ກຽມປະກາດ ໃຫ້ສວນວັດທະນະທຳຊຽງຄວນ ເປັນມໍລະດົກແຫ່ງຊາດ ທ້ອງຖິິ່ນ ນະຄອນຫຼວງວຽງຈັນ

ສວນວັດທະນະທຳຊຽງຄວນຖືວ່າເປັນອີກແຫລ່ງທ່ອງທ່ຽວໜື່ງທີ່ມີມາດົນນານ ແລະ ໄດ້ມີຕຳນານອະພິນິຫານຕ່າງໆຈາກການເລົາລືຂອງພໍ່ແມ່ປະຊາຊົນໃນເຂດແຖວລຽບແຄມຕາມແມ່ນ້ຳຂອງ ແລະ ສວນວັດທະນະທຳຊຽງຄວນ ເປັນແຫຼ່ງທ່ອງທ່ຽວທາງວັດທະນະທຳ ທີ່ຕັ້ງຢູ່ ເມືອງ ຫາດຊາຍຟອງ, ນະຄອນຫຼວງ ວຽງຈັນ ເປັນແຫຼ່ງທ່ອງທ່ຽວທີ່ຂຶ້ນຊື່ ແລະ ມີປະຫວັດຄວາມເປັນມາທີ່ໜ້າສົນໃຈ ຈົນສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວໄດ້ເປັນຢ່າງດີ.

ຜ່ານມາຫລາຍໆປີສ່ວນແຫ່ງນີ້ກໍ່ໄດ້ປັບປຸງຂື້ນໃຫ້ດີກ່ວາເກົ່າເພື່ອຮອງຮັບນັກທ່ອງທ່ຽວໃຫ້ໄດ້ຫລາຍຂື້ນ ແລະ ສ້າງຄວາມໜ້າປະທັບໃຈເວລາໄດ້ເຂົ້າມາທ່ຽວຊົມໃນວັດຊຽງຄວນແຫ່ງນີ້, ປັດຈຸບັນ ສວນດັ່ງກ່າວ ໄດ້ມີການປັບປຸງສິ່ງອຳນວຍຄວາມສະດວກຢູ່ໃນບໍລິເວນສວນ ແລະ ປັບປຸງປະຕູໂຂງທາງເຂົ້າສວນໃໝ່ ທີ່ມີຄວາມສວຍງາມ, ເປັນເອກະລັກຂອງລາວ ເຊິ່ງຈະຈັດພິທີເປີດຢ່າງເປັນທາງການ ພ້ອມກັບປະກາດ ສວນວັດທະນະທຳຊຽງຄວນ ເປັນມໍລະດົກແຫ່ງຊາດລະດັບທ້ອງຖິ່ນ ຂອງນະຄອນຫຼວງ ວຽງຈັນ ໃນວັນທີ 22 ທັນວາ 2022.

ທ່ານນາງ ສ້ອຍສຸດາ ອິນເມືອງໄຊ, ປະທານສວນວັດທະນະທຳຊຽງຄວນ ໃຫ້ຮູ້ວ່າ: ພາຍຫຼັງທີ່ໄດ້ເຂົ້າມາພັດທະນາສວນວັດທະນະທຳແຫ່ງນີ້ ພວກເຮົາກໍໄດ້ມີການປັບປຸງຫຼາຍຢ່າງ ບໍ່ວ່າຈະເປັນທາງຍ່າງອ້ອມສວນໃຫ້ມີຄວາມສະດວກສະບາຍຂຶ້ນ, ສ້າງປະຕູໂຂງໃໝ່ທີ່ມີຄວາມເປັນເອກະລັກ, ສ້າງສວນພຶກສາຊາດໃຫ້ນັກທ່ອງທ່ຽວໄດ້ທ່ຽວຊົມ ແລະ ສ້າງບ່ອນນັ່ງຫຼິ້ນໄວ້ໃຫ້ນັກທ່ອງທ່ຽວໄດ້ພັກຜ່ອນຢ່ອນໃຈຕື່ມອີກ.

ນອກຈາກນີ້ ເພື່ອເປັນການກຽມຄວາມພ້ອມ ທາງສວນວັດທະນະທຳຊຽງຄວນ ຍັງໄດ້ຈັດງານສະແດງສິລະປະປະຈຳ ເມືອງ ຫາດຊາຍຟອງ ໃນລະຫວ່າງ ວັນທີ 24-25 ພະຈິກ 2022 ເພື່ອຄັດເລືອກເອົາທີມທີ່ຊະນະເລີດມາສະແດງໃນມື້ເປີດພິທີຢ່າງເປັນທາງການອີກດ້ວຍ.