ວັດຕາແຫຼວເກົ່າ ບູຮານສະຖານຂອງເມືອງຈຳພອນ ສະຫວັນນະເຂດ

ວັດຕາແຫຼວເກົ່າ ວັດຮ້າງທີ່​ເປັນບູຮານສະຖານທີ່ເກົ່າແກ່ຂອງແຂວງສະຫວັນນະເຂດ .

ວັດຕາແຫຼວເກົ່າ ແຂວງສະຫວັນນະເຂດ ກໍ່ແມ່ນບູຮານສະຖານທີ່ຖືກສ້າງຂຶ້ນຕັ້ງແຕ່ປີ 1918 ການເດີນທາງໄປວັດຕາແຫຼວເກົ່າ ຖ້າເລີ່ມຈາກຕົວເມືອງໄກສອນພົມວິຫານແຂວງສະຫວັນນະເຂດ, ແມ່ນໃຫ້ເດີນທາງໄປຕາມເສັ້ນທາງເລກທີ 9B ໄປຕາມທິດໃຕ້ຈົນຮອດຫຼັກ 35, ຈາກນັ້ນລ້ຽວຊ້າຍໄປຕາມເສັ້ນທາງໄລຍະປະມານ 18 ກິໂລແມັດສູ່ເມືອງຈຳພອນ ຂ້າມຂົວເຊຈຳພອນແລ້ວມຸ່ງໜ້າໄປຕາມເສັ້ນທາງແດງ 7 ກິໂລແມັດໄປສູ່ບ້ານຕາແຫຼວ.

ວັດຕາແຫຼວເກົ່າ ແມ່ນວັດຮ້າງທີ່ບໍ່ມີພະສົງພຳນັກຢູ່ແລ້ວເພາະຖືກທຳລາຍຈົນເຫຼືອແຕ່ຊາກຫັກພັງດ້ວຍນ້ຳມືຂອງສົງຄາມໃນຊຸມປີ 1960. ຕາມຂໍ້ມູນທີ່ຜູ້ຂຽນໄດ້ມາ, ວັດນີ້ສ້າງຂຶ້ນໃນປີ 1918 ໂດຍການນຳພາຂອງ ພະຄູຈຽງ ຫຼື ຍາທ່ານຈຽງທິຄາຍຸໂກ ເຊິ່ງແມ່ນລູກຂອງ ທ້າວ ວາດ ມະນີວົງ ຊື່ ທ້າວ ອຸງ , ປ່ຽນຊື່ ມາເປັນພະຄູຈຽງ ( ຍາທ່ານຈຽງ ທິຄາຍຸໂກ )  ພະອົງນີ້ມີຈິດໃຈເອື້ອເພື້ອເພື່ອແຜ່ຢຶດໝັ້ນໃນຫຼັກທຳມະ,  ທ່ານໄດ້ນຳພາອອກຕົນ ຍາດໂຍມພາຍໃນບ້ານຕາແຫຼວ ສ້າງກຸດຕິວິຫານ ແລະ ກໍ່ກຳແພງອ້ອມວັດ, ສ້າງກຸຕິວິຫານ ແລະ ກໍ່ກຳແພງອ້ອມວັດ ເຊິ່ງວັດສະດຸທີ່ນຳມາສ້າງນັ້ນປະກອບດ້ວຍໄມ້ເນື້ອແຂງ, ດິນຈີ່ ແລະ ປູນ.

ພາຍໃນວິຫານ ມີການປະດັບປະດາດ້ວຍຮູບແຕ້ມຝາຜະໜັງ, ຮູບສະຫຼັກ, ຮູບປັ້ນ ແລະ ຮູບຄວັດລາຍ ດ້ວຍຊ່າງຜູ້ມີສີມືປານີດບັນຈົງ. ແນວໃດກໍຕາມ ມາຮອດປີ 1969, ດ້ວຍໄພສົງຄາມ ວັດຕາແຫຼວເກົ່າ ແລະ ບ້ານເຮືອນປະຊາຊົນໃກ້ຄຽງກໍຖືກລູກສອນໄຟ ແລະ ລະເບີດທຳລາຍ ປະຊາຊົນ ແລະ ພະສົງຕ່າງກໍແຕກສະຫຼຸຜຸຜ່າຍເພື່ອເອົາຕົວລອດ ເຫຼືອໄວ້ແຕ່ຊາກຫັກພັງຂອງວັດດັ່ງທີ່ເຫັນໃນປັດຈຸບັນ.

ຮູບຊົງຂອງວິຫານ ການອອກແບບອາຄານແມ່ນມີຄວາມປານີດ ເປັນການຜະສົມຜະສານລະຫວ່າງຮູບຄວັດລາຍແບບລາວ ແລະ ໂຄງສ້າງຕຶກແບບຕາເວັນຕົກ. ພາຍໃນມີຮູບແຕ້ມທີ່ເປັນເອກະລັກ ແລະ ງົດງາມຕາມຝາ ບອກເລົ່າເລື່ອງລາວຊີວິດຂອງປະຊາຊົນໃນໄລຍະກ່ອນໄດ້ດີ ພ້ອມທັງມີຮູບປັ້ນຊ້າງ ແລະ ພະພຸດທະຮູບອີກຈຳນວນໜຶ່ງ ຜູ້ຂຽນຂໍອອກຄວາມເຫັນວ່າ ປັ້ນອອກມາໄດ້ສົມສ່ວນ ແລະ ງົດງາມທີ່ສຸດ, ເສຍດາຍແຕ່ວ່າ ຂ້າງໃນຂອງວິຫານ ແມ່ນຫ້າມຖ່າຍຮູບ ເລີຍບໍ່ມີຮູບໃນວິຫານມາໃຫ້ທ່ານຜູ້ອ່ານໄດ້ຊົມຄວາມງົດງາມນຳກັນ.

ນອກນັ້ນ ຈຸດພິເສດຂອງວັດນີ້ອີກຢ່າງໜຶ່ງແມ່ນກຳແພງວັດທັງສີດ້ານຈະບໍ່ມີປະຕູໃຫ້ລົດເຂົ້າໄປໃນບໍລິເວນວັດໄດ້ ເພາະເປັນທາງເຂົ້າວັດແມ່ນເປັນຂັ້ນໄດສູງທັງສີ່ທິດເລີຍ.

ຕິດຕາມ​ຂ່າວການ​ເຄືອນ​ໄຫວທັນ​​ເຫດ​ການ ເລື່ອງທຸ​ລະ​ກິດ ແລະ​ ເຫດ​ການ​ຕ່າງໆ ​ທີ່​ໜ້າ​ສົນ​ໃຈໃນ​ລາວ​ໄດ້​ທີ່​ DooDiDo

ຂອບ​ໃຈແຫລ່ງ​ທີ່​ມາ​ ໂດຍ: laopost.com