ສາລະວັນເລັ່ງປັບປຸງ ແລະ ສົ່ງເສີມການທ່ອງທ່ຽວຢູ່ພາຍໃນແຂງ
ສາລະວັນເນັ້ນສົ່ງເສີມການທ່ອງທ່ຽວ ການຢາງປ່າ ຕັ້ງແຄ້ມປະຈົນໄພ ແລະ ຢ້ຽມຢາມຊົນເຜົ່າ
ປະຈຸບັນນີ້, ແຂວງສາລະວັນກໍາລັງເລັ່ງປັບປຸງ ແລະ ສົ່ງເສີມການທ່ອງທ່ຽວພາຍໃນແຂວງໃຫ້ສາມາດເປັນທ່າແຮງໃນການສ້າງເສດຖະກິດຂອງແຂວງ ກໍຄືຄອບຄົວຂອງພໍ່ແມ່ປະຊາຊົນພາຍໃນແຂວງ ຫລັງຈາກການລະບາດຂອງພະຍາດໂຄວິດ-19 ເບົາລອງ, ແລະ ປະຈຸບັນ ສປປ ລາວກໍໄດ້ເປີດປະເທດຢ່າງເປັນທາງການແລ້ວ, ສະນັ້ນຈະສາມາດດືງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາ.
ພາຍຫຼັງທີ່ລັດຖະບານລາວໄດ້ເປີດດ່ານສາກົນທຸກດ່ານໃນຂອບເຂດທົ່ວປະເທດ ຫຼື ເປີດປະເທດເພື່ອຕ້ອນຮັບນັກທ່ອງທ່ຽວແຕ່ຕົ້ນເດືອນພຶດສະພາ ທີ່ຜ່ານມານັ້ນ, ປັດຈຸບັນນີ້ ອໍານາດການປົກຄອງແຂວງສາລະວັນ ໂດຍສະເພາະພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງສາລະວັນ ກໍາລັງເລັ່ງຟື້ນຟູການທ່ອງທ່ຽວໂດຍເລັ່ງໃສ່ການຊຸກຍູ້, ສົ່ງເສີມຜູ້ປະກອບການລົງທຶນ ພັດທະນາສິ່ງອຳນວຍຄວາມສະດວກຢູ່ແຫຼ່ງທ່ອງທ່ຽວຕ່າງໆ, ປັບປຸງກິດຈະກໍາທ່ອງທ່ຽວໃໝ່ເຊັ່ນ:
ການຍ່າງປ່າ, ທ່ອງທ່ຽວແບບອະນຸລັກ, ຜະຈົນໄພ, ຕັ້ງແຄັມ, ຢ້ຽມຢາມຊົນເຜົ່າ, ພ້ອມທັງປັບປຸງອຸທິຍານພູຜາສຸກ, ປາກເສັດ, ຫັດຖະກໍາຕໍ່າແຜ່ນຫ້ວຍຫູນ, ຕາດສູງເຊເສັດ, ແກ້ງຊັນ, ຫໍໄຕປີດົກ, ແກ້ງຄັນຕ່າຍ ແລະ ແຫຼ່ງທ່ອງທ່ຽວອື່ນໆ.
ນອກນັ້ນ, ພະແນກ ຖວທ ຍັງສ້າງແຜນເຊື່ອມໂຍງການທ່ອງທ່ຽວລະຫວ່າງແຂວງ ກັບ ຕ່າງແຂວງ ແລະ ປະເທດເພື່ອນບ້ານ ເຊັ່ນ: ປະເທດໄທ ແລະ ສສ ຫວຽດນາມ ພ້ອມດຽວກັນນັ້ນ ກໍ່ໄດ້ສ້າງປະຕິທິນທ່ອງທ່ຽວ, ຊຸກຍູ້ກິດຈະການທ່ອງທ່ຽວ ເປັນຕົ້ນ:
ທີ່ພັກແຮມ, ຮ້ານອາຫານ, ຮ້ານບັນເທີງ ແລະ ສະຖານທີ່ທ່ອງທ່ຽວ ໄດ້ຮັບການຢັ້ງຢືນການປະຕິບັດມາດຕະຖານການທ່ອງທ່ຽວທີ່ປອດໄພ (Lao safe), ການນຳທ່ຽວ, ກຸ່ມລົດບໍລິການຂົນສົ່ງນັກທ່ອງທ່ຽວ ແລະ ປັບປຸງຄືນສະມາຄົມ, ກຸ່ມທຸລະກິດຜູ້ປະກອບການທ່ອງທ່ຽວຂັ້ນແຂວງ, ຂັ້ນເມືອງ ແລະ ຄວາມເປັນເອກະພາບໃນການປະຕິບັດລະບຽບການຄຸ້ມຄອງ.