ຫົວໜ້າ ອົງການກວດສອບເເຫ່ງລັດ ຫວຽດນາມລົງ​ເຮັດ​ວຽກ​ກັບທະນາຄານ ລາວ – ຫວຽດ ຈໍາກັດ

ໄດ້​ມີຄະນະຜູ້ແທນ ອົງການກວດສອບແຫ່ງລັດ ສສ ຫວຽດນາມ ນໍາໂດຍ ສະຫາຍ ໂງ ວັນ ຕວັນ ກໍາມະການສູນກາງພັກ, ຫົວໜ້າອົງການກວດສອບແຫ່ງລັດ ສສ ຫວຽດນາມ ໄດ້ມາຢ້ຽມຢາມ ແລະ ເຮັດວຽກຢູ່ ທະນາຄານຮ່ວມທຸລະກິດ ລາວ-ຫວຽດ ຈຳກັດ(LaoVietBank) ໃນ​ວັນທີ 25 ພະຈິກ 2022ຜ່ານມາ.

ໃນໂອກາດນີ້, ສະຫາຍ ຫງວຽນ ດຶກ ວູ ສະມາຊິກສະພາບໍລິຫານ, ຜູ້ອຳນວຍການໃຫຍ່ ທະນາຄານ ຮ່ວມທຸລະກິດ ລາວ-ຫວຽດ ຈຳກັດ ໄດ້ລາຍງານໝາກຜົນການປະຕິບັດອັນພົ້ນເດັ່ນຂອງ LaoVietBank ວ່າ:

ຕະ ຫລອດໄລຍະ 23 ປີ, ການເຄື່ອນໄຫວທຸລະກິດຂອງ LaoVietBank ນັບມື້ນັບມີຄວາມໝັ້ນຄົງ ແລະ ຂະຫຍາຍ ຕົວຢ່າງຕໍ່ເນື່ອງ ໂດຍໄດ້ເສີມຂະຫຍາຍບົດບາດຂອງການເປັນສະຖາບັນການເງິນ ເປັນຢ່າງດີ, ສ້າງຂົວຕໍ່ແຫ່ງການຊໍາ ລະ ແລະ ຫັນສະກຸນເງິນ ຂອງສອງປະເທດ (ສະກຸນເງິນດົງ ແລະ ເງິນກີບ), ຮັບໃຊ້ການພົວພັນທາງດ້ານເສດຖະ ກິດ, ການຄ້າ ແລະ ການລົງທຶນລະຫວ່າງລັດຖະບານ, ນັກທຸລະກິດ ແລະ ປະຊາຊົນສອງປະເທດ, ປະກອບສ່ວນຢ່າງຕັ້ງໜ້າເຂົ້າໃນການປະຕິບັດນະໂຍບາຍການເງິນ-ເງິນຕາ ແລະ ຮັບໃຊ້ເປົ້າໝາຍພັດທະນາ ເສດຖະກິດ-ສັງຄົມ ຂອງ ສປປ ລາວ.

ທະນາຄານຮ່ວມທຸລະກິດ ລາວ-ຫວຽດ ຈໍາກັດ, ຄາດຄະເນວ່າ ເສດຖະກິດຂອງລາວໃນທ້າຍປີ 2022 ແລະ ປີ 2023 ຈະຍັງສືບຕໍ່ໄດ້ຮັບຜົນກະທົບຈາກການຂາດດຸນງົບປະມານ, ອັດຕາເງິນເຟີ້, ອັດຕາແລກປ່ຽນ, ການຂາດແຄນເງິນຕາຕ່າງປະເທດ ແລະ ຄວາມສ່ຽງທີ່ຈະຖືກຜົນກະທົບຈາກການຫລຸດລົງ ຂອງ ເສດຖະກິດໂລກ

ເຊິ່ງສ້າງຄວາມຫຍຸ້ງຍາກ ແລະ ສິ່ງທ້າທາຍຫລາຍຢ່າງໃຫ້ແກ່ເສດຖະກິດ ແລະ ສະພາບແວດລ້ອມແຫ່ງການດຳເນີນທຸລະກິດຢູ່ລາວ, ເຖິງຢ່າງໃດກໍຕາມ, LaoVietBank ຈະພະຍາຍາມສືບຕໍ່ປະຕິບັດໜ້າທີ່ ທີ່ໄດ້ຮັບມອບໝາຍໃຫ້ສຳເລັດ, ປະຕິບັດຕາມທິດທາງຍຸດທະສາດ ດ້ວຍຄຳຂວັນທີ່ວ່າ:

“ວິໄນ, ຄວາມຮັບຜິດຊອບ, ປະສິດທິຜົນ” ໃນນັ້ນ ສຸມໃສ່ບັນດາເປົ້າໝາຍຄື: ຊຸກຍູ້ການເຕີບໂຕຂອງສິນເຊື່ອ; ຜັນຂະຫຍາຍການປ່ຽນແປງຂະໜາດຂອງຖານລູກຄ້າ ແບບຍືນຍົງ; ລະດົມທຶນທີ່ຮັບປະກັນຄວາມປອດໄພ, ການຄຸ້ມຄອງເງິນທຶນຢ່າງຄ່ອງຕົວ, ປັບປຸງປະສິດທິຜົນການດຳເນີນທຸລະກິດ ແລະ ປະສິດທິຜົນໃນການນຳໃຊ້ຊັບສິນ; ຕັ້ງໜ້າປະຕິບັດການເກັບໜີ້ເສຍ, ໜີ້ນອກແຜນ, ດອກເບ້ຍທີ່ຄາດຄະເນວ່າຈະເກັບ, ດອກເບ້ຍຄ້າງຊໍາລະ, ຕະຫລອດຮອດ ການພັດທະນາຜະລິດຕະພັນ ທີ່ມີເນື້ອໃນດ້ານເຕັກໂນໂລຊີສູງ; ປັບປຸງຄຸນນະພາບການບໍລິການໃນການເບິ່ງແຍງລູກຄ້າ ແລະ ຮັກສາລາຍຮັບທີ່ໝັ້ນຄົງໃຫ້ແກ່ ພະນັກງານ.

ໂອກາດນີ້, ສະຫາຍ ໂງ ວັນ ຕວັນ ກໍໄດ້ຍ້ອງຍໍຊົມເຊີຍ ແລະ ຕີລາຄາສູງບັນດາຜົນງານ ທີ່ LaoVietBank ຍາດມາໄດ້ໃນຊຸມປີທີ່ຜ່ານມາ, ສິ່ງດັ່ງກ່າວໄດ້ປະກອບສ່ວນສຳຄັນເຂົ້າໃນການ ເພີ່ມພູນຄູນສ້າງສາຍພົວພັນມິດຕະ ພາບທີ່ເປັນມູນເຊື້ອອັນດີງາມ ລະຫວ່າງ ສປປ ລາວ-ສສ ຫວຽດນາມ. ນອກຈາກນັ້ນ, ທ່ານຍັງໄດ້ໃຫ້ທິດຊີ້ນໍາ ແລະ ຫວັງວ່າ ທະນາຄານ ຮ່ວມທຸລະກິດ ລາວ – ຫວຽດ ຈຳກັດ ຈະສືບຕໍ່ພັດທະນາຢ່າງເຂັ້ມແຂງ ແລະ ຍືນຍົງ, ສືບຕໍ່ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງ ລາວ, ເປັນສັນຍາລັກນຳໜ້າແຫ່ງການຮ່ວມມືລະຫວ່າງສອງປະເທດ ສປປ ລາວ-ສສ ຫວຽດນາມ.

ພ້ອມກັນນີ້, ສະຫາຍ ເລ ຫງັອກ ເລິ່ມ ຜູ້ອຳນວຍການໃຫຍ່ ທະນາຄານ ການຄ້າ ຫຸ້ນສ່ວນ ລົງທຶນ ແລະ ພັດທະນາ ຫວຽດນາມ (BIDV) ຫວັງຢ່າງຍິ່ງວ່າ ໃນຕໍ່ໜ້າ LaoVietBank ແລະ ບັນດາຕົວແທນທຸລະກິດ BIDV ປະຈໍາລາວ ຈະຍັງສືບຕໍ່ໄດ້ຮັບຄວາມເອົາໃຈໃສ່ ແລະ ທິດຊີ້ນໍາຈາກ ສອງພັກ, ສອງລັດ ເພື່ອສ້າງເງື່ອນໄຂສະດວກໃຫ້ແກ່ການເຄື່ອນໄຫວລົງທຶນ ແລະ ການຮ່ວມມືດ້ານເສດຖະກິດ ລະຫວ່າງ 2 ປະເທດ ເພື່ອຊ່ວຍໃຫ້ທະນາຄານ LaoVietBank ແລະ ບັນດາຕົວແທນທຸລະກິດ BIDV ປະຈໍາລາວ ໄດ້ມີໂອກາດດຳເນີນທຸລະກິດຫລາຍກວ່າເກົ່າ, ສາມາດປະກອບສ່ວນຊຸກຍູ້ການຮ່ວມມືຮອບດ້ານ ແລະ ການພັດທະນາເສດຖະກິດຂອງສອງປະເທດ ສປປ ລາວ – ສສ ຫວຽດນາມ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບ​ໃຈແຫຼ່ງຂໍ້ມູນຈາກ: LaoVietBank