີເງື່ອນໄຂຄົບຖ້ວນຕາມກົດໝາຍວ່າດ້ວຍສັນຊາດລາວ, ມອບໂດຍ ທ່ານ ບຸນໜາ ຜາທຸມມະວົງ ຫົວໜ້າພະແນກພາຍໃນນະຄອນຫຼວງ, ມີທ່ານ ວັນດີ ຈັນທະວີເດດ ຮອງຫົວໜ້າກົມຄຸ້ມຄອງພົນລະເມືອງ ກະຊວງພາຍໃນ, ຕາງໜ້າ ປກສ ນວ ປກສ ເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ການມອບສັນຊາດລາວໃຫ້ຄົນຕ່າງປະເທດຄັ້ງນີ້ແມ່ນປະຕິບັດຕາມກົດໝາຍວ່າດ້ວຍລັດຖະບານ, ກົດໝາຍວ່າດ້ວຍສັນຊາດລາວ ແລະ ອີງຕາມໜັງສືສະເໜີຂອງກະຊວງຍຸຕິທຳ. ດັ່ງນັ້ນ ທ່ານນາຍົກລັດຖະມົນຕີຈຶ່ງໄດ້ອອກຂໍ້ຕົກລົງໃຫ້ຫ້ອງວ່າການສຳນັກງານນາຍົກລັດຖະມົນຕີປະສານສົມທົບກັບກະຊວງພາຍໃນ, ກະຊວງປ້ອງກັນຄວາມສະຫງົບ, ກະຊວງການຕ່າງປະເທດ, ກະຊວງຍຸຕິທຳ ແລະ ຂະແໜງການທີ່ກ່ຽວຂ້ອງ ເພື່ອປະຕິບັດຂໍ້ຕົກລົງສະບັບດັ່ງກ່າວ ຊຶ່ງໄດ້ເຫັນດີອະນຸມັດໃຫ້ສັນຊາດລາວ 8 ຄົນ. ໃນນີ້ ມີຄົນເຊື້ອຊາດ ແລະ ສັນຊາດຫວຽດນາມ 4 ຄົນ, ຍິງ 1 ຄົນ, ຈີນ 2 ຄົນ, ຍິງ 1 ຄົນ, ອິນເດຍ 1 ຄົນ ແລະ ປາກິສຖານ 1 ຄົນ.
ດັ່ງນັ້ນຫາກວ່າຄົນປະເທດໃດໆທີ່ອາໄສຢູ່ໃນ ສປປ ລາວ ຫລື ບຸກຄົນທີ່ຍັງບໍ່ມີສັນຊາດຕ້ອງການຢາກໄດ້ສັນຊາດລາວກໍຕ້ອງມີເງືອນໄຂໃຫ້ຄົບຕາມລະບຽບການແລ້ວກໍບໍ່ມີບັນຫາໃນການທີ່ຈະໄດ້ສັນຊາດລາວ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: targetlaos.com