ມາຮູ້ຈັກຂັນຫ້າປະເພີນີລາວກັບສິງທີ່ຫລາຍຄົນອາດເຂົ້າໃຈຜິດ
ແມ່ນແທ້ບໍ່? ຂັນຫ້າໃນຮີດຄອງປະເພີນີລາວຕ້ອງມີດອກໄມ້ 5ຄູ່ ແລະ ທຽນ5ຄູ່.
ການໄຫວ້ພະໄຫວ້ເຈົ້າເກືອບວ່າເຫັນຢູ່ທຸກໆຫລັງຄາເຮືອນໃນປະເທດລາວເຊິງຖ້າຈະເວົ້າແລ້ວທຸກໆປະເພນີບໍ່ວ່າຈະເປັນຂື້ນເຮືອນໃໝ່ຊື້ລົດໃໝ່ຍ້າຍເຮືອນໃໝ່, ສ້າງເຮືອນໃໝ່ ຫລື ສຸມມາຜູ້ໃຫຍ່ອື່ນໆ ກໍລ້ວນແລ້ວແຕ່ຕ້ອງໄດ້ກະກຽມເຄື່ອງດອກໄມ້ທູບທຽນຕາມແຕ່ລະແບບໃຫ້ເໝາະສົມກັບແຕ່ລະປະເພນີ ຫລື ແຕ່ລະເຫດການ.
ໃນຕອນນີ້ຈະມາເວົ້າກ່ຽວກັບຂັນຫ້າວ່າມີຫຍັງແດ່, ເຊິງພຣະພຸດທະເຈົ້າໄດ້ກ່າວເຖິງຂັນຫ້າແທ້ ແຕ່ບໍ່ແມ່ນ ທຽນຫ້າຄູ່ ແລະ ດອກໄມ້ ຫ້າຄູ່, ຂັນຫ້າຕາມຄວາມໝາຍຂອງ ພຣະພຸດທະເຈົ້າແມ່ນ ເລື່ອງຂອງ ອະລິຍະສັດ 4 ໂດຍໝາຍເຖິງ ຮູບປະທັມ ແລະ ນາມມະທັມ ທັງຫ້າ ທີ່ພາໃຫ້ເກີດເປັນຊີວິດຄົນເຮົານັ້ນເອງ ເຊິ່ງປະກອບມີ 5 ຂັນດັ່ງລຸ່ມນີ້:
- ຮູບຂັນ: ໝາຍເຖິງສ່ວນທີ່ເປັນຮ່າງກາຍ ພຶດຕິກຳ ຄຸນລັກຊະນະຕ່າງໆຂອງຮ່າງກາຍ ແລະ ສ່ວນປະກອບທີ່ເປັນຮູ້ປະທັມທັງຫມົດ.
- ເວທະນາຂັນ: ໝາຍເຖິງກອງເວທະນາ ທີ່ເປັນຄວາມສຸກ ຄວາມທຸກ ຄວາມພໍໃຈ ຄວາມບໍ່ພໍໃຈ
- ສັນຍາຂັນ: ໝາຍເຖິງກອງສັນຍາ ທີ່ເປັນຄວາມຈື່ຈຳໃນອາດີດທີ່ໄດ້ຮັບ
- ສັງຂານຂັນ: ຫມາຍເຖິງກອງສັງຂານສ່ວນທີ່ເປັນການປຸງແຕ່ງຂອງຈິດ ຄິດມະໂນໄປເອງວ່າສິ່ງນີ້ອາດຈະເກີດ ສິ່ງນັ້ນອາດຈະເກີດ
- ວິນຍານຂັນ: ຫມາຍເຖິງກອງວິນຍານ ຫລື ຈິດ ທີ່ເປັນການຮູ້ແຈ້ງຜ່ານ ຫູ ຕາ ດັງ ລີ້ນ ກາຍ ແລະ ໃຈ.
ຂັນທັງຫ້າຢ່າງນີ້ຈະມີການເກີດຂື້ນ ຕັ້ງຢູ່ ແລະ ດັບໄປຕະຫລອດເວລາ ເຮົາບໍ່ສາມາດບັງຄັບມັນໄດ້ ແຕ່ເຮົາສາມາດຮັບຮູ້ມັນໄດ້ ແລະ ຢູ່ກັບມັນໃຫ້ໄດ້. ສິ່ງເລົ່ານີ້ແມ່ນທາດແທ້ຂອງຂັນຫ້າຕາມຫລັກຄຳສອນຂອງພະພຸດທະເຈົ້າ.
ແຕ່ປະຈຸບັນເຫັນຫລາຍຄົນນຳໃຊ້ຂັນຫ້າທີ່ປະກອບດ້ວຍ ດອກໄມ້ ແລະ ທຽນຫ້າຄູ່ ເພື່ອນຳໃຊ້ໃນການປະກອບພິທີກຳຕ່າງເຊັ່ນ: ການຂໍຂະມາ ການນິມົນຕ່າງໆ. ທາດແທ້ຂອງການຂໍຂະມາດ້ວຍການຍົກຂັນຫ້າກາບນັ້ນ ແມ່ນການເອົາຂັນທັງຫ້າ ຄື ຮູບ ເວທະນາ ສັນຍາ ສັງຂານ ວິນຍານ ນອບນ້ອມໃສ່ຜູ້ທີ່ເຮົາຕ້ອງການຂໍຂະມາ.
ທີ່ຜ່ານໆມາຫລາຍໆຄົນອາດເຂົ້າໃຈຜິດມາຕະຫລອດວ່າຂັນຫ້ານີ້ຕ້ອງໄດ້ມີດອກໄມ້ ແລະ ທຽນ ຄົບທັງ5ຄູ່, ເຊິງຫາໄດ້ສືກສາເຂົ້າໃຈຢ່າງທ່ອງແທ້ກໍຈະເຂົ້າໃຈ ແລະ ປະຕິບັດໄດ້ຢ່າງຖືກຕ້ອງ, ສະນັ້ນ ການຂໍຂະມາບໍ່ຈຳເປັນຕ້ອງມີຂັນຫ້າທີ່ເປັນດອກໄມ້ 5ຄູ່ ທຽນ5ຄູ່ກໍໄດ້, ສິ່ງທີ່ເຈົ້າຄວນມີແມ່ນ ຮູບ ເວທະນາ ສັນຍາ ສັງຂານ ແລະ ວິນຍານ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ແຫລ່ງທີ່ມາ: phuphamedia.com