ປະທານປະເທດຢ້ຽມຊົມສວນໝາກໄມ້ຢູ່ເມືອງນ້ຳບາກ ຫລວງພະບາງ
ທ່ານ ທອງລຸນ ສີສຸລິດ ເຄື່ອນໄຫວຊຸກຍູ້ການປູກຕົ້ນໄມ້ໃຫ້ໝາກ ຂອງປະຊາຊົນເມືອງນ້ຳບາກ
ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ພ້ອມດ້ວຍຄະນະການນໍາຂັ້ນສູງກາງ ແລະ ການນໍາແຂວງຫລວງພະບາງ, ຫົວໜ້າພະແນກການ-ກົມກອງ ກ່ຽວຂ້ອງຂອງແຂວງ ໄດ້ເຄື່ອນໄຫວຢ້ຽມຢາມ ຊຸກຍູ້ການປູກຕົ້ນໄມ້ໃຫ້ໝາກ ຂອງປະຊາຊົນ ບ້ານ ນໍ້າງາ ເມືອງນ້ຳບາກ ແຂວງ ຫລວງພະບາງໃນວັນທີ 5 ສີງຫາ 2022 ນີ້ ໂດຍສະເພາະການປູກໝາກເງາະ ແລະໝາກສົ້ມຂຽວຂອງ ທ່ານ ເພັງ ບ້ານນ້ຳງາ
ໂດຍນຳໃຊ້ເນື້ອທີ່ 2 ກ່ວາເຮັກຕ່າ ປູກໝາກເງາະປະມານ 250 ຕົ້ນ ແລະປູກໝາກສົ້ມຂຽວປະມານ 200 ຕົ້ນ, ໃນນັ້ນ ໝາກສົ້ມຂຽວພວມເລີ້ມໃຫ້ຜົນຜະລິດ, ສ່ວນໝາກເງາະ ແມ່ນໄດ້ໃຫ້ຜົນຜະລິດແລ້ວ 7 ປີ ສະເລ່ຍລາຍຮັບປະມານ 75 ລ້ານກີບຕໍ່ປີ
ສຳລັບຂອດການຈຳໜ່າຍແມ່ນມີຄວາມສະດວກຫຼາຍ ຍ້ອນມີແມ່ຄ້າມາຊື້ກັບສວນ, ສ່ວນໃຫຍ່ແມ່ນແມ່ຄ້າຈາກແຂວງຫຼວງນ້ຳທາມາເກັບຊື້.
ໂອກາດດັ່ງກ່າວນີ້ ທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍ ຕໍ່ກັບປະຊາຊົນ ຂົງເຂດດັ່ງກ່າວ ໂດຍສະເພາະ ກໍແມ່ນຄອບຄົວຂອງທ່ານ ເພັງ ບ້ານນໍ້າງາ ທີ່ເປັນແບບຢ່າງໃນການປູກຝັງ ທັງຕົ້ນໄມ້ໃຫ້ໝາກ ແລະ ການປູກເຂົ້າຕາມລະດູຈົນໄດ້ຮັບຜົນດີ.
ພ້ອມດຽວກັນນີ້ ກໍໄດ້ຊີ້ນໍາໃຫ້ອົງການປົກຄອງແຂວງ,ເມືອງ ເພື່ອຊີ້ນໍາພະນັກງານວິຊາການ ລົງຕິດຕາມໃກ້ສິດ ໃນການພັດທະນາ ດ້ານກະສິກໍາ ແລະປ່າໄມ້ຢູ່ເຂດຮາກຖານ ໃຫ້ປະຊາຊົນໄດ້ຮັບການຊຸກຍູ້ສົ່ງເສີມ ການປູກ-ການລ້ຽງ ຜະລິດເປັນສິນຄ້າ ທີ່ມີຄຸນນະພາບ ສ້າງລາຍໄດ້ໃຫ້ຄອບຄົວຫຼາຍຂຶ້ນ
ສຸມໃສ່ການຄົ້ນຄ້ວາທ່າແຮງຢູ່ພາຍໃນເມືອງ ເພື່ອພັດທະນາການປູກຕົ້ນໄມ້ໃຫ້ໝາກແບບມູນເຊື້ອ ໃຫ້ກາຍເປັນການນຳໃຊ້ເຕັກນິກ, ໂດຍນຳພາປະຊາຊົນເຮັດຕົວຈີງ ແລະຊ່ວຍປະຊາຊົນຜູ້ມີເງື່ອນໄຂໃຫ້ໄດ້ຮັບການສຶກສາ ຮຽນຮູ້ເຕັກນິກອັນໃໝ່ ກັບຜູ້ທີ່ປະສົບຜົນສຳເລັດແລ້ວ ແນໃສ່ເຮັດໃຫ້ເມືອງນ້ຳບາກ ໄດ້ຮັບການພັດທະນາຂື້ນຕື່ມອີກບາດກ້າວໜື່ງ.
ສຳລັບ 6 ເດືອນຕົ້ນປີນີ້ ທົ່ວເມືອງນ້ຳບາກ ມີຜະລິດຕະພັນທາງດ້ານກະສິກຳ ແລະ ປ່າໄມ້ 86 ຕື້ 505 ລ້ານກີບ ກວມເອົາ 11,42% ຂອງລວມຍອດຜະລິດຕະພັນພາຍໃນ, ສະເພາະການປູກໝາກກ້ຽງ ເຊີ່ງເປັນພືດທີ່ເປັນມູນເຊື້ອ ແລະເປັນສີນຄ້າຫຼັກຂອງເມືອງ ປະຈຸບັນມີເກືອບ 730 ເຮັກຕ່າ ໃນນັ້ນ ໃຫ້ຜົນແລ້ວຫຼາຍກ່ວາ 575 ເຮັກຕ່າ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: Media Laos