ສາວລາວພາລູກລັກຂ້າມດ່ານແບບຜິດກົດໝາຍຫວັງບໍ່ໄດ້ກັກຕົວ14ມື້
ພາບ: ປກສ ນວ
ສາວລາວພາລູກຫຼົບຫຼີກການກວດກາຫອບລູກຂື້ນລົດພວງຂ້າມດ່ານ.
ເນືອງຈາກກະລະບາດຂອງໂຄວິດຢູ່ຫລາຍໆປະເທດຍັງຄົງມີການລະບາດຕໍ່ເນື່ອງ ການເຂົ້າອອກຜ່ານແຕ່ລະປະເທດກໍຕ້ອງໄດ້ເຂັ້ມງວດກວດຂັນເພື່ອບໍ່ໃຫ້ມີການນຳພາເຊື້ອໂລກເຂົ້າມາລະບາດພາຍໃນປະເທດ, ສະນັ້ນເຈົ້າໜ້າທີ່ກໍສຸມໃສ່ທຸກກຳລັງຕັ້ງແຕ່ດ່ານຕ່າງໆຈົນຮອດລະດັບບ້ານເພື່ອຊ່ວຍກັນເປັນຫູເປັນຕາໃນການເຟົ້າລະວັງນຳກັນ.
ລ້າສຸດໃນວັນທີ່ 15 ກຸມພາ 2021ຜ່ານມານີ້, ເຈົ້າໜ້າທີ່ 1191 ປ່າຝາງ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ຮັບແຈ້ງວ່າມີແຮງງານລາວລັກລອບຂ້າມມາແຕ່ໄທ ສະນັ້ນຈຶ່ງໄດ້ສົມທົບກັບພະແນກຕຳຫຼວດຄຸ້ມຄອງຄົນຕ່າງປະເທດ ຫ້ອງສັນຕິບານ ປກສ ນວ, ພະແນກສັນຕິບານ ປກສ ເມືອງຫາດຊາຍຟອງ ພ້ອມດ້ວຍການຈັດຕັ້ງບ້ານ ດອນຂາຊ້າຍ ລົງກວດກາເກັບກຳຂໍ້ມູນຮູ້ໄດ້ວ່າ:
ນາງ ວຽງທອງ ອາຍຸ 35 ປີ, ກຳມະກອນ, ບ້ານດອນຂາຊ້າຍ ເມືອງຫາດຊາຍຟອງ, ໃນວັນທີ 10 ກຸມພາ 2021 ເວລາ 11:00ໂມງ ຜູ້ກ່ຽວໄດ້ຈ້າງໂຊເຟີລົດພວງຂອງຄົນໄທ ຈຳນວນເງິນໄທ 3000ບາດ (ສາມພັນບາດ) ລັກຂ້າມມາທາງຂົວມິດຕະພາບລາວ-ໄທ I ພ້ອມດ້ວຍລູກນ້ອຍຊື່ທ້າວ ໄຊຍະພັດ, ອາຍຸ 1 ປີກັບ 5 ເດືອນ; ເມື່ອລັກຂ້າມມາແຕ່ປະເທດໄທແລ້ວຜູ້ກ່ຽວໄດ້ມາພັກຢູ່ເຮືອນຜູ້ກ່ຽວເອງ ມາຮອດວັນທີ່ 15 ກຸມພາ 2021 ເວລາ 13:40 ຈຶ່ງຖືກເຈົ້າໜ້າທີ່ເຂົ້າກວດກາ ແລະ ກັກຕົວນຳສົ່ງສູນກັກກັນຫຼັກ 27 ພ້ອມທັງໃຫ້ຮັບຜິດຊອບຄ່າໃຊ້ຈ່າຍທັງໝົດ.
ເພື່ອໃຫ້ທຸກທ່ານເຂົ້າໃຈຢ່າງຖືກຕ້ອງ ກອງບັນຊາການ ປກສ ນະຄອນຫຼວງວຽງຈັນ ຂໍແຈ້ງຄໍາເຫັນແນະນຳຂອງທ່ານຫົວໜ້າພະແນກສາທາລະນະສຸກ ນະຄອນຫຼວງວຽງຈັນ ໃນວັນທີ 04 ກຸມພາ 2021 ໃຫ້ພໍ່ແມ່ປະຊາຊົນ, ແຮງງານລາວທີ່ເປັນພົນລະເມືອງລາວຊາວນະຄອນຫຼວງວຽງຈັນ ຊາບວ່າ:
ຕໍ່ບຸກຄົນທີ່ເຂົ້າມາຕາມຊາຍແດນທີ່ບໍ່ຖືກຕ້ອງ ຫາກຈິງໃຈແຈ້ງເຈົ້າໜ້າທີ່ ແລະ ເຂົ້າຮ່ວມກັກກັນຫາເຊື້ອພະຍາດຈະບໍ່ເສຍຄ່າກວດກາຫາເຊື້ອ, ຄ່າທີ່ພັກ ແລະ ຄ່າອາຫານໃດໆ ໃນກຳນົດເວລາກັກຕົວ 14ວັນ.
ຕໍ່ບຸກຄົນທີ່ເຂົ້າມາບໍ່ຖືກຕ້ອງຕາມຊາຍແດນ ຫາກຫຼົບຫຼີກຈາກການກວດກາ, ການໄປກັກຕົວ ເມື່ອເຈົ້າໜ້າທີ່ຊອກຮູ້ ຈະນຳຕົວໄປກັກກັນກວດກາຫາເຊື້ອພະຍາດໃນກຳນົດເວລາ 14ວັນ, ຜູ້ທີ່ລະເມີດຈະຕ້ອງໄດ້ຮັບຜິດຊອບຈ່າຍຄືນຄ່າກວດກາຫາເຊື້ອດ້ວຍຕົນເອງມູນຄ່າ 1,200,000ກີບ/ຄັ້ງ, ຕາມຂໍ້ຕົກລົງຂອງກະຊວງສາທາລະນະສຸກ ສະບັບເລກທີ 3439/ສທ, ລົງວັນທີ 22 ທັນວາ 2020 ແລະ ຈະຕ້ອງຈ່າຍຄ່າອາຫານ 50,000 ກີບ/ວັນ ໃນໄລຍະກັກຕົວ 14ວັນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ປກສ ນວ.
