ທ່ຽວຖ້ຳຕິ່ງ ຖ້ຳພະພຸດທະຮູບທີ່ໜ້າທ່ຽວຊົມຂອງຫລວງພະບາງ
ພາບ: laopost.com
ຖ້ຳຕິ່ງ ຖ້ຳພະພຸດທະຮູບທີ່ໜ້າທ່ຽວຊົມຂອງຫລວງພະບາງ.
ໄປຫລວງພະບາງຫາກຍັງບໍ່ທັນໄດ້ໄປສຳພັດຖ້ຳຕິ່ງກໍ່ຖືວ່າຍັງບໍ່ທັນໄດ້ໄປທ່ຽວຫລາຍບ່ອນເທືອ, ສະນັ້ນຖ້າຜູ້ໃດຫາກໄດ້ໄປທ່ຽວຫລວງພະບາງຕ້ອງໄດ້ລອງໄປທ່ຽວຊົມເບິ່ງເພາະສາມາດເບິ່ງເຫັນໄດ້ງາຍໆຈາກຝັ່ງຂອງນ້ຳຂອງ, ອາດຈະບໍ່ແມ່ນຖ້ຳທີ່ເລີກ ຫລື ໃຫຍ່ຫລາຍ, ແຕ່ໃນນັ້ນເຕັມໄປດ້ວຍພະພຸດທະຮູບທີ່ງົດງາມຫລາຍອົງ, ເຊິງວ່າຖ້ຳຕິ່ງ ໄດ້ຕັ້ງຢູ່ໃນພູໜ່ວຍໜຶ່ງທີ່ຕັ້ງສະຫງ່າ ຢູ່ແຄມແມ່ນ້ຳຂອງ ຝັ່ງກົງກັນຂ້າມກັບປາກນ້ຳອູ ເມືອງແລະແຂວງຫຼວງພະບາງ.
ສຳລັບການເດິນທາງ ຢູ່ໄກຈາກຕົວເມືອງຫຼວງພະບາງໄປປະມານ 25 ກິໂລແມັດ ໄປຕາມເສັ້ນທາງເລກທີ 13 ເໜືອ ຜ່ານບ້ານຊ່າງໄຫ ຈົນເຖິງບ້ານປາກອູ ມີເຮືອຂ້າມຟາກໃຫ້ບໍລິການ ດ້ວຍລາຄາບໍ່ແພງ ຫຼື ຈະນັ່ງເຮືອທີ່່ທ່າວັດຊຽງທອງ ເປັນເຮືອເຊົ່າເໝົາລຳ ເຊິ່ງຈະໄດ້ ທ່ອງທ່ຽວ ແລະ ຊົມວິວທິວທັດສອງຟາກຝັ່ງແມ່ນ້ຳຂອງແບບເຢັນສະບາຍໃຈ ແລະ ຖ້ານັ່ງເຮືອຈາກໃນຕົວເມືອງຈະເປັນການນັ່ງເຮືອ ແລ້ວລ່ອງຂຶ້ນ ໃຊ້ເວລາປະມານ 2 ຊົ່ວໂມງເຄິ່ງ ຂາກັບຈະລ່ອງຕາມນ້ຳໃຊ້ເວລາປະມານຊົ່ວໂມງປາຍ.
ຖ້າຕິ່ງປະກອບໄປດ້ວຍ 2 ຖ້ຳ ແຍກຂວາໄປຖ້ຳລຸ່ມ ແລະແຍກຊ້າຍໄປຖ້ຳເທິງ ຖ້າລຸ່ມນັ້ນສູງ 60 ແມັດ ຈາກພື້ນນ້ຳ ມີລັກສະນະເປັນອຸໂມງຖ້ຳຕື້ນໆ ມີຫິນງອກຫິນຍ້ອຍເລັກໜ້ອຍ ເປັນຖ້ຳທີ່ມີພະພຸດທະຮູບຈຳນວນຫຼາຍ ແລະຫຼາຍຂະໜາດ ສ່ວນຫຼາຍຈະເປັນພະຢືນ ມີທັງປາງປະທານພອນ ແລະປາງຫ້າມຍາດ ຄວາມສຳຄັນຂອງຖ້ຳຕິ່ງໃນສະໄໝ ບູຮານເປັນບ່ອນສັກກາລະ ບວງສວງດວງວິນຍານ ຜີຟ້າ ຜີແຖນ ເທວະດາຜາຕິ່ງ.
ຖ້ຳຕິ່ງໃນມື້ນີ້ຍັງສະແດງເຖິງຍຸກແຫ່ງການປະຕິວັດ ຄວາມເຊື່ອຂອງປະຊາຊົນລາວໃນອະດີດ ທີ່ເຄີຍນັບຖືຜີ ພະເຈົ້າໂພທິສາລະລາດ ຊົງເລື່ອມໃສໃນ ພຸດທະສາດສະໜາ ແລະຊົງໃຊ້ຖ້ຳຕິ່ງເປັນສະຖານທີ່ສັກສິດທາງພຸດທະສາດສະໜາ ແລະມີການຄົ້ນພົບພະພຸດທະຮູບທີ່ສ້າງຂຶ້ນໃນສະຕະວັດທີ 18-19 ຫຼາຍກວ່າ 2,500 ອົງ ສ່ວນຫຼາຍສ້າງຂຶ້ນຈາກໄມ້ ເມື່ອຕອນຄົ້ນພົບໃໝ່ ມີພະພຸດທະຮູບຈຳນວນໜຶ່ງທີ່ສ້າງດ້ວຍເງິນ ແລະຄຳ ແຕ່ຖືກເຄື່ອນຍ້າຍອອກໄປໝົດ.
ນັບແຕ່ນັ້ນມາຖ້ຳຕິ່ງຈຶ່ງເປັນຖ້ຳທີ່ສັກສິດ ເຈົ້າມະຫາຊີວິດຫຼວງພະບາງ ຕ້ອງໄປສັກກາລະບູຊາພະພຸດທະຮູບໃນຖ້ຳ ໂດຍສະເພາະໄລຍະບຸນປີໃໝ່ລາວ ທັງເຈົ້າມະຫາຊີວິດ ພະນັກງານລັດຖະການ ພະສົງ ປະຊາຊົນທົ່ວໄປ ຈະເດິນທາງໄປຫົດສົງພະພຸດທະຮູບ ທີ່ຕ່ຳຕິ່ງເທິງແລະຖ້ຳຕິ່ງລຸ່ມ ຈາກນັ້ນຈຶ່ງໄປຫົດສົງພະພຸດທະຮູບ ທີ່ວັດປາກອູ ເຊິ່ງຢູ່ໃກ້ໆ ກັບຖ້ຳຕິ່ງ ສຳລັບຖ້ຳເທິງນັ້ນ ມີທາງແຍກໄປທາງຊ້າຍຂຶ້ນຂັ້ນໄດໄປ 218 ຂັ້ນ ສອງຂ້າງທາງຮົ່ມເຢັນດ້ວຍເງົາໄມ້ ລັກສະນະຖ້ຳຕິ່ງເທິງເປັນປາກຖ້ຳບໍ່ເລິກປານໃດ ມີພະພຸດທະຮູບຢູ່ພາຍໃນຖ້ຳ ແຕ່ບໍ່ຫຼາຍເທົ່າກັບຖ້ຳຕິ່ງລຸ່ມ ທີ່ປາກຖ້ຳມີໄຟສາຍໃຫ້ເຊົ່າສຳລັບເຂົ້າໄປ ເຍືອງເບິ່ງຄວາມສວຍງາມພາຍໃນຖ້ຳ.
ບອກໄດ້ວ່າຖ້າໃຜໄດ້ໄປຫຼວງພະບາງ ແຫຼ່ງທ່ອງທ່ຽວ ແຫ່ງໜຶ່ງທີ່ບໍ່ຄວນພາດຄື ຖ້ຳຕິ່ງ.
ຂອບໃຈຮູບປະກອບສ່ວນໜຶ່ງຈາກ: ຮູບພາບປະເທດລາວ
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: laopost.com
