ມາຮູ້ຈັກອີກຄຳໜຶ່ງຄໍາວ່າ “ລົມ” ທີ່ໃຊ້ຫລາຍໃນພາສາລາວ
ອະທິບາຍຄໍາວ່າ “ລົມ” ມີຄວາມໝາຍແນວໃດ?
ຄໍາວ່າ “ລົມ” ໝາຍເຖິງນຶງໃນທາດທັງສີ່ ລົມແມ່ນການໝູນວຽນ ຫຼື ການພັດໄປມາຂອງອາກາດ ຊຶ່ງແບ່ງຕາມຈຸດພິເສດ ແລະ ລັກສະນະຂອງມັນຄື: ລົມສຸລິຍະ, ລົມແດງ, ລົມພະຍຸ, ລົມໄຕ້ຝຸ່ນ, ລົມຫົວກຸດ, ລົມປັ່ນກິວ, ລົມຮ້ອນ, ລົມໜາວ, ລົມເຢັນ, ລົມແລ້ງ, ລົມທະເລ, ລົມພູເຂົາ, ລົມພັດ, ລົມອ່ອນໆ, ລົມແຮງ, ລົມເບົາໆ, ລົມຫາຍໃຈ.
ນອກຈາກນັ້ນ, “ລົມ” ຍັງໝາຍເຖິງການປາກເວົ້າ, ການສົນທະນາ, ວາຈາ ເຊັ່ນ: ລົມກັນ, ລົມສາວ, ລົມສາວ, ລົມໂທລະສັບ, ລົມມືຖື, ລົມວຽກລົມງານ, ລົມເລື່ອງການຮຽນ ແລະ ອື່ນໆ. ລົມຍັງມີການນໍາປະສົມຄໍາອື່ນເປັນສໍານວນເພື່ອໃຫ້ຄວາມໝາຍອື່ນອີກ ເຊັ່ນ: ລົມໆແລ້ງໆ (ລໍຄອຍແບບບໍ່ມີຄວາມຫວັງ ຫຼື ເລື່ອນໆລອຍໆ), ລົມຊັກບ້າໝູ (ໝາຍເຖິງການເປັນບ້າໝູ), ລົມປາກເປົ່າ (ໝາຍເຖິງບໍ່ມີຫຍັງ), ລົມຢູ່ເທິງຟ້າພຸ້ນ (ເວົ້າໃຫຍ່), ລົມສີໂບສີເບ (ເວົ້າບໍ່ມີຈຸດຢືນ) ເປັນຕົ້ນ.
ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:
ຄຳວ່າ “ລົມ”.
“ລົມ” (1. ຄໍານາມ) ທາດແນວນຶ່ງໃນທາດທັງສີ່ (ດິນ, ນໍ້າ, ລົມ ແລະ ໄຟ) ມີລັກສະນະພັດໄປມາ. (2. ຄໍາກິລິຍາ) ເວົ້າ, ລົມປາກ. ວາຈາ, ເຈລະຈາ, ບອກ, ສົນທະນາ. (3. ຄໍານາມ) ຄໍາເວົ້າ, ສີປາກ.
ຕົວຢ່າງ:
- ຝົນຕົກຫົວປີແມ່ນອັນຕະລາຍຫຼາຍ ເພາະມັກຝົນຕົກໜັກ ມີລົມແຮງ ບາງເທື່ອກໍມີໝາກເຫັບ ມີຟ້າຮ້ອງຟ້າຜ່າ.
- ປີ 2020 ພະຍຸໄຕ້ຝຸ່ນ ໂມລາເບ ຖະຫຼົ່ມປະເທດຟີລິບປີນ ດ້ວຍຄວາມໄວລົມຫຼາຍຮ້ອຍກິໂລແມັດຕໍ່ຊົ່ວໂມງ ເຮັດໃຫ້ຕົ້ນໄມ້ຫັກໂຄ່ນ, ເຮືອນເພພັງ ແລະ ມີລາຍງານຜູ້ເສຍຊີວິດ 9 ຄົນ ຫາຍສາບສູນ 13 ຄົນ ພ້ອມທັງມີຜູ້ອົບພະຍົບໜີໄພຮອດ 150,000 ຄົນ.
- ຕີນລົດລາວຮົ່ວທັງສອງຕີນ ບໍ່ມີລົມຈັກນ້ອຍ ລາວສົງໃສຄົນລັກປ່ອຍລົມລົດລາວ ວ່າຊັ້ນ.
- ລາວແລ່ນເຕະບານໄວແບບບໍ່ພັກຫຼາຍນາທີ ຟັງສຽງລົມຫາຍໃຈດັງ ຟູ່ໆ ເບີ່ງລາວຄືຊິເມື່ອຍ.
- ພໍ່ຕູ້ສາ ເປັນຄົນລົມມ່ວນ ແລະ ມີສາລະ ເຮັດໃຫ້ຫຼາຍຄົນມັກສົນທະນາກັບລາວ ຕ່າງຜູ້ເຖົ້າຫຼາຍຄົນ ລົມບໍ່ມີສາລະ.
- ລາວເປັນດີຫຼາຍ ແຕ່ພັດເປັນຄົນລົມສາວບໍ່ເກັ່ງ ດັ່ງນັ້ນຈິ່ງເຮັດໃຫ້ລາວຍັງເປັນໂສດຮອດປະຈຸບັນ.
- ຄວາມລົມຂອງລາວ ແມ່ນຢູ່ເທິງຟ້າພຸ້ນ ບາດການປະຕິບັດຕົວຈິງແມ່ນ ບໍ່ມີຫຍັງເປັນຕາພໍໃຈ.
ສະຫຼຸບ.
ຄໍາວ່າ “ລົມ” ໝາຍເຖິງການພັດໄປພັດມາຂອງອາກາດ ຫຼື ການໄຫຼວຽນຂອງອາກາດ. ພ້ອມກັນນັ້ນ, ຍັງໝາຍເຖິງການສົນທະນາ ຫຼື ເວົ້າຈາ ແລະ ສົນທະນາກັນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo