ພຣະຣັກ-ພຣະຣາມ ຕອນພຣະຣາມຕາມກວາງຊາງສວຍງາມ ແລະ ອອນຊອນແທ້.
ໃນບຸນນະມັດສະການພະທາດຫລວງປີນີື້ຖືວ່າໄດ້ຈັດຂື້ນຢ່າງໃຫຍ່ຫລວງ ແລະ ມີຫລາກຫລາຍກິດຈະກຳຫລັງຈາກສອງສາມປີກ່ອນບໍໄດ້ຈັດແບບເຕັມທີ່, ໃນງານຄັ້ງນີ້ຍັງມີການສະແດງສິນລະປະອັນເປັນຮີດຄອງປະເພນີລາວ, ທັງໃນນາວະນິຍາຍຕ່າງໆຂອງລາວເຮົາທີ່ເຄີຍໄດ້ຟັງກັນມາແຕ່ຍັງນ້ອຍ.
ໃນນີ້, ການສະແດງຟ້ອນນາງແກ້ວ ພຣະຣັກ-ພຣະຣາມ ໃນບັ້ນພຣະຣາມຕາມກວາງ ເນື່ອງໃນບຸນນະມັດສະການພຣະທາຕຸຫລວງ ຣາຊະມະຫາວິຫາຣ ນະຄອນຫລວງ ໃນຄ່ຳຄືນວັນທີ 07 ພະຈິກ 2022ຖື່ວ່າສວຍງາມຫລາຍ.
ຍັກທົດສະກັນ ກິນບໍ່ໄດ້ນອນບໍ່ລັບ ຍ້ອນຢາກໄດ້ນາງສີດາ ມາເປັນມະເຫສີ, ຈຶ່ງປະຊຸມລັບນຳມາລິດ ເພື່ອໄປລັກພາຕົວນາງສີດາ ທີ່ອາສົມ ພຣະຣາມແຄມແມ່ນໍ້າໂຄຫາວະລີ. ພໍໄປເຖິງ, ຍັກມາລິດໄດ້ແປງກາຍກັບເພດເປັນກວາງຄຳ ຍ່າງສິດໄປສິດມາໃຫ້ນາງສີດາເຫັນ.
ພໍນາງສີດາ ມາບເຫັນກວາງຄຳ, ນາງກໍ່ມີຄວາມປາຖະໜາແຮງກ້າ ຢາກໄດ້ມາລ້ຽງຈຶ່ງອ້ອນວອນໃຫ້ພຣະຣາມໄປຈັບມາໃຫ້, ພຣະຣາມພະຍາຍາມຈັບກວາງຫຼາຍຄັ້ງ-ຫຼາຍຄາວ ແຕ່ກໍ່ຈັບບໍ່ໄດ້, ຍິ່ງໄລ່-ຍິ່ງເລິກເຂົ້າໄປໃນປ່າຕຶບ-ດົງໜາ. ມາລິດ ( ທີ່ແປງກາຍເປັນກວາງຄໍາ ) ໄດ້ອອກອຸບາຍຮ້ອງວ່າ ” ພຣະຣັກເອີຍຊ່ອຍອ້າຍແດ່ ” ເພື່ອຕອບສະໜອງຄວາມຮຽກຮ້ອງເອິ້ນຂອງພຣະຣາມ ນາງສີດາຈຶ່ງບອກໃຫ້ພຣະຣັກໄປຊ່ອຍອ້າຍໂດຍໄວ.
ອີກດ້ານໜຶ່ງ, ພໍເຫັນນາງສີດາຢູ່ຄົນດຽວ, ຍັກທົດສະກັນຈຶ່ງຈຳແລງເປັນລືສີ ເຊິ່ງມີຊື່ວ່າ: ພຣະສຸນາທອນລົມ ແຫ່ງດິນແດນພິໄຊລົງກາ. ທ້າຍທີ່ສຸດນາງສີດາກໍ່ຖືກຍັກທົດສະກັນ ລັກພາຕົວເຫາະເຫີນໄປທາງອາກາດໄປສູ່ທີ່ຢູ່ຂອງຕົນ.
ເວລານັ້ນ,ພໍດີສະດາຍຸ ຜູ້ເປັນສະຫາຍຮັກກັບບິດາຂອງພຣະຣາມມາພົບພໍ້ຈຶ່ງເກີດມີການຕໍ່ສູ້ຊິງນາງສີດາ, ການຕໍ່ສູ້ໄປເປັນໄປຢ່າງດຸເດືອດ ແລະ ໃນທີ່ສຸດທົດສະກັນ ກໍ່ກາຍເປັນຜູ້ຮັບໄຊຊະນະ.
ເມື່ອນາງສີດາເຫັນດັ່ງນັ້ນກໍ່ຮ້ອງໄຫ້ຂຶ້ນຢ່າງແຮງດ້ວຍຄວາມເຈັບແຄ້ນ, ສ່ວນທົດສະກັນ ກໍ່ຮີບຮ້ອນເອົານາງສີດາບິນໄປເມືອງລົງກາ ( ເມືອງຍັກ )
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: ນະຄອນຫລວງພຣະບາງ Luangprabang City