ສວນວັດທະນາທຳ ວັດຊຽງຄວນ ການປັບປຸງໃໝ່ໃກ້ສຳເລັດແລ້ວ
ພາບ: ຂປລ.
ປັບປຸງປະຕູໂຂງໃຫຍ່ສວນວັດທະນະທຳ ວັດຊຽງຄວນໃຫ້ສວຍງາມກວ່າເກົ່າ.
ໄລຍະທີ່ຜ່ານມາ ສວນວັດຖະນາທຳ ວັດຊຽງຄວນກໍຖືວ່າເປັນແຫລ່ງທ່ອງທ່ຽວວັດຖະນາທຳອັນໜຶ່ງທີ່ຫລາຍໆຄົນນິຍົມໄປທ່ຽວຊົມ ເຊິງເປັນວັດທີ່ເກົ່າແກ່ຫລາຍ ແລະ ມີອະລິຍະທຳລວດລາຍການອອກແບບພະພຸດທະຮູບ ເລື່ອງລາວຕ່າງໆ ແລະ ຮູບປັ້ນອື່ນໆ ທີ່ສວຍງາມ ແລະ ມີເອກະລັກ ແລະ ເປັນບ່ອນທີ່ນັກທ່ອງທ່ຽວສາມາດໄປທ່ຽວຊົມໄດ້ງາຍເນືອງຈາກບໍ່ໄກຈາກຕົວເມືອງວຽງຈັນ.
ທ່ານ ນາງ ສ້ອຍສຸດາ ອິນເມືອງໄຊ ຜູ້ອຳນວຍການບໍລິສັດ ສວນວັດທະນະທຳ ຊຽງຄວນ ຈຳກັດຜູ້ດຽວ ໄດ້ໃຫ້ສຳພາດຕໍ່ນັກຂ່າວ ສຳນັກຂ່າວສານປະເທດລາວ ໃນວັນທີ 3 ມີນາ 2021 ຜ່ານມານີ້ວ່າ: ພວກເຮົາກຽມພ້ອມ ຈະເປີດປະຕູໂຂງໃຫຍ່ສວນວັດທະນະທຳຊຽງຄວນ ຢ່າງເປັນທາງການ ໃນເດືອນເມສາ ທີ່ຈະມາເຖິງນີ້. ໃນຂະນະທີ່ ການພັດທະນາກິດຈະກໍາຫລັກຕ່າງໆ ໃນສວນແຫ່ງນີ້ ໄດ້ສຳເລັດແລ້ວ 90% ພາຍຫລັງມີການເຊັນສັນຍາຕົກລົງໃຫ້ມີການພັດທະນາ ແລະ ບູລະນະສວນວັດທະນະທຳຊຽງຄວນ ແຫ່ງນີ້ຄືນໃໝ່ແຕ່ກາງປີ 2017 ໂດຍໃຊ້ທຶນຫລາຍກວ່າ 4 ລ້ານໂດລາສະ ຫະລັດ ໃນເນື້ອທີ່ 21.000 ຕາແມັດ ເພື່ອສ້າງສິ່ງສວຍງາມ ແລະ ສິ່ງອໍານວຍຄວາມສະດວກຕ່າງໆ ເພື່ອຮອງຮັບແຂກພາຍໃນ ແລະ ຕ່າງປະເທດ ທີ່ເຂົ້າມາທ່ຽວຊົມ.
ປັດຈຸບັນຈຳນວນນັກທ່ອງທ່ຽວທີ່ເຂົ້າມາທ່ຽວຊົມສວນດັ່ງກ່າວ, ໄດ້ມີຈຳນວນຫລຸດລົງ ເນື່ອງຈາກມີການລະບາດຂອງພະຍາດໂຄວິດ-19 ເຮັດໃຫ້ບໍລິສັດທົວຕ່າງໆ ຢຸດສະຫງັກ, ແຕ່ພວກເຮົາກໍບໍ່ໄດ້ຫວັ່ນໄຫວຕໍ່ອຸປະສັກດັ່ງກ່າວ ເນື່ອງຈາກວ່າລັດຖະບານໄດ້ມີໂຄງການສົ່ງເສີມໃຫ້ລາວທ່ຽວລາວ ຈຶ່ງເປັນໂອກາດອັນໜຶ່ງ ທີ່ທາງສວນວັດທະນະທຳຊຽງຄວນແຫ່ງນີ້ ໄດ້ເປີດຕ້ອນຮັບບັນດານັກທ່ອງທ່ຽວຄົນລາວ ເຂົ້າມາທ່ຽວຊົມທຸກໆມື້.
ເຖິງວ່າວັນທໍາມະດາອາດຈະມີນັກທ່ອງທ່ຽວເຂົ້າມາໜ້ອຍກໍຕາມ, ແຕ່ກໍມີມາຕະຫລອດບໍ່ຂາດ ສະເລ່ຍມື້ໜຶ່ງປະມານ 100-200 ຄົນ. ສຳລັບວັນເສົາ ແລະ ອາທິດ ແມ່ນຍັງມີຄົນມາທ່ຽວເປັນປົກກະຕິ ມີປະມານ 400-500 ຄົນ. ຖືວ່າຍັງໂຊກດີ ເພາະວ່າສະຖານທີ່ແຫ່ງນີ້ ເປັນສະຖານທີ່ທີ່ໃຫ້ຄວາມສົນໃຈແກ່ບັນດານັກທ່ອງທ່ຽວ ກໍຄືຄົນລາວຂອງພວກເຮົາ.
ສະຖານທີ່ແຫ່ງນີ້, ແມ່ນໄດ້ຕິດພັນກັບທຳມະຊາດ ແລະ ວັດທະນະທໍາ ເຊິ່ງຜູ້ທີ່ເຄີຍມາແລ້ວກໍຢາກກັບມາຕື່ມອີກ. ເຖິງຢ່າງໃດກໍຕາມ ພວກເຮົາກໍມີການພັດທະນາ ແລະ ປັບປຸງສະ ຖານທີ່ດັ່ງກ່າວມາເລື້ອຍໆ ຈົນກວ່າຈະສຳເລັດຕາມຈຸດປະສົງທີ່ວາງໄວ້ ເພື່ອຮອງຮັບບັນດານັກທ່ອງທັງພາຍໃນ ແລະ ຕ່າງປະ ເທດ ຫລັງຈາກພະຍາດໂຄວິດ-19 ໝົດໄປ ໂດຍສະເພາະໄດ້ຂະຫຍາຍໃຫ້ມີສວນດອກໄມ້ຫລາກຫລາຍຊະນິດ, ມີຮ້ານອາຫານຕາມສັ່ງ ແລະ ຕູບໄວ້ຄອຍບໍລິການລູກຄ້າ ແລະ ແຂກຜູ້ມາທ່ຽວຊົມໄດ້ມານັ່ງພັກຜ່ອນ ແລະ ມາຊີມອາຫານທີ່ເປັນເອກະລັກພື້ນບ້ານຂອງລາວ ແລະ ຂໍເຊີນທຸກທ່ານມາທ່ຽວຊົມ ສວນວັດທະນະທຳຊຽງຄວນໄດ້ທຸກໂອກາດ, ມີວີວງາມ, ອາຫານແຊບ ໄວ້ບໍລິການທ່ານ.
ວັດຊຽງຄວນ ສ້າງຂຶ້ນເມື່ອປີ ຄ.ສ 1958 ກົງກັບ ພ.ສ 2501 ໂດຍຍາພໍ່ບຸນເຫລືອ, ຕັ້ງຢູ່ດ້ານໃຕ້ຂອງບ້ານທ່າເດື່ອ ເມືອງຫາດຊາຍຟອງ ນະຄອນຫລວງວຽງຈັນ, ຫ່າງຈາກຂົວມິດຕະພາບລາວ-ໄທ ປະມານ 7,3 ກິໂລແມັດ.
ຂອບໃຈແຫລ່ງທີ່ມາ: ຂປລ.
