ພະທາດປູມປຸກ ພະທາດທີ່ເກົ່າແກ່ທີ່ສຸດ ຂອງເມືອງຫຼວງນ້ຳທາ
ປະຫວັດຂອງພະທາດປູມປຸກ ພະທາດທີ່ເກົ່າແກ່ທີ່ສຸດ ທີ່ຫລວງນ້ຳທາ.
ພະທາດປູມປຸກ ແມ່ນພະທາດທີ່ເກົ່າແກ່ທີ່ສຸດ ຂອງເມືອງຫຼວງນ້ຳທາ, ສ້າງຂຶ້ນ ໃນປີ ຄສ 1628 ເພື່ອເປັນສັນຍາລັກແຫ່ງມິດຕະພາບ ລະຫວ່າງ ເມືອງຫົວທາ ແລະ ເມືອງຊຽງແສນ. ພະທາດດວງເກົ່າໄດ້ຖືກຍົນ ອາເມລິກາ ຖິ້ມລະເບີດທຳລາຍ ໃນປີ 1966. ປະຈຸບັນ ຍັງມີຮ່ອງຮອຍເສດເຫຼືອຢູ່ ຂ້າງພະທາດດວງໃໝ່.
ອິງຕາມປະຫວັດສາດ ເມືອງຫຼວງຫົວທາ ບັນທຶກໄວ້ວ່າ: ມາເຖິງເດືອນ 6 ອອກໃໝ່ 13 ຄ່ຳ ປີ ເປິກສີ ຈສ 990 ຄສ 1628 ກົງກັບປີ ພສ 2171 ແມ່ນພະຍານາແລຕາໄຟ
ທີ່ປົກຄອງເມືອງຊ້າຍ ຈັນທະບູລີ ແລະ ພະຍາ ສີສຸໂທທະນະ ທຳມີກະລາຊາ ແຫ່ງເມືອງຊຽງແສນ ໄດ້ຕົກລົງ ເຫັນດີນຳກັນ ໄດ້ນຳເອົາໄພ່ພົນ ທັງສອງເມືອງມາເມືອງຫຼວງຫົວທາ ເພື່ອກໍ່ສ້າງ ພະທາດຜູກໄມຕີກັນຂຶ້ນ 2 ດວງຄື:
ດວງທີ 1 ສ້າງຂຶ້ນຢູ່ເທິງພູ ທາງທິດຕາເວັນຕົກສຽງເໜືອ ຂອງເມືອງຫຼວງຫົວທາ;ພະທາດດວງນີ້ ແມ່ນສ້າງຂຶ້ນໂດຍ ພະຍາສີສຸໂທທະນະ ທຳມີກະລາຊາ ເຈົ້າຜູ້ປົກຄອງ ເມືອງຊຽງແສນ ແລະ ຕັ້ງນາມພະທາດດວງນີ້ວ່າ “ພະທາດພູກຸກ ຫຼື ພະທາດພູປຸກ” ແຕ່ມາໃນໄລຍະຕໍ່ມາ ເອີ້ນວ່າ “ພະທາດປູມປຸກ ອິນທະລົງກາຣາຊາທະນີ” ມາຈົນເຖິງປະຈຸບັນ.
ດວງທີ 2 ແມ່ນສ້າງຂຶ້ນຢູ່ເທີງພູ ທີ່ມີຊື່ວ່າ “ພູຜາສາດ” ຕັ້ງຢູ່ ທາງທິດຕາເວັນອອກສ່ຽງເໜືອ ຂອງເມືອງຫຼວງຫົວທາ, ປະຈຸບັນ ບໍລິເວນດັງກ່າວ ແມ່ນຫ່າງຈາກ ບ້ານນ້ຳທຸງ 2 ກິໂລແມັດ ພະທາດດວງນີ້ ແມ່ນສ້າງຂຶ້ນໂດຍ ພະຍານາແລຕາໄຟ ຜູ້ປົກຄອງ ເມືອງຊ້າຍຈັນທະບຸລີ ແຫ່ງອານາຈັກລ້ານຊ້າງ.
ເຊິງພະທາດປູມປຸກນີ້ ຕັ້ງຢູ່ບໍ່ໄກຈາກຕົວເມືອງຫລວງນ້ຳທາ ຫ່າງ ຈາກເທດສະບານແຂວງຫຼວງນ້ຳທາ ປະມານ 7 ກິໂລແມັດ. ທ່ານສາມາດຂີ່ລົດໂດຍສານ ຫຼື ລົດຖີບໄປເຖິງສະຖານທີ່ດັ່ງກ່າວໄດ້ຢ່າງງາຍດາຍ ແລະ ສະດວກ. ປະຈຸບັນຍັງບໍ່ທັນມີປ້າຍອະທິບາຍ ປະຫວັດຄວາມເປັນມາ ຂອງທາດດັ່ງກ່າວ. ບຸນພະທາດປູມປຸກ ຈັດຂຶ້ນໃນ ເດືອນກຸມພາ ຂອງທຸກໆປີ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: laogov.gov.la