ເຄືອປຽດເຜົ່າຂະມຸ ອີກໜຶ່ງສິນຄ້າສ້າງລາຍຮັບໃຫ້ປະຊາຊົນທ້ອງຖິ່ນ
ອິນໄຊລາວ.
ເຄືອປຽດຈາກຫັດຖະກຳຊົນເຜົ່າສູ່ສິນຄ້າສ້າງລາຍຮັບໃຫ້ປະຊາຊົນພາຍໃນທ້ອງຖິ່ນ.
ເຄືອປຽດແມ່ນຕິດພັນກັບຊີວິດການເປັນຢູ່ຂອງປະຊາຊົນລາວ ໂດຍສະເພາະກໍ່ແມ່ນປະຊາຊົນເຜົ່າຂະມຸ ທີ່ໄດ້ໃຊ້ເຄືອປຽດນີ້ມາຜະລິດເປັນເສັ້ນດ້າຍ ແລ້ວ ນໍາມາຖັກເປັນຖົງພາຍເພື່ອບັນຈຸຜົນຜະລິດຈາກໄຮ່ຈາກນາ ແລະ ສິ່ງຂອງຕ່າງໆໃນຊີວິດປະຈໍາວັນ
ເຄືອປຽດ (Kudzu) ແມ່ນເປັນເຄືອໄມ້ຊະນິດທີ່ເລືອຍາວ ກ້ຽວກອດຂື້ນຕາມຕົ້ນໄມ້ ມີໃບໜາຕຶບ ມີຫົວຄືກັນກັບມັນເພົາ ມີດອກສີອິດ, ລໍາເຄືອຂອງມັນກົມໃຫຍ່ເທົ່າກັນກັບນີ້ວມື ແລະ ມັນເປັນເຄືອໄມ້ທີ່ແຜ່ຂະຫຍາຍອອກໄປຢ່າງວ່ອງໄວ ແລະ ຄວບຄຸມຍາກ.
ເຄືອໄມ້ Kudzu ນີ້ ເກີດຢູ່ທາງພາກໃຕ້ຂອງຍີ່ປຸ່ນ ພາກຕາເວັນ ອອກສຽງໃຕ້ຂອງຈີນ ພາກເໜືອ ຂອງລາວ ແລະ ບາງລັດທາງພາກໃຕ້ຂອງສະຫະລັດອາເມລິກາ ຊຶ່ງມີຊື່ທາງວິທະຍາສາດວ່າ Pueraria lobata
ນອກຈາກນັ້ນ, ຊົນເຜົ່າຂະມຸຍັງໄດ້ໃຊ້ຖົງເຄືອປຽດນີ້ ໃນການບັນຈຸເງິນຄໍາ ແລະ ສິ່ງຂອງມີຄ່າຕ່າງໆ ເພື່ອປະກອບພິທີໃນການຂໍສາວຂອງເຂົາເຈົ້າອິກດ້ວຍ
ທ່ານ ນາງ ໄມພອນ ສີລິວົງ ເຈົ້າຂອງຮ້ານ ສີລິວົງ ຫັດຖະກຳ ໄດ້ໃຫ້ສຳພາດວ່າ: ຊົນເຜົ່າຂະມຸແມ່ນໄດ້ໃຊ້ ເຄືອປຽດ ມາເຮັດເປັນເສັ້ນດ້າຍ ແລ້ວນຳມາຖັກເປັນຖົງ ເພື່ອບັນຈຸສິ່ງຂອງຕ່າງໆ ບໍ່ວ່າຈະເປັນຜົນຜະລິດຈາກຮົ່ວສວນ ຫຼື ຕາມຮິດປະເພນີ ແມ່ນບັນຈຸວັດຖຸມີຄ່າ ເພື່ອໄປຂໍສາວ. ໂດຍຄວາມທີ່ເຫັນຄວາມສຳຄັນຂອງຫັດຖະກຳຊົນເຜົ່າ ພວກເຮົາຈື່ງໄດ້ລົງໄປສົ່ງເສີມໃຫ້ປະຊາຊົນໃນທ້ອງຖິ່ນນັ້ນ ຈາກທີ່ເຄີຍຜະລິດເພື່ອໃຊ້ສ້ອຍໃນຄົວເຮືອນ ແລ້ວມາຜະລິດຕໍ່ຍອດ ຮູບແບບຕ່າງໆ ສົ່ງຂາຍເປັນສິນຄ້າ ເພື່ອເປັນການສົ່ງເສີມໃຫ້ປະຊາຊົນທ້ອງຖິ່ນ ໄດ້ມີວຽກເຮັດງານທຳ ແລະ ມີລາຍຮັບເຂົ້າຄອບຄົວເພີ່ມຂຶ້ນ
ທ່ານ ນາງ ໄມພອນ ໃຫ້ຮູ້ວ່າ: ມາຮອດປັດຈຸບັນ, ມີປະຊາຊົນກວ່າ 210 ຄອບຄົວ ໃນ 10 ບ້ານ ຂອງເມືອງໄຊ ແຂວງອຸດົມໄຊ ທີ່ໄດ້ຜະລິດຖົງປຽດເພື່ອເປັນສິນຄ້າ ໂດຍໄດ້ແບ່ງອອກເປັນສອງພາກສ່ວນຄື: ພາກສ່ວນທີ່ມີໜ້າທີ່ໄປຕັດເອົາເຄືອປຽດ ມາຜະລິດເປັນເສັ້ນດ້າຍ ແລະ ພາກສ່ວນທີ່ນໍາເອົາເສັ້ນດ້າຍ ໄປຖັກເປັນຖົງໂດຍສະເພາະ. ທັງນີ້ ກໍ່ເພື່ອເປັນການກະຈ່າຍລາຍຮັບໃຫ້ຫຼາຍພາກສ່ວນ ເພື່ອໃຫ້ເຂົາເຈົ້າມີລາຍຮັບມາຈຸນເຈື່ອຄອບຄົວ.
“ຖົງປຽດ ແມ່ນເປັນຜະລິດຕະພັນຈາກທຳມະຊາດ ເຮັດຜະລິດແມ່ນໃຊ້ມືທັງໝົດ. ເປັນຖົງພາຍຕາໜ່າງທີ່ຍືດຍຸ່ນ ໃຊ້ບັນຈຸຫລາຍສິ່ງຫລາຍຢ່າງໜັກໆໄດ້. ພືດທໍາມະຊາດທີ່ນໍາມາຜະລິດເປັນເຄື່ອງໃຊ້ປະຈໍາໂຕດັ່ງກ່າວນີ້ໄດ້ກາຍມາເປັນອຸດສາຫະກໍາ ທີ່ນໍາລາຍໄດ້ມາສູ່ຄອບຄົວເຜົ່າຂະມຸທີ່ຍາກຈົນ ໂດຍບໍ່ໄດ້ທໍາລາຍທໍາມະຊາດ ແລະ ບໍ່ໄດ້ສ້າງຄວາມເປື້ອນເປີ້ະໃຫ້ແກ່ສິ່ງແວດລ້ອມໃດໆທັງສີ້ນ” ທ່ານ ນາງ ໄມຟອນ ກ່າວ
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ອິນໄຊລາວ.
