ອະທິບາຍຄວາມໝາຍຂອງຄຳວ່າ ສຸພາສິດ ໃນພາສາລາວ
ຄຳວ່າ: ສຸພາສິດ ພາສາລາວມີຄວາມໝາຍວ່າແນວໃດ?
ທຸກໆປະເທດ ທຸກໆວັດຖະນະທຳ ແລະ ສາສະໜາ ລ້ວນແລ້ວແຕ່ມີວັນນະຄະດີຄຳເວົ້າທີ່ແຫລມຄົມຖິ້ມແທງຫົວໃຈ, ເຊິງຄຳເວົ້າທີ່ສັ້ນໆດັ່ງຄົມມີດ ແລະ ມີເນື້ອໃນໃຈຄວາມຄະຕິເຕືອນໃຈອັນເລີກເຊິງນີ້ເອີ້ນວ່າ ສຸພາສິດ.
ສຸພາສິດ=สุภาษิต
ສຸພາສິດລາວ ກັບ ສຸພາສິດໄທ ກໍ່ຈະມີຄວາມໝາຍແບບດຽວກັນ ຕ່າງແຕ່ສໍານວນຄໍາເວົ້າອາດຈະບໍ່ຄືກັນ ສຸພາສິດເປັນຄໍາເວົ້າຂອງບຸກຄົນໃດໜຶ່ງສ້າງຂຶ້ນມາເພື່ອສ່ອງແສງເຖິງສັງຄົມທີ່ຕົນສັງກັດຢູ່ ສ່ອງແສງເຖິງຄວາມເປັນຈິງແລ້ວຈຶ່ງສ້າງເປັນຄຳເວົ້າທີ່ເກາະກ່າຍກັນ ມີຄວາມໝາຍເລິກເຊິ່ງ ແລະ ຝາກເປັນຄຳສອນໄວ້ສືບທອດເຖິງລຸ່ນລູກລຸ່ນຫຼານ.
ແຕ່ລະປະເທດອາດມີຄວາມແຕກຕ່າງກັນທາງດ້ານການດຳລົງຊີວິດຂອງຄົນໃນສັງຄົມ ເພາະວ່າສັງຄົມອາດຈະບໍ່ເທົ່າທຽມກັນ ບາງປະເທດຈະເລີນກ້າວໜ້າໄປໄກ ແຕ່ບາງປະເທດກໍ່ຍັງທຸກຍາກ ແລະ ຫຼ້າຫຼັງຢູ່ ສະນັ້ນ; ສຸພາສິດຈຶ່ງສ່ອງແສງເຖິງສັງຄົມຂອງໃຜຂອງມັນ.
ຄວາມໝາຍຂອງຄຳວ່າ: ສຸພາສິດ ກໍ່ຄື ຄໍາສອນ,ເປັນຄໍາເວົ້າທີ່ດີມີເນື້ອໃນ ແລະ ຄວາມໝາຍອັນເລິກເຊິ່ງ ໄດ້ໃຈຄວາມ ເປັນຄະຕິປະຈຳໃຈ ເຕືອນໄວ້ເພື່ອການດຳລົງຊີວິດທີ່ດີຂອງຄົນໃນສັງຄົມ ສຸພາສິດອາດເປັນຄຳເວົ້າທຳມະດາຟັງແລ້ວເຂົ້າໃຈງ່າຍຕົງໆ ຕົວຢ່າງ: ອົດສົ້ມໄດ້ກິນຫວານ ອົດທົນທານວຽກງານຈຶ່ງແລ້ວ, ໄມ້ລຳດຽວລ້ອມຮົ້ວບໍ່ໄຂວ່ ໄພ່ບໍ່ພ້ອມແປງບ້ານບໍ່ເຮືອງ, ຄົບຄົນດີມີສີແກ່ຕົວຄົບຄົນຊົ່ວພາຕົວຫມົ່ນຫມອງ…ເຫຼົ່ນນີ້ເປັນຕົ້ນ.
ແຕ່ບາງສຸພາສິດອາດເປັນຄໍາເວົ້າທີ່ເຊື່ອງຊ້ອນເນື້ອໃນຄວາມໝາຍ ຟັງແລ້ວຕ້ອງໄດ້ມາຄິດຕຶກຕອງຫາເນື້ອໃນຄວາມໝາຍວ່າໝາຍເຖິງຫຍັງ
ຕົວຢ່າງ:
ນົກອ້ຽງກິນໝາກໂພໄຮ ແຊວໆສຽງບໍ່ມີໂຕຮ້ອງ
ໂຕຢູ່ກ້ອງກົ້ມຫົວກິນງ່າເທິງ ໂຕຢູ່ເທິງແຫງນຄໍກິນງ່າລຸ່ມ.
ຢາກກິນເຂົ້າ ໃຫ້ປູກໃສ່ພະລານຫີນ
ຢາກມີສິນ ໃຫ້ຂ້າພໍ່ຕີແມ່
ຢາກໃຫ້ພີ່ນ້ອງມາແວ່ ໃຫ້ຂ້າໝູ່ດຽວກັນ
ຢາກມີສີມີສັນ ໃຫ້ນອນດິນເກືອກຂີ້ຝຸ່ນ
ຢາກໃຫ້ໂຕອຸ່ນ ໃຫ້ອາບນໍ້າຍາມໜາວ
ຢາກກິນປາຂາວ ໃຫ້ແບກແຫຂຶ້ນໂຄກ
ຢາກຕົກໝໍ້ນະຮົກ ໃຫ້ເຂົ້າວັດຟັງທຳ….
ເຫຼົ່ານີ້ເປັນຕົ້ນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo