ລາວ-ໄທ ຫາລືການຮ່ວມມືກັນລາດຕະເວນຕາມລຳແມ່ນ້ຳຂອງ
ຂປລ
ກອງປະຊຸມຮ່ວມມື ລາວ-ໄທ ໃນການກວດກາສາຍທາງນ້ຳ ຕາມລໍາແມ່ນ້ຳຂອງ.
ເພື່ອແກ້ໄຂບັນຫາການຂົນສົ່ງການຄ້າຂາຍຢາເສບຕິດ, ການລັກລອບຂົນສົ່ງສິນຄ້າເຖືອນ ຕາມລຳແມ່ນ້ຳຂອງ ແລະ ການລັກລອບເຂົ້າ-ອອກປະເທດແບບຜິດກົດໜາຍ ແລະ ອື່ນໆອີກ, ຈາກທີ່ຜ່ານມາທາງເຈົ້າໜ້າທີ່ເຄີຍໄດ້ພົບເຫັນ ແລະ ກັກຕົວມາອົບໂຮມຕະຫລອດ ແຕ່ຍັງເຫັນວ່າຍັງມີຜູ້ທີ່ພະຍາຍາມລັກລອບເຂົ້າ-ອອກ ແລະ ຂົນສິນຄ້າເພື່ອຫລີກລ່ຽງການເສຍພາສີຈາກດ່ານຕ່າງໆ.
ໃນຫວ່າງບໍ່ດົນມານີ້, ແຫລ່ງຂ່າວຈາກ ແຂວງບໍ່ແກ້ວ ໃຫ້ຮູ້ວ່າ: ກອງປະຊຸມກຽມຄວາມພ້ອມວຽກງານລາດຕະ ເວນຮ່ວມຕາມລໍາແມ່ນ້ຳຂອງ ຊາຍແດນ ລາວ-ໄທ, ໄທ-ລາວ ລະຫວ່າງ ແຂວງບໍ່ແກ້ວ ສປປ ລາວ ກັບ ອຳເພີຊຽງຂອງ ຈັງຫວດຊຽງລາຍ ຣາຊະອານາຈັກໄທ ຄັ້ງປະຖົມມະລຶກ ປະຈຳປີ 2021 ເຊິ່ງໄດ້ຈັດຂຶ້ນໃນວັນທີ 28 ທັນວາ 2021 ຢູ່ຂົວມິດຕະພາບລາວ-ໄທ ແຫ່ງທີ 4 ປະເທດໄທ
ໂດຍການເປັນປະທານຂອງທ່ານ ພັນເອກ ທອງໄຂ ສີຍາລາດ ຫົວໜ້າການທະຫານ ກອງບັນຊາການທະຫານແຂວງບໍ່ແກ້ວ, ຫົວໜ້າຄະນະປະສານງານປະຈຳພື້ນທີ່ຊາຍແດນລາວ-ໄທ ແລະ ທ່ານ ນາວາເອກ ຈິລັດ ຜູກທອງ ຜູ້ບັງຄັບໜ່ວຍເຮືອຮັກສາຄວາມສະຫງົບຮຽບຮ້ອຍ ຕາມລໍາແມ່ນໍ້າຂອງເຂດຊຽງລາຍ,
ຮອງຫົວໜ້າຊຸດປະສານງານປະຈຳພື້ນທີ່ຊາຍແດນ ໄທ-ລາວ ພື້ນທີ່ພາກເໜືອຂອງໄທ ແລະ ພາກສ່ວນທີ່ກ່ຽວຂ້ອງ ສອງຝ່າຍ ເຂົ້າຮ່ວມ.
ກອງປະຊຸມ ໄດ້ກຳນົດຈຸດຂອບເຂດທີ່ຈະອອກເຄື່ອນໄຫວລາດຕະເວນຮ່ວມຄັ້ງນີ້ ເປັນ 6 ຈຸດ ໂດຍໃຊ້ເຮືອລາດຕະເວນ 5 ລຳ, ເຮືອລາດຕະເວນຝ່າຍລາວ 2 ລຳ ແລະ ເຮືອລາດຕະເວນຝ່າຍໄທ 3 ລຳ ໃນການໄຫວຕົວຈິງແມ່ນເລີ່ມແຕ່ຂົວມິດຕະພາບລາວ-ໄທ ແຫ່ງທີ 4 ເມືອງຫ້ວຍຊາຍ ລົງໄປຮອດ ບ້ານຄົກຫລວງ ເມືອງຫ້ວຍຊາຍ ລວມໄລຍະທາງ 20 ກິໂລແມັດ.
ຈາກນັ້ນ ທັງສອງຝ່າຍໄດ້ແລກປ່ຽນຄວາມຄິດເຫັນ ແລະ ປຶກສາຫາລື ຈຸດປະສົງໃນການອອກເຄື່ອນໄຫວລາດຕະເວນຮ່ວມໃນຄັ້ງນີ້ ກໍເພື່ອຮັກສາຄວາມສະຫງົບ, ຄວາມເປັນລະບຽບຮຽບຮອຍຕາມລໍາແມ່ນ້ຳຂອງຕອນເໜືອ ຂອງສອງປະເທດ ລາວ-ໄທ, ທັງເປັນການແກ້ໄຂການລັກລອບຂົນສົ່ງຢາເສບຕິດ, ການຂົນສົ່ງສິນຄ້າເຖື່ອນ, ການລັກລອບເຂົ້າ-ອອກເມືອງແບບຜິດກົດໝາຍ ແລະ ບັນຫາອື່ນໆທີ່ອາດຈະເກີດຂຶ້ນຕາມຊາຍແດນ ອີກດ້ວຍ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ຂປລ.
