ອະທິບາຍຄວາມໝາຍພາສາລາວຂອງຄຳວ່າ ວຸ່ນ ແລະ ວຸ້ນ.

ໃນພາສາລາວການໃຊ້ວັນນະຍຸດກັບຄຳຕ່າງໆສ່ວນຫລາຍຈະເຮັດໃຫ້ຄວາມໝາຍຂອງຄຳດັ່ງກ່າວປ່ຽນໄປ ອາດຈະຫລາຍ ຫລື ນ້ອຍແລ້ວແຕ່ຄຳສັບນັ້ນໆເຊິງໃນນັ້ນອາດຈະຂື້ນກັບຕົວອັກສອນແດ່ເພາະອັກສອນບາງຕົວກໍບໍ່ສາມາດປ່ຽນສຽງໄດ້ຈາກການໃສ່ວັນນະຍຸດໃຫ້ມັນ.

ບົດນີ້ຈະຍົກເອົາຄຳວ່າ ວຸ່ນ ແລະ ວຸ້ນ ມາອະທິບາຍ, ເຊິງສອງຄຳນີ້ອ່ານອອກສຽງທີ່ໃກ້ຄຽງກັນແຕ່ວັນນະຍຸດຕ່າງກັນ ແຕ່ຄົນຕ່າງຊາດກໍ່ຍັງຈຳແນກສຽງອອກຍາກຢູ່ດີ ເພາະພາສາ ສາກົນບໍ່ມີວັນນະຍຸດສ່ວນຫຼາຍຈະອ່ານອອກສຽງກາງທີ່ບໍ່ມີສຽງ ເອກ-ໂທ ຄືພາສາລາວ ກັບ ພາສາໄທ. ແຕ່ໃນນີ້ຈະຕ້ອງເນັ້ນໜັກໃນການອອກສຽງ ຄໍາວ່າ: ວຸ່ນ ແລະ ວຸ້ນ ມັນມີຄວາມໝາຍໄປຄົນລະຢ່າງກັນ ແລະ ແຕ່ລະຄໍາກໍ່ມີຄວາມໝາຍໄປອີກຫຼາຍຢ່າງ.

ຄຳວ່າ ວຸ່ນ.

ມີຄວາມໝາຍວ່າ ຄວາມສັບສົນ, ບໍ່ສະຫງົບ, ສົນລະວົນ, ຄວາມໂກລາຫົນ, ສະພາບຫຍຸ້ງເຫຍີງ, ຄວາມວຸ່ນວາຍອົນອວາຍຕ່າງໆ.

ຕົວຢ່າງ:

ໂອຍເດັກນ້ອຍກຸ່ມນີ້ຄືມາວຸ່ນວາຍແທ້ເດນໍ
ຈັງແມ່ນອຸກໃຈແຕ່ລະມື້ມີແຕ່ແນວມາໃຫ້ຄິດວຸ່ນວາຍສະໝອງ.

ຄຳວ່າ ວຸ້ນ.

ມີຄວາມໝາຍວ່າ ເປັນຂອງຂຸ້ນໆ, ບໍ່ເປັນນ້ຳແຕ່ເປັນຂອງເຫລວໆ ຫລື ໝາຍເຖິງຂອງຫວານຊະນິດໜຶ່ງທີ່ເຮັດຈາກແປ້ງມັນຕົ້ນ ຫລື ແປ້ງອື່ນໆ ທີ່ຕົ້ມກັບກະທິໝາກພ້າວເປັນແຜ່ນແຂ້ນຄືເຂົ້າປາດແຕ່ມີລັກສະນະໃສ, ວຸ້ນໝາກພ້າວ, ວຸ້ນກະທິ, ວຸ້ນໃນລຳໄມ້ໄຜ່ເປັນຕົ້ນ.

ຕົວຢ່າງ:

ຂອງຫວານມື້ນີ້ມີວຸ້ນໝາກພ້າວເດີ.
ມາເດີທາງຮ້ານເຮົາມີເບຍວຸ້ນ.
ແກງຕີນໝູແຊຕູ້ເຢັນດົນຫລາຍກາຍເປັນວຸ້ນ.

ສະຫລຸບ.

ຄຳວ່າ ວຸ່ນ ມີຄວາມໝາຍວ່າ ຄວາມສັບສົນ, ບໍ່ສະຫງົບ, ສົນລະວົນ, ຄວາມໂກລາຫົນ, ສະພາບຫຍຸ້ງເຫຍີງ, ຄວາມວຸ່ນວາຍອົນອວາຍຕ່າງໆ, ສ່ວນ ວຸ້ນ ມີຄວາມໝາຍວ່າ ເປັນຂອງຂຸ້ນໆ, ບໍ່ເປັນນ້ຳແຕ່ເປັນຂອງເຫລວໆ ຫລື ໝາຍເຖິງຂອງຫວານຊະນິດໜຶ່ງທີ່ເຮັດຈາກແປ້ງມັນຕົ້ນ ຫລື ແປ້ງອື່ນໆ ທີ່ຕົ້ມກັບກະທິໝາກພ້າວເປັນແຜ່ນແຂ້ນຄືເຂົ້າປາດແຕ່ມີລັກສະນະໃສ, ວຸ້ນໝາກພ້າວ, ວຸ້ນກະທິ, ວຸ້ນໃນລຳໄມ້ໄຜ່ເປັນຕົ້ນ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo