ພຣະທາດເກດແກ້ວ ພຣະທາດເກົ່າແກ່ທີ່ມີໂຄງສ້າງທີ່ແປກກວ່າທາດອື່ນ
ພຣະທາດເກົ່າແກ່ທີ່ມີໂຄງສ້າງຈາກ ດິນຊາຍປະສົມໝາກຂາມປຽກ ໜັງຄວາຍ ແລະ ນໍ້າເຜີ້ງ.
ຖ້າຈະເວົ້າໄປແລ້ວ, ໃນ ສປປ ລາວ ມີພຣະທາດຕ່າງໆທີ່ເກົ່າແກ່ຢ່າງຫລວງຫລາຍໃນຂອບເຂດທົ່ວປະເທດ ແລະ ໃນແຕ່ລະເຂດແຂວງແຕ່ລະທາດນັ້ນລ້ວນແລ້ວແຕ່ມີເອກະລັກອັນໂດດເດັ່ນຂອງໃຜຂອງມັນ, ພຣະທາດເກດແກ້ວກໍເປັນອີກພຣະທາດໜຶ່ງທີ່ມີຄວາມສວຍງາມມີເອກະລັກຕ່າງຈາກພຣະທາດອື່ນໆ ບໍ່ວ່າຈະເປັນທາງດ້ານຮູບຮ່າງລັກສະນະ, ສ່ວນປະສົມໃນການກໍ່ສ້າງ ແລະ ທີ່ມາທີ່ໄປແຕກຕ່າງຈາກພຣະທາດອື່ນໆ.
ພຣະທາດເກດແກ້ວ ຕັ້ງຢູ່ບ້ານນາຮີ ເມືອງມະຫາໄຊ ແຂວງຄໍາມ່ວນ. ເປັນພຣະທາດເກົ່າແກ່ ໂດຍມີຜູ້ເຖົ້າຜູ້ແກ່ໃນບໍລິເວນນັ້ນໄດ້ເລົ່າສືບຕໍ່ກັນມາວ່າ ພຣະທາດອົງນີ້ ສ້າງຂຶ້ນໃນສະໄໝດຽວກັບພຣະທາດພະນົມ ແລະ ໄດ້ບູລະນະປະຕິສັງຂອນຕໍ່ໆກັນມາຈາກຮຸ່ນສູ່ຮຸ່ນ ແລະ ພຣະທາດທີ່ເຫັນໃນປະຈຸບັນແມ່ນໄດ້ບູລະນະໃນຮ້ອຍກວ່າປີທີ່ຜ່ານມາແລ້ວ ແລະ ຍັງຄົງຮັກສາອະນຸລັກໄວ້ເພື່ອເປັນບ່ອນຍືດໜ່ຽວຈິດໃຈ ແລະ ສັກກະລະບູຊາ.
ພຣະທາດອົງນີ້ ສ້າງດ້ວຍວັດສະດຸແບບບູຮານ ມີດິນຊາຍ ປະສົມໝາກຂາມປຽກ ໜັງຄວາຍ ນໍ້າເຜີ້ງ ເປັນຕົ້ນ ຂະໜາດແທນສີ່ຫຼຽມ ແມ່ນ 4ຄູນ4 ສູງ 9 ວາ ຫຼື ປະມານ 18 ແມັດ ມີກຳແພງຮອບດ້ານລະ 10 ແມັດ
ປະຊາຊົນເຊື້ອວ່າເປັນພຣະທາດທີ່ມີຄວາມສັກສິດ ເປັນທີ່ນັບຖືຂອງຊາວບ້ານເຂດບໍລິເວດອ້ອມຂ້າງ ເຊິ່ງເຄີຍມີປະຊາຊົນໄປຂໍພອນ ແລ້ວໄດ້ຕາມປາດຖະໜາ ຈຶ່ງເຮັດໃຫ້ມີປະຊາຊົນໄປສັກກະລະກຣາບໄຫວ້ຢູ່ບໍ່ຂາດ ເຖິງວ່າຈະຢູ່ກາງພູຜ້າປ່າໄມ້ ເດີນທາງເຂົ້າລໍາບາກກໍ່ຕາມ
ບ້ານ ນາຮີ ມີທັງໝົດປະມານ 70 ຄອບຄົວ ປະຊາກອນສະເລ່ຍ 375 ຄົນ ອາໄສການເຮັດໄຮ່ ເຮັດນາ ຫາເຄື່ອງປ່າຂອງດົງເປັນອາຊີບ. ໃນແຕ່ລະປີແມ່ນຈະມີບຸນປະເພນີທີ່ສໍາຄັນຂອງບ້ານຄື ບຸນນະມັດສະການພຣະທາດເກດແກ້ວ ຈັດຂຶ້ນເປັນປະຈໍາທຸກປີ ໃນມື້ ຂຶ້ນ 15 ຄໍ່າ ເດືອນ 3 ແລະ ບຸນຫົດສົງນໍ້າພຣະທາດເກດແກ້ວໃນມື້ບຸນປີໃໝ່ລາວ
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ວັດປ່າຮັກນໍ້າ ບ້ານຈານ ອໍາເພີບ້ານມ່ວງ ສະກົນນະຄອນ
